Тексты
Вернуться к списку | редактировать | удалить | Создать новый | История изменений | Статистика | ? Помощь
Irina Sotnikova. Ei sa unohtada
Irina Sotnikova
Ei sa unohtada
вепсский
Младописьменный вепсский
Vägestusen
päiv !Nece om mušt Sures voinas , niiš , ken vojui i koli kaites meiden mad vihanikoišpäi .Nece om lujas sur’ praznik meiden mas .Necil päiväl kaikes mas mäneba paradad , mitingad , Bessmertnii polk-akcii , praznikkoncertad ...A minei tahtoiše jagadas ičemoi tundmusil siš , kut Vägestusen päiv mäni semendkun 9.päiväl Kalag’-küläs .
Päiv oli päipaštokaz , läm’ .Kului muzik .Rahvaz zavodi keratas školanno .Lapsed , aigvoččed , vanhad ristitud tuliba praznikale hüviš meliš .Heiden kädes oli il’mšaruid , änikoid , modkuvid .Tuli äi rahvast kanzoin .Kaik varastiba , konz-žo zavodiše Bessmertnijan polkan astund .
Kalagen školan pämez’ Svetlana Gotič tervehtoiti kaikid külän eläjid da adivoid , ozateli praznikanke .Hän sanui äi lämid sanoid .Niišpäi hengel tegihe völ lämemba .Pened lapsed lugiba runoid voinan polhe .
Jäl’ges zavodihe Bessmertnijan polkan astund .Edel mäniba openikad vanhembiš klassoišpäi i pidiba kädes transporant kirjutesenke ”Bessmertnii polk ”.Rahvaz mäni külän päirdoidme kul’turpertihessai , kus tobjimalaz kaikuččen voden tehtas miting .Bessmertnii polkakcii tehtas küläs jo toižen kerdan .I minä hoimaičin , miše necil vodel akcijaha ühtni enamba rahvast , mi muloi .
Ken-se astui modkuvanke vai fotonke , ken-se ilma sidä .Lapsed ülevas pidiba kädes ičeze pradedoiden da prababoiden kuvid .Asttes ristitud kosketihe toine toiženke , jagoihe ičeze kanzan istorijoil .Oli mel’he nähta joukus voinan lapsid da endišt min’orad , Anna Petrovna Gorbačovad .Om žal’ , no heid om jänu lujas vähä .I kaikuččen vodene tegese völ vähemba .
Mitingal Kalagen administracijan pämez’ Irina Zalivako pidi tervhensanoid .Jäl’ges openikad lugiba runoid da pajatiba pajoid .Änetomuden minutan jäl’ghe külänikad paniba saldatoiden kaumoile änikoid da änikvencoid .Konz miting lopihe , kaik tahtnikad mäniba kul’turpertihe , kus oli tehtud koncert .Voinan lapsiden täht praznik lopihe čajun jomižel .
Muite rahvahale praznik tuli mel’he .Ümbri oli pozitivine il’mišt .Oli mel’he nähta äi lapsid i norid .A vanhad ristitud ei olnugoi täuduližed praznikan organizacijal .No kacmata erasihe negativižihe mel’pidoihe , minei praznik toi hüväd mel’t .Tahtoin spasiboitta kaikid , ken ühtni praznikan tegemižehe .
Ei sa unohtada
вепсский
Младописьменный вепсский