Тексты

Вернуться к списку | редактировать | удалить | История изменений | ? Помощь

Etnokeskusiden associacii Karjalas

Корпус: младописьменный подкорпус

Младописьменный вепсский, публицистические тексты

Источник: Valerii Sidorkin, Kodima. № 1, (2015), с. 5

Etnokeskusiden associacii Karjalas
(вепсский)

Männuden voden lopus Karjalan valdkundas tehtihe ECHO-projektan ühthevedoid. Nece om rahvazkeskeine projekt, miččen pätegend om kaita da popularizoida Karjalan valdkundan rahvahiden kul’turtradicijoid da kelid. Projekt zavodi ičeze radon Karjalan kelen da kul’turan vodel – 2013. Sen ohjandai om Markku Nieminen, suomalaižen Juminkeko-fondan pämez’.
Projektan todenzoitusehe ühtniba Karjalan valdkundan kul’turministerstv, Rahvahiden kul’turiden keskus, tugedusen da etnokul’turižiden tomotusiden kehitoitusen fond. Mugažo sihe ühtni suomen Kul’turfondJuminkeko”. Karjalas da Suomes ned sädiba openduzseminaroid, ”kehkerid stolid”, mastar’-klassoid rahvahan radonmahtoiden mödhe etnokeskusiden pämehiden da niiden radnikoiden täht.
Projektan radon aigan äjiš rajonoiš oli tehtud da kohetud etnokeskused, niiden täht oli osttud eriline interaktivine kaludišt, i päazjtehtihe etnokeskusiden sidomuz.
Ühten jäl’gmäižišpäi openduzseminaroišpäi ühtnikad pätiba säta etnokeskusiden associacii, mi tuli-ki projektan päsatusen. Nügüd’ associacijan ohjandai om Svetlana Kol’čurina. Associacii ühtenzoiti kaikid kul’turorganizacijoid da ristituid, kudambad holduba Karjalan igähižiden rahvahiden tradicijoiden kaičendas.
Associacijan tegemine tuli tarbhaižeks ECHO-projektan lopuks. Nügüd’ sen ühtnikad zavodiba planuita programmoid da projektoid, miččed om oigetud etnokeskusiden sidomusen kehitoitandaha ei vaiše Karjalas, no toižiš-ki Venäman agjoiš.