Тексты

Вернуться к списку | редактировать | удалить | История изменений | ? Помощь

Lapsiš oma meiden holed da toivod

Корпус: младописьменный подкорпус

Младописьменный вепсский, публицистические тексты

Источник: Nikolai Abramov, Kodima. № 7, (2014), с. 5

Lapsiš oma meiden holed da toivod
(вепсский)

Praznik: Pätničan kezakun 13. päiväl Vidl-külas Leningradin oblastiš mäni sur’ vepsän rahvahan praznikElonpu”.
Minä tulin praznikale Ladvaspäi ičein mašinal läz 11 časud. Rahvast kesked irdad oli jo äi. Irdoil seižui äi avtobusoid, ristitud erazvuiččiš lidnoišpäi i külišpäi leviteliba stolile käzitegendoid, emägusid da jondoid. Ojat’-jogen randal kehui lemuz, savustiba samvaroiden trubad. Vidlan kirjišton radnikad möiba erazvuiččid vepsläižiden avtoroiden kirjoid, mugažo kirjoid meiden man polhe, lehtesid i kulehtesid. Kodima-lehtesen-ki mugažo voili sada täs.
Vidlan külän eläjad homendesespäi jo käveliba külän päirdal, kudamb oli lujas čomitadud praznikan täht. Ken-se valičimidä voib ostta, ken-se tuli, miše nägištada heimoid vai sebranikoid toižiš külišpäi. Radoiba mastar’-klassad, kus voili opetas tehta savisižid padoid vai paštta vepsläižid pirgoid.
Konz časud ozutiba 13, töndui oficialine praznikan avaiduz. Rahvast tervehtoitiba adivod Piterišpäi, Petroskoišpai, Podporožjelidnaspai. Jäl’ges rahvaz iloitelihe.
Venämal nece voz’ om nimitadud Kul’turan vodeks, a Leningradin oblastišLapsiden vodeks. Sikš vepsläižele praznikale oli anttud nimiKukirikku”. Se, voib sanuda, om lujas vessel sana i enambal kosketab laps’aigad.
Necil vodel praznikal oli äi erazvuiččid lapsiden kollektivoid. Ka lapsid-ki praznikal oli lujas äi! Minei lujas tuliba mel’he lapsiden ansambl’adČomaštiVidlaspäi, ”РадостьPöud-lidnaspäi, mugažo oli hüvä kollektiv Voznesenje-küläspai. Ezmäižen kerdan praznikal radoiTeatran balagan”, kus lapsed ozutiba ičeze akt’ortalantoid. Mugažo oli äi eravuiččid vändoid lapsiden täht, äjile lujas mel’he tuliba klounad.
Kut enččil-ki vozil, praznikal oli erazvuiččid konkursoid: ”Kel om paremb külä”, ”Laps’aigan voded”, bobaižiden konkurs. Aukcional voili ostta haugen pän, muraškvarenjad vai midä-se tošt.
Praznik ozuti, miše ristitud ei unohtagoi vepslaižid veroid da tradicijoid. Vaiše kaik nece pidab jätta lapsile da vunukoile.