Тексты
Вернуться к списку | редактировать | удалить | Создать новый | История изменений | Статистика | ? Помощь
Maria Košeleva. Eskai Amerikahasai sadihe!
Maria Košeleva
Eskai Amerikahasai sadihe!
вепсский
Младописьменный вепсский
Völ
školaspäi muštan , kut kaikuččen kerdan minai küzeltihe kus minä opendamoi da midä opendan .Vastusele : ”vepsän kel’t ” minei tuleskeli toine küzund : mikš ?Mikš sinei tarbiž nece vepsän kel’ ?Ved’ niken ei pagiže sil , kenenke sinä pagižeškanded ?Baboidenke ?I kus sinä radaškanded ?Kirjutaškanded ei tarbhaižed nikenele lapsiden runoid ?A minä vaiše muhazin heile vastha , ved’ tezin , miše tegen sidä , midä navedin .A nügüd’ nikenele ei ole peit , miše konz ristit tegeb sidä , midä navedib , kaik hänen elos om hüvä , hänen rad abutab hänele kaiken aigan .Muga mö , Karjalan igähižed rahvahad , päzuim Amerikaha .
Om mugoine Open world – programm , vepsäks se kuctas ”Avaitud mir ”.Nece om lujas vanh programm , mitte om tehtud Venäman da Amerikan ühthil vägil .Sen pätegendan om vahvištoitta kesknäižen el’gendusen da ühthižradon ülemba johtutadud maiden keskes .Necen azjan voib tehta adivoičetusiden abul : Amerikalaižed vasttaba ičelaze venälaižid ühthižradnikoid erazvuiččišpäi radon polišpäi , tundištoitaba kuctud adivoid ičeze kul’turanke , elon erigoičusidenke , tehleba erazvuiččid melentartuižid vastusid , miččed koskeba radod .Sen-žo aigan venälaižed adivod starinoičeba ičeze elon da radon azjoiden polhe .Sil tegese mugoine tarbhaižiden küzundoiden mahtištol da idejoiden vajehtuz poliden keskes .Lopus se programm andab ühtnikoile edahaižen professionaližen kazvon , azjaližiden da personaližiden kontaktoiden kehitoitusen , da uziden ühthižiden projektoiden tegemižen .
Nece programm tehtas äjiš poliš , i meil Karjalas se programm om tutab , sikš ku ühten sen polišpäi om Etnižed gruppad .Nece tem koskeb jogahišt ristitud , kudambale ei ole üks’kerdašt ičeze rahvahan elo-oza .Sen voden lopus meiden Periodika-paindišton radnikoile tuli pakičuz , miččen tarbiž oli täutta .Ezmäks minä iče en uskond sihe , meletin – kut mö , vepsläižed da karjalaižed , voim tulda Amerikaha ?Nacein , se om vaiše formaline azj , i nikut mö em voigoi päzuda sihe .Mäni pordon aigad , i meile tuli kirjeine , miše mö saim voimusen ühtneda projektaha .Paiči karjalaižid da vepsläižid matkaha tuliba setolaižed , vähäluguižed rahvahad Jakutsk-lidnaspäi , tataralaižed da udmurtilaižed .
Zavodihe meiden kaks’nedaline matk .Ezmäi mö ajoim Amerikan Vašington-pälidnaha .Sigä oli pol’toštpäiväline oficialine avaidusen pala .Mö vastsimoiš Open world-programman tegijoidenke , hö starinoičiba meile sen polhe , erazvuiččiden politikoidenke mänim Amerikan kongressaha , kus pagižim meiden ühthižiš problemoiš da politižes sauvondas .Meiden edes eziniba erazvuiččed ristitud melentartuižidenke ezitusidenke , miččed koskiba iče programmad da päazjan programman temad .
Jänuden nedalin mö elim Memfis-lidnas .Se lidn seižub Mississippi – jogen randal , Tennessee-štatas iče Amerikan keskuses .Sigä mö elim kanzoiš , miččed tegihe meiden täht voib sanuda ”toižikš ”.Hö abutiba meile kaikes da tegiba muga , miše mö rižižim ičtaze kuti kodiš .Nece nedal’ oli mugoižen täuden aztegoil , vastusil da matkoil , miše meiden täht se oli kuti kogonaine ku .Homendesespäi ehthasai mö kävuim erazvuiččihe azjoihe .Ned oliba oficialižed-ki vastused lidnan da agjan pämehidenke , i ekskursijad erazvuiččihe sijoihe zavot’t’es muzejoišpäi da loptes adivpertil .Mö mujim äi erazvuiččid rahvahaližid sömižid , kävuim kacmaha kaikid lidnan melentartuisijad , tundištimoiš opendamižen da tervhuden strukturanke da muite hüvin mänetim aigad .No kaikid tärktemb oli se , miše mö tegim kaik necidä sades satusen .Mö tundištimoiš Amerikan igähižidenke rahvahidenke , afroamerikalaižiden kul’turanke da oloidenke , tedištim midä tehtas sen täht , miše kaik rahvahad eläižiba kožmuses .
Völ tärktan azjan minun täht oli se , miše mugoižes lühüdas aigas mö tundištimoiš hüviden ristituidenke .Ristituidenke , kudambiden südäimed oma avonaižed , kudambad navediba ičeze kanzoid da ičeze adivoid , kudambad kaiken aigan voiba tulda abuhu .Nece lämuz’ kaičese meiden-ki südäimiš völ pit’kha .
Tuldes kodihe minä meletin , kut-žo om hüvä , miše om völ ühthine melentartuz’ ičeze da toižehe rahvahaze .Miše nece sur’ melentartuz’ voib mureta sildad eskai mugoižes jügedas aigas .Ei muite sanutas ”Löuda radon täht se , midä sinä navedid tehta , i sinei nikonz ei tariž linne rata ”, ved’ nece rad tob ristitule vaiše hüvän melen .
Eskai Amerikahasai sadihe!
вепсский
Младописьменный вепсский