Тексты
Вернуться к списку | редактировать | удалить | Создать новый | История изменений | Статистика | ? Помощь
Irina Sotnikova. Petroskoiš mäni koiriden val’l’astusiš ajand
Irina Sotnikova
Petroskoiš mäni koiriden val’l’astusiš ajand
вепсский
Младописьменный вепсский
Sport : Karjalan
pälidnas mäni mail’man Kubkan etap ajandsportas
Vilukun 24.–26 .päivil ezmäižen kerdan Karjalan pälidnas oli männu mail’man Kubkan etap – rahvazkeskeine koiriden val’l’astusiš voibištelend .Ajandan nimi om vahvas sidotud Kalevala-runoeposanke – ”Sampo-madme ”.Nece oli sur’ praznik sportmehiden i kacujiden täht .
Praznikavaiduz oli vilukun 25.päiväl suks’stadional läz Gorka-sportkeskust .
Miše ühtneda rahvazkeskeižehe ajandaha , Karjalan pälidnaha tuliba parahimad sportmehed erazvuiččiš maišpäi .Ajandaha ühtni enamb 80 sportmest Venämalpäi , Suomespäi , Pol’šaspäi , Germaniaspäi , Čehiaspäi , Slovakiaspäi i Serbiaspäi .Joukud toiba ičezenke läz 500 erazvuiččiden roduiden koirad .
Avaiduzpäiväl Karjalan valdkundan pämez’ Aleksandr Hudilainen , lidnan pämez’ Galina Širšina , Zakonoidensuiman pämez’ Vladimir Sem’onov i üks’ ajandan pätegijoišpäi , tetab matknik , Viktor Simonov tervehtoitiba kaikid ühtnikoid i praznikan adivoid .Hö sanuiba lämid sanoid i toivotiba ozad kaikile ühtnikoile .Aleksandr Hudilainen toivob , miše tulijal vodel Petroskoiš voib mända mail’man ajandsportan čempionat .
Mugoine voibištelend oli ezmäižen kerdan Petroskoiš i tuli sureks sportaigtegoks meiden lidnan eläjiden täht .Ajand koiriden val’l’astusiš om melentartuine nägemuz , mitte kerazi enamba koumekümned tuhad kacujad koumes päiväs .
Täl vodel ezmäižen kerdan tehtihe živatoiden doping-kontrol’ neciš sportas .Necen täht tuliba tundijad Šveciaspäi .Kaik nece sanub aigtegon tärgedudes .
Männuzil vozil Sampomadme ajand oli Präžas .Necil vodel koiriden val’l’astusiš voibištelend tehtas jo koumanden kerdan , i toižen kerdan se mäneb kut mail’man Kubkan etap .
Nikonz aigemba minä en olend mugoižel aigtegol .Koiriden val’l’astusiš ajand om todeks čudokaz sportan rod .I om hüvä se , miše ajand tehtas meil Karjalas , a täl kerdal – Petroskoiš-ki .Ved’ erasil ristituil ei ole voimust putta mugoižele aigtegole , konz se tehtas miččesse toižes sijas .A naku – ei tarbiž edahaks mända .Rahvast oli lujas äi .I minä meletan , miše äjad ristitud , kut minä-ki , ezmäižen kerdan oliba mugoižel surel praznikal .
Voibištelendan aigan oli tehtud melentartuine iloituzprogramm lapsiden i aigvoččiden täht .Sobatan edel ajandan augotišt eziniba karjalaižed artistad , tehtihe fajer-šou , radoiba möndsijad , kus voili ostta karjalaižid muštlahjoid , erazvuiččid tehmusid , pehmdoid bobaižid .
Lebupäivil oli äi lapsid vanhembidenke .Kaikil oli hüvä mel’ .Voibištelendan ühtnikad , kudambad ei ühtenugoi ajandaha , käveliba ičeze koiridenke rahvahan keskes .Naku oli ihastust !Lapsed sebaziba karvakahid haski-koirid , silitiba niid , hüviš meliš tegiba fotokuvid .Aigvoččed-ki ei jänugoi čuraha .A koirad oliba laskvad , kundliba ičeze ižandoid .Kaik tahtnikad tegiba fotokuvid koiridenke , voiliba ajada regel koiriden val’l’astusiš .
Sä-ki oli hüvä .Verez il’m , čoma tal’vmec , ei sur’ pakaine – kaik nece abuti tehta hüväd lebud lidnalaižiden täht , a praznikad čomaks i melentartuižeks .
Sikš ku irdal ei olend muga vilu , se andoi voimust ristituile kacta ajandad lophusai .A ken kül’mi , ka voi joda hulad čajud barankoidenke ani maksuta , ühtneda vändoihe , konkursoihe , horovodoihe , miččid tegiba Karjala-ansambl’an ühtnikad .Oli lujas vessel .Kaik praznikan adivod oliba hüviš meliš .
Oli mel’he se-ki , miše äjad lidnalaižed tuliba kanzoin .Äjiden meliden mödhe nece ajand tuli parembaks sporttal’vpraznikaks .
Voibištelendan ezmäižel päiväl oli ajand kaiked pitkembale sportmatkale – 40 kilometrad .Jäl’ges oli keski lühüdsportmatkoid .Sprintan ajand oli viz’ i kümne kilometrad .
Kut männudel-ki vodel möst vägestajaks tuli Pavel Pfeifer Čehiaspäi .Hän tuli ezmäižen 40 kilometran ajandas , 8-12 koiran val’l’astusiš .Toižel sijal om Jussi Pietikainen Suomespäi .Koumanden sijan sai venälaine sportmez’ Mihail Šelkovin .Kuden koiran val’l’astusiš ajandas ezmäižen sijan sai Martin Vrtel Čehiaspäi , toižen sijan sai Aleksandr Stol’arov Karjalaspäi Kudama-küläspäi i koumandel sijal om venälaine naine Vita Č’ornaja .
Sprintan ajandas nellän koiran val’l’astusiš ezmäižen sijan sai sportmez’ Pol’šaspäi Igor Tracz .
Mugažo oli nimitadud vägestajid skidžorningkategorijas .Nece konz üks’ vai kaks’ koirad abutaba joksta hihtäjale .
Kut sanuiba ajajad , te oli jüged : orgoid , mägid , kändandoid ...Voibištelendan ezmäižel päiväl Einari Jutunen Kudama-küläspäi ajoi ocal puhu .Hän lujas satatihe i toižil päivil ei ühtnend ajandaha .
Ajandsportas kut toižiški oma ičeze sändoid , erigoičusid .Kut sanuba voibištelendan ühtnikad , koirile paremb joksta kovas pakaižes .I völ tärged azj – ajajan i koiriden keskes pidäiži olda kesknäine el’genduz , miše sada satust .
Nece sur’ sportaigtego tuli sureks praznikaks lidnan eläjiden täht i toi äi hüvid tundmusid , emocijoid .Tuli äi rahvast .Kacujad jäiba hüviš meliš .Minä meletan , miše jäl’ges necidä aigtegod , ajandsportan navedijoid tegihe enamba .
Spasib kaikile necen melentartuižen aigtegon tegijoile .Oliži hüvä , ku mugoine voibištelend tuliži meiden lidnan tradicijaks .I ken tedab , voib olda , vodel 2015 Petroskoiš kaik-se mäneb mail’man ajandsportan čempionat .
Petroskoiš mäni koiriden val’l’astusiš ajand
вепсский
Младописьменный вепсский