Тексты
Вернуться к списку | редактировать | удалить | Создать новый | История изменений | Статистика | ? Помощь
Maria Filatova. Kut kaita ičeze kodikel’t?
Maria Filatova
Kut kaita ičeze kodikel’t?
вепсский
Младописьменный вепсский
Konferencii
: Piteriš pagištihe vähäluguižiden rahvahiden kul’turan da keliden kaičendas .
Erazvuiččed suomalaiž-ugrilaižen mirun küzundad oli letud tedo - da praktikkonferencijal , miččen nimi oli «Suomalaižugrilaižed Venäman Öbokan rahvahad : tradicijad da nügüd’läine aig ».Se mäni Piteriš 2014.voden kül’mkus .
Konferencijaha ühtni enamb sadad mest Venäman erazvuiččiš alovehišpäi : Karjalaspäi , Komi-valdkundaspäi , Piterin da Vologdan agjoišpäi .Oli adivoid Suomespäi-ki .Nene oma rahvahaližiden sebroiden ühtnikad , vald - da tedomehed , lehtezmehed .Dokladoiden temad oli sidotud vähäluguižiden rahvahiden kul’turan da keliden kaičendaha .Sur’ homaičend oli oigetud keliden problemoiden kaičendaha .Piterin agjas eläb viž suomalaiž-ugrilašt rahvast : vepsläižed , vodjalaižed , ižorad , ingermalaižed , Tihvinan karjalaižed .Niid om seičeme tuhad mest .
Kaikuttušt rahvast holdub küzund – kut kaita iceze kel’t ?Konferencijal oli pagin siš , miše Piterin valdmehišt tugedab vähäluguižid rahvahid .Piterin agjas radab Igähižiden rahvahiden keskuz , mugažo radon vedäba sebr ”Vepsarija ” da «Vodjalaižiden da ižoroiden sebr ».Piterin agjan Vidl-küläs radab Vepsän fol’klorkeskuz .Neciš keskuses om avaitud vepsän rahvahan muzei , Kädekaz-sebr , kangazpuiden honused .Sigä radaba Päiväine-tätüteatr , Armas - da Čomašti-pajosebrad .Kaik nece abutab kaita rahvahan kul’urad .No täudub-ik necidä abud , miše kaita kel’t , mitte jo kadob ?Sen polhe oli pagin konferencijal .Vepsän kul’tursebran pämez’ Zinaida Strogalščikova eziti melentartuižen dokladan .Hän starinoiči vepsän kelen nügüd’läžiden elon polhe da mahtoiš , kut voib kehitoitta kel’alovehid .
Pidab sanuda , miše vepsän kelen kaičendaha oli omištadud äjad dokladad .Ol’ga Spirkova , Vidl-külän Vepsän fol’klorkeskusen radnik , starinoiči vepsän kelen elon Vidl-küläs .Nügüd’ neciš posadas tehtas vepsän kelen kursad .Vepsän kelen polhe pagiži Viktor Trifojev , Piterin Rahvahaližen vepsläižen kul’tursebran pämez’ .
Karjalaspäi konferencijale tuli nel’l’ ezitajad : Zinaida Strogalščikova , Jelena Migunova , Larisa Smolina da Maria Filatova .Dokladad oli sen polhe , kut nügüd’ kehitoitasoiš karjalan da vepsän keled , da kut niid voib kaita .
Larisa Smolina starinoiči projektoiš , miččed oli tehtud jäl’gmäižes aigas .Ozutesikš , vepsän paginklub radab jo koumanden voden .Täl kezal oli tehtud Noriden kul’turdesant-projekt , oli kuvatud uz’ fil’m vepsän kelel «Sel’ktas vedes kala kokib ».Kaik nece abutab kehitoitta vepsän kel’t Karjalas , sirtta se norele pol’vele .
Konferencijan aigan pagištihe , miše Piteriš om surid problemoid suomen kelen opendusenke .Lidnas ei täudu mahtakahid suomen kelen opendajid , om vähän hüvid nügüd’läižid openduzkirjoid .Pagin oli siš , miše pidab tehta kursoid , kus opendajad voižiba parembzoitta ičeze kel’tedoid .
Konferencijal äjan pagištihe , letihe tarbhaižid küzundoid , ectihe vastusid niihe .Sen aigan oli tehtud pätused , miččed andaba ičeze satusid .
Mugoižed konferencijad andaba voimusen suomalaiž-ugrilaižen mirun ezitajile vastatas , abutaba vajehtadas mahtoil da tedoil .Valdmehed da rahvaz voiba olda sidos , vedäda paginad i ühtes tehta tärktad radod .
Kut kaita ičeze kodikel’t?
вепсский
Младописьменный вепсский