Тексты

Вернуться к списку | редактировать | удалить | Создать новый | История изменений | ? Помощь

Baban uudimed

Корпус: младописьменный подкорпус

Младописьменный вепсский, тексты для детей

Источник: Verez tullei, (2014), с. 104
Ol’ga Žukova

Baban uudimed
(вепсский)

Meiden tätüižed ištuba divanal. Lena-sebranikanke vändam baban fateras. Sobitam da udes sobitam meiden tütrid, veretam heid magadamha. Minä homaičin stolal jättud babal nitid neglanke.

Lena, ombelkam tätüižele platjo.

Ombelkam! sanub Lena, – ka, tarbiž mitte-ni ruzuine löuta.

Minä kacuhtin sinnä-tänna...

A čapkam palaižen uudimespäi. Naku kacu, miččed čomad, änikoidenke rippuba päčin taga, magadandhonusehe mändes.

A babaiž ei käregande meiden päle? küzub Lena.

Ei, hän ei homaiče-ki.

Lena pidäb uudimen röunan, a minä čapan raudoil palaižen, kehkeran, ani ümbri änikos. Naku om čoma, omblem tätüižele platjon. tartuim radho.

Pordos päliči tuleb baboi lehmäd lüpsmaspäi. Hän mäneb keitimpolhe, sehloičeb i valab maidod bankoihe. Sid’ tuleb honusehe, kus vändam, i ohkahtab:

Ka mi nece uudimele tegihe, mikš mugoine röun-se om rebinu?


Baboi kosketab uudimen i kacuhtab meiden polhe:

Neičukaižed, ken necen radoi?
küzub baboi.

En minä, – sanub Lena.

Minä mugažo sanun:

En minä.


A ved’ minei pähä-ki ei tulend, miše hubin radam. Vaiše nügüd’ el’genzin i pöl’gästuin baban käreidust.

A baboi kaiken el’gendab, rad om jo tehtud, uudimed om travitud, midä lapsed laida, nägub, miše varaidaba, ei pahas meles tehtud azj, a vändos.

Toižel kerdal, meletagat, midä voib tehta, a midä ei, – sanub baboi, – i küzugat minai, ku midä-ni tarbiž.

Nügüd’ minä olen jo kaznu, no igän muštan laps’aigan vändoid. I sen azjan, miše en rohtind sanuda, ken uudimed čapoi. Minä ostin babale uded čomad uudimed, i ühtes hänenke johtutim aigan, konz minä olin penen neičukaižen.