Тексты
Вернуться к списку | редактировать | удалить | Создать новый | История изменений | Статистика | ? Помощь
Maria Filatova. Läm’ vastuz Šoutjärven muzejas
Maria Filatova
Läm’ vastuz Šoutjärven muzejas
вепсский
Младописьменный вепсский
Kul’tur
: Muzejiden ö-praznik Šoutjärves tuli tradicijaks .
Verazmaine tradicii vedäda Muzejiden ö-praznikad tuli meiden-ki male .Se muga oli mel’he rahvahale , miše lujas hotkas leviganzi erazvuiččiš Venäman agjoiš .Vepsän mal nece praznik vedätihe jo nel’l’änden kerdan .
Karjalas ”Muzejiden ö ” zavottihe tehta ezmäi valdkundan pälidnas .Jo äi kerdoid Petroskoin muzejad avaižiba ičeze verajad öl i kaikutte tahtnik voi tulda muzejeha maksmata .Adivoid kuctas ekskursijoile , foto - da kuvaezitusile , koncertoile .Tahtnikoid tulda muzejaha öl om lujas äi .Ved’ kut om tetpas , ehtta tulda ekskursijale radpäiväl om jüged , i sikš voib tulda muzejaha hot’ möhäehtal .
Täl vodel Šoutjärven vepsläine etnografine muzei radoi öl semendkun 8.päiväl .Muzejas oli lujas äi adivoid .Kerazihe ei vaiše külän eläjad , no kezapertin eläjad-ki , kudambad tuliba kezapertihe lebupäivikš da kudambad ajoiba siriči mašinoil i azotihe kacmaha , mi tegese muzejas .Da kut voib ei seižutadas ?Muzejaspäi kuluiba čomad vepsläižed pajod – Šoutjärven hor kucui adivoid muzejaha .Muga muzejas oli enamb sadad mest , lapsid da aigvoččid ristituid .Niiden keskes oli adivoid susedkülišpäi – Šokšuspäi da Kalagespäi , oli tulijoid Petrskoišpäi-ki da eskai Belorussijaspäi .
Vepsän rahvahal om mugoine vero – vastata adivoid lämäs .Šoutjärven muzei kaičeb necidä tradicijad .Kaikuttušt tulijad vastatas , kut lähelišt ristitud .
– Tervhen tulda vepsän male , Šoutjärven vepsän rahvahan muzejaha ! Minä nadeimoi , miše nece päiv tuleb teile mel’he , i konz tö tulet kodihe , ka muštat sen aigan , – neniš sanoišpäi zavodihe ekskursii , miččen tegi Natalia Anhimova , muzejan pämez’ .Kaikuččen predmetan polhe Natalial om ičeze starin .Kaikuččen adivon küzundaha hän löudab vastusen .
Ön adivoile ozutadihe muzejan honusid , eksponatoid , starinoitihe vepsän rahvahan enččes da nügüdläižes elos .Muzejale om midä ozutada !Ved’ siš om lopnus kaks’vozne restavracii , i nügüd’ muzei om kuti udessündunu .Irdpoles se om uzištadud : om vajehtadud katuz , om kohetud iknan pölused .Muzejan südäimes-ki äi om vajehtanus .Udes mujutadud seinäd , pandud uded škapad kaluiden täht , äjad eksponatad om restavsiroitud .Ihastoitab se azj , miše nügüd’ muzejas om avaitud uz’ kudenz’ honuz .Siš om ezitadud naižiden eloradod .Täs-žo om tehtud vepsläine must külbet’ .
Muzejas radaba nügüd’aigaližed tehnologijad : om pandud tedomašinad , miččiden abul voib sada tedoid vepsän rahvahan kul’turan polhe , kundelta rahvahališt muzikad .Niiden abul voib eskai tedištada vepsläižiden küliden eläjiden polhe .Nene tedomašinad tuleba mel’he lapsile .Ved’ siš om vändoid , miččid muga navediba lapsed .Vätes hö saba tedoid vepsän rahvahan kul’turan polhe .Nügüdläižed tehnologijad abutaba kacta ekskursijad .Adivod voiba kundelta enččid pajoid , sanutesid vepsän kelel .
– Om-ki azjoid , miččid em voinugoi tehta , – sanub Natalia . – Muzejaha ei ole vedätud vezi . Nece om tärged erasile adivoile , sen polhe homaitas .Nece om meiden planoiš tulijaks aigaks .
Muzei om tehnus parembaks da kodikahembaks .Sen polhe sanuiba äjad adivod .Öpraznik lopihe noren rock-gruppan koncertal , miččen nimi om ”Samuel Silent ”.
Nügüdläine elo i endevanh kul’tur hüvin eläba ühtes i uz’ muzei todenzoitab sen .Natalia Anhimova sanub , miše pidab jatkta edemba-ki tradicii tehta nece praznik .I ku tö tahtoit kacta uzištadud muzejad , no päiväl ei ole aigad , ka tulgat muzejaha öl !
Läm’ vastuz Šoutjärven muzejas
вепсский
Младописьменный вепсский