Тексты
Вернуться к списку | редактировать | удалить | Создать новый | История изменений | Статистика | ? Помощь
Händikaz da pedr (Estilaine sarn)
Händikaz da pedr (Estilaine sarn)
вепсский
Младописьменный вепсский
Pedr
käveli mecadme .Äkkid kuleb abidahižen ulaidusen .Läksi änele , kacub – tullei sordi suren pedajan , a sen pedajan al händikaz venub .Lähtta ei voi – vaiše ohkab .
Pedr kiglaiži sarvikahal päl i küzub :
– Kut sinä putuid sinna ?
– Oh , eskai ala küzu ! Paremba abuta minei , lenda sarvil tüvi !
– Minä abutaižin , da tüvi om lujas sanged – en voi leta , – kahtelzihe pedr .
– Sinä hot’ ladi , – pakiči händikaz .
– Midäk , voib ladida , – hökkähti pedr i tabazi sarvil pedajan .
Kerazi väged – i kacuške !– lendi tüven . Todeks lendi vähäižen , no händikaz voi lähtta pedajan alpäi .”Mitte minä olen vägekaz !” – ihastui pedr .
A händikaz pudištihe , libui käbälile i zavodi kacta ičeze karvad , ei-ik ole kus rebinu .No kaik oli hüvin .Siloi händikaz johtuti pedran polhe .Sid’-žo tacihe sennoks i uraidaškanzi .
– Seižu ! Kuna sinä lähted ?
– Kuna ? – küzui pedr . – Sinna , kuna astuin-ki .
– Minä sindai sön ! – uraidaškanzi händikaz . – Pedroid kaiken oli minun satusen .
– Varasta , jose minä en kaičend sindai surmaspäi ? – küzui pedr .
– Nece om toine azj !
– Ei ole-ik sinei huiged ?
– Mikš minei pidäiži olda huiged ? Heitan sinuspäi nahkan – i naku kaik pagin .
Pedr ei voind hökkähtada händikahanke , i muga hö lujas pit’kha ridliba i ei tulnugoi nimiččehe pätusehe .Siloi pedr sanui :
– Sudigaha ken-ni meid , siloi mö tedištam , ken om oiged .
Händikaz vaiše ihastui .A iče meletab : ”Minei paremba om – sön pedran i sudjan kerdalaze !”.
Kaiken päivän hö eciba sudjad i vaiše ehthapäi löuziba .Nece oli vanh kondi .Hän astui külähä , miše sada met mezjaižtarhal .Vähän buraiden hän kundli pedrad i händikahad .A konz kundli lophusai , pani käbälan suhu i meletaškanzi .No muga nimidä ei meletand-ki .
– En teda , kut olda teidenke , – sanub . – Oikti linneb kacta , kut kaik oli .
Pedr händikahanke toiba kondjad lanktenudenno pedajannoks .Mäni kondi ümbri pedajas i möst meletaškanzi .A jäl’ges sanub-ki :
– Nuške , pedr , lenda sarvil pedai .En usko , miše sinä void leta sidä .
– Völ kut voin ! – abittui pedr i lendi tüven .
A kondi sanub-ki :
– Nuške , händikaz , ličte möst pedajan alle .En usko , miše sinä mugoižehe piluhu void ličtas .
– Völ kut ličemoi ! – abittui händikaz i sid’-žo ličihe letud pedajan alle .
Siloi kondi sanui :
– Nuške pedr , pane tüvi edeližele sijale .
Pedr pästi pedajan , i – kacuške !– händikaz udes putui parangoho .
Kut oli parangos , muga jäi-ki sinna : ken abutaškandeb mugomale manitajale ?
Händikaz da pedr (Estilaine sarn)
вепсский
Младописьменный вепсский
–
–
–
–
–