Тексты
Вернуться к списку | редактировать | удалить | Создать новый | История изменений | Статистика | ? Помощь
Maria Filatova. Pajokeraine – rahvahan fol’kloran festival’
Maria Filatova
Pajokeraine – rahvahan fol’kloran festival’
вепсский
Младописьменный вепсский
27. päiväl
uhokud Šoutjärv’-posadan školas jo koumanden kerdan oli tehtud Pajokeraine-festival’ .Nece om jogavozne sur’ praznik lapsiden , heiden kazvatajiden da opendajiden täht .Pičuižed lapsed da vanhembad ozutaba scenal ičeze mahtoid vepsläižes pajos da kargus .Täl vodel praznikale tuliba lapsed Kalagen da Šokšun posadoišpäi .
Uz’ festival’ – uz’ tem
Kaikuččel vodel praznikan täht valitas mitte-se tem , mitte koskeb vepsän rahvahan kul’turad da veroid .Männudel vodel lapsed ozutiba Vasilii Kononovan tehtud karguid , a täl vodel temaks oli valitud vepsläine besed .Tedaba-ik nügüdläižed lapsed , mi om enzne besed ?Voib olda , kellese starinoičiba besedoiden polhe baboid da dedoid .Erased lapsed tedištiba necen tradicijan polhe vaiše nügüd’ , Pajokeraine-praznikan taguiči .
Vepsläižed besedad
Besedoiden tradicii ei ole mugoine endevanh .Besedoid tehtihe küliš völ XX-voz’-sadal .Besedoitihe posadan erižes pertiš .Tobjimalaz sigä eli üksjäine baboi , ozutesikš , lesk .Hän-ki pästi norišton pert’he tehmaha besedoid .Neiččed vaumičiba pertin : abutiba emägale puhtastada sen , a prihad toiba haugoid .Besedad tehtihe tal’vesižil ehtoil .Niiš prihad da neiččed voiba tundištadas toine toiženke .Besedoil nored vändiba , kargaižiba , pajatiba pajoid .Miše ei rajata aigad tühjaze , neiččed otliba kerdale käziradod : hö kudoiba , ombliba , kezerziba .
Rahvahan tradicii – scenale !
Besedoiden čomad pajod , vändod , kadril’ , karg paikoidenke , käzitöd , eskai čudilkad – praznikan adivod kuti päzuiba endevanhaze aigaha i nägištiba noriden veslad vändod .Vanhembiden klassoiden openikad ozutiba todesižid besedoid .Pičuižed-ki lapsed ei jänugoi čurha .Hö ozutiba ičeze mahtoid pajos da kargus .Ende vanhembad sizared da velled erašti otliba lapsid kerdale , konz mäniba besedale .Sigä lapsed ei vändnugoi , ei kargaidanugoi .No hö kacuiba , kut vändaba vanhembad .
Pičuižed lapsed ozutaba mahtoid
Om lujas tärged , miše festival’ otab radho lapsid päivkodišpäi .Heiden täht se om sur’ praznik , vastusenpidäi azj .Šoutjärven päivkodin opendai Ol’ga Kokorina sanub : ”Üks’ prihaine om uz’ meiden kollektivas , ka hänel eskai kündled joksiba sil’mišpäi .Minä kaikuččel vodel ühtnen lapsidenke neche festivalihe .Ihastusenke kacun .Hengel om läm’ da ilo .Minä el’gendan , miše mugoižed azjtegod andaba ”rehkaidusen ” kaikile meile paksumba pagišta meiden lapsidenke ičemoi kelel ”.
Šokšun päivkodin opendai Irina Malkova : ”Meletan , miše meile pidab tehta mugoižid praznikoid .Ved’ lapsed tägä kuleba vepsän kel’t i el’gendaba , miše se ei ole vaiše kirjoiš .Sil voib pagišta , pajatada-ki ”.
Täl vodel festival’ mäni Minun kel’ – minun Kodima-projektan aigan .Pajokeraine jäti adivoile kaikid parahimid melid .Sen kaikutte ühtnik sai lahjan .Šoutjärven škol toivob , miše ”Pajokeraine ” linneb tulijal-ki vodel da eläškandeb völ pit’kha .
Pajokeraine – rahvahan fol’kloran festival’
вепсский
Младописьменный вепсский