Тексты
Вернуться к списку | редактировать | удалить | Создать новый | История изменений | Статистика | ? Помощь
Galina Baburova, Irina Sotnikova. Sündundpäivänke, Lönnrotan škol!
Galina Baburova, Irina Sotnikova
Sündundpäivänke, Lönnrotan škol!
вепсский
Младописьменный вепсский
Jubilei
: Suomalaiž-ugrilaižele školale täudui 20 vot .
Suomalaiž-ugrilaine škol oli avaitud Petroskoiš vodel 1994 vepsän , karjalan da suomen kul’tursebroiden napernan radon taguiči .Möhemba sebrad löuziba voimust sada školan täht uz’ sauvotuz .
Ezmäižel vodel školas oli kuz’ klassad , radoi 14 opendajad , openzihe 104 openikad .Vodel 2000 škol sai tetaban fol’kloristan , Kalevala-eposan keradajan , Elias Lönnrotan nimen .Tämbei školas opendase 920 last .Školan pämez’ om Natalia Valerjevna Barkalova .Hän kaiken holdub lapsiš , opendajiš da školas .Suomalaiž-ugrilaine škol om üksjaine Petroskoiš , kus paiči sumen da karjalan kel’t mugažo opetas vepsän-ki kel’t .
Jubileivastused
Kül’mkun lopus suomalaižugrilaižes školas oli tehtud äi melentartuižid azjtegoid da vastusid , miččed oli omištadud školan jubilejale .
Tehtihe ozutuzurokoid , mel’mahtoižid vändoid , festivalid , lapsiden sädairadoiden da tehmusiden ozutelusid i äi tošt .Käveltes školadme voi kacta pirdatusid , opendajiden modkuvid , seinlehtesid , lugeda ozatelusid školale da kitändsanoid opendajile .Kaikespäi nägui – škol om vaumiž vastata adivoid !
Kül’mkun 25.päiväl školas oli Kundaližiden organizacijoiden päiv .Necil päiväl školha tuliba erazvuiččiden rahvahaližiden organizacijoiden ezitajad .
Openikad , kudambad opendaba vepsän kel’t , vasttihe Vepsän kul’tursebran ezitajidenke .Vastusel oliba openikad ezmäižespäi ühthetoštkümnendehesai klassahasai .Lapsile oli ozutadud prezentacii , mitte starinoiči Vepsän kul’tursebran istorijas , sen rados da projektoiš .Svetlana Pas’ukova tarkašti starinoiči suomalaiž-ugrilaižen školan istorijas da ristituiš , kudambad radaba školan hüvüdeks ani sen augonpanendaspäi .Miše tehta vastusen melentartuižeks , lapsiden täht oli tehtud mel’mahtoine vänd .A jäl’ges lapsile taritihe väta vanhoihe karjalan da vepsän vändoihe .Tuli läm’ südäimeline vastuz .
Vodespäi 1994 školas radab Sidomusiden kuvatuzstudii .Sen ohjandai om Natalia Aleksandrovna Okuneva .Školan jubilejaks hän neičukaižidenke tegi uden sidomusiden ozutelusen i eziti sen adivoile .Mugažo Natalia Aleksandrovna kucui adivoid ičeze Sidomusiden kuvastudijaha i starinoiči , mitte nece om jüged rad – sidomine koklüškoil , i kut neičukaižed surel tahtol kävuba necile sebrale .
Ko ume väged ühtes
Adivoid varasti völ üks’ lahj openikoilpäi .Hö iče keraziba materialad rahvahaližiden sebroiden polhe i adivoiden edes lugiba dokladoid niiden istorijas da rados .Nügüd’ Karjalan valdkundas eläb läz 640000 mest .Tämbei radab enamb 70 rahvahališt kul’tursebrad .No necil päiväl pagin oli vaiše koumes sebras – Vepsän kul’tursebras , Karjalan rahvahan sebras da Karjalan inkerilaižiden sebras , miččed oma lujas tarbhaižed suomalaiž-ugrilaižen školan elos .
Necil vodel kaikile koumele sebrale täudui 25 vot .Niiden ühthižvägel oli tehtud lujas äi .Udessündutadihe karjalan da vepsän kirjkelid , Karjalan školiš zavottihe opeta karjalan , vepsän da suomen kelid , paindas lehtesid kodikelil , tehtas lujas äi projektoid da aigtegoid , miččed lujas painastaba rahvahalažehe ičetundmusehe da popularizoidaba neniden rahvahiden kul’turad kut Karjalan valdkundas , muga sen irdpolel-ki .Neniden sebroiden satusehe mülüba mugažo al’manahad , Periodikapaindištos paindud literatur , radio - da teleprogrammad kodikelil , horad da fol’klorkollektivad , abekirjad da openduzkirjad , Biblijad , Baltianmerensuomalaižiden keliden da kul’turan tedokund universitetas , kodikelen kursad da paginklubad , rahvahaližed praznikad küliš i äi tošt .
Vanhembiden klassoiden openikad lujas tozišti tartuiba neche radho .Oli mel’he kundelta arvokahiš tedon , kul’turan radnikoiški , kudambad kaičeba meiden rahvahiden tradicijoid , istorijad da kul’turad .Om tarbhašt teta heiden nimid i kaita sidä , mi om jänu meile ezitatoišpäi .Neciš školas istorii , tradicijad da kul’tur eläškandeba sihesai , kuni oma ned , kudambad surel melentartusel kaičeba niid .Ved’ ken arvostab i navedib ičeze kul’turad , kel’t da istorijad , se navediškandeb toižiden-ki rahvahiden kul’turad .Nece om muga tarbhašt meiden elos !
Praznikeht školas
Kül’mkun 28.päiväl školas oli pidätud 20-voččen jubilejale omištadud praznikeht .Zal oli hüvin čomitadud .Erimujuižed il’mšarud ihastoitiba lapsid da aigvoččid , lahjoičiba kaikile sarnališt mel’t .
Necil päiväl školal oli todesine sündundpäiv , se vastsi adivoid , sai ozatelusid da lahjoid .Adivod saneliba lämid sanoid školan radnikoile da openikoile , toivotiba heile satusid .
Enamba kaiked johtutadihe siš , kut oli avaitud škol , kut holdutihe uden sauvotusen samižes školan täht , kut äi vägid oli pandud neche azjaha .
Ozatelemha školad jubilejanke tuliba sen pästnikad .Erased heišpäi nügüd’ iče oma opendajad .Školan sebrad-ki tegiba lahjoid necil praznikehtal .Armhan školan arvostuseks lapsed kargaižiba nügüdaigaližid da rahvahaližid karguid , pajatiba pajoid da lugiba runoid .Ühtes polespäi 20 vot nece om vähä , no toižes polespäi nece om äi .Lidnan täht suomalaiž-ugrilaine škol nece om ülenduz .Školan znamoičendas äjan pagižiba valdmehed .
Kacmata sihe , miše nügüd’ openikoid , kudambad tahtoižiba opeta kodikel’t väheni , školas napridas opeta lapsid etnokul’turižes il’mištos .Opendajad ladiba sündutada lapsiš armastust kodikel’he .Tägä kaikutte openik om kalliž .A opendajiden hüvän radon ozutai om openikoiden satused .Opendajad toivoba , miše voziden sirttes heiden radon satusid linneb kaik enamba i enamba .
Sündundpäivänke, Lönnrotan škol!
вепсский
Младописьменный вепсский