Тексты

Вернуться к списку | редактировать | удалить | История изменений | ? Помощь

Rahvahan kul’tur vajehtajas mirus

Корпус: младописьменный подкорпус

Младописьменный вепсский, публицистические тексты

Источник: Maria Košeleva, Kodima. № 10, (2015), с. 5

Rahvahan kul’tur vajehtajas mirus
(вепсский)

Sügüz’kun lopus mäni jogavozne XVI Suomalaiž-Venälaine kul’turforum. Se om lujas tärged azjtego suomalaiž-ugrilaižen kul’turelon täht. Om znamasišt, miše necil vodel forum mäni meiden Petroskoi-lidnas. Kul’tur vajehtajas mirus” – mugoine tem oli forumal necil kerdal. Nece tem jonoštab gumanitarižiden sidoiden da kul’turan znamoičendad rahvazkeskeižiš kosketusiš da agjoiden kehitoituses. Kut i tobjimalaz foruman tegijoin oma Venäman kul’turan ministerstv da Suomen opendusen i kul’turan ministerstv.
Foruman pätegendan om parembzoitta da leta kul’turan znamoičendad kaks’poližiš kosketusiš da tugeta molembiden maiden alovehiden kehitoitust. Mugažo forum abutab loda pohjan satusekahan ühthižradon da ühteiččiden projektoiden tegendoiden täht.
Kut oli jo sanutud ülemba, forum mäni jo XVI kerdan da, voib sanuda, miše kaikuččen kerdan melentartuz neche azjtegoho kazvab. Sen vahvištoitusen om se, miše täl vodel foruman ühtnikoid oli läz 400.
Forum jagoihe kahthe palaha: kul’turine da azjaline. Azjaližehe palaha mülüiba erazvuiččed seminarad, ištundad da diskussijad, miččiden pätemad oli sidotud rahvazkeskeižehe ühthižradoho, kul’turan da turizman kehitoitusehe. Päazjan oli venälaižiden da suomalaižiden ühtnikoiden kaks’poližed paginad ühthižtös. diskutiruiba erazvuiččid kul’turküzundoid, miččed oli sidotud teatr- da muziktaideheze, istorijališt-kul’turižehe jäl’gestamižehe da ühthižradoho openduz- da tedoalovehes.
Ei sa jätta homaičemata kul’turišt foruman paladki. Ühtnikoiden täht oli tehtud sur’ da melentartuine kul’turprogramm. Heid varasti erazvuiččiden ozutelusiden prezentacii. Kaik nene ozutelused oma ühthižtön hüvä satuz Suomen da Venäman keskes. Mugažo adivod voiba oleskelda Kalakunda-festivalil, mitte oli tehtud foruman aigan. A sobatan, jäl’gmäižel foruman päiväl kaiken azjtegoiden jäl’ghe ühtnikad voiba sada ihastust Žizel’-baletas, mitte oli Muzikaližes teatras.
Om lujas hüvä, miše melentartuz mugoižehe azjtegoho, kut Suomalaiž-Venälaine kul’turforum, kazvab voziden sirttes. Ved’ nece azj om lujas tärged meiden maiden kul’turan kehitoitusen täht. Kul’turan lähtken om ristituiden tegend. Forum ühtenzoitab meid kaikid. Konz kehitoitaškandem kul’tursidod, sid’ kehitoittasoiš toižed-ki keskmaižed sidod. A nügüdläižel aigal om lujas tärged da tarbhašt tugeta kosketusid maiden keskes.