Тексты
Вернуться к списку | редактировать | удалить | Создать новый | История изменений | Статистика | ? Помощь
Valentina Rogozina. Lapsiden kezaradod
Valentina Rogozina
Lapsiden kezaradod
вепсский
Младописьменный вепсский
Rahvaz
om eläb siloi , konz eläb hänen kel’ da verod , konz oma veroiden da kelen tedajad da muštajad .A mö tedam teidenke : om äi ristituid , kudambad navediba meiden kel’t , muštaba sidä i hüvin pagižeba sil .A völ pidab sanuda , oma hüväd nügüdläižed pajod vepsän kelel .I nece lujas ihastoitab südäint , miše kel’ eläškandeb pajoiš-ki .
Täs kirjuteses tahtoin starinoita lapsiden radon da aiganmänetandan polhe .
Ende ristitule keväz’ da keza toi äi radod : ištutand linmal , lehmiden vastustand , heinäntego .A lapsile , kudambid ei otnugoi heinäntegole oli anttud radod heiden vägedme : prihaižile – kalad sada , da podmaster’da , a neičukaižile – lapsid penid nän’koita , kanoid varjoita , da marjoid kerata .
Marjoiden keraduz om erazvuitte rad .Naku pidab äjid veroid muštta .Lujas navediba neičukaižed kävuda marjoihe .Vanhad mamšižed saneliba muga : ”Marjoihe kävuda , ei vaiše pajod pajatada , da suid voita , pidab kaikuččele marjaižele kumartas ”.Ei varainugoi lapsed kumartas marjaižile , ka marjaižid-ki oli lujas äi , kaikile täudui .
Vaumičesoi neičukaižed marjoihe , valičeba puzuižed , sidoba paikad agjaižil taganale pähä i tönduba mecha .Edel kaiked pätaba , kenen pertiš siriči pidab mända , miše kerata enamba marjoid , keda om paremba vastata , miše löuta enamba marjoid , kenes siriči pidab proitta peitoiči .Nene primetad lapsile oma tulnuded vanhembišpäi .
Kaik külänikad teziba , kel külän eläjišpäi om paha sil’m , kel om ”pagan ” kel’ , keda pidab varaita .Nene paginad hüvin teziba lapsed-ki i otliba meletusihe .
Miše vastatas hüvänke ristitunke , erašti lapsile pidi astta külän piduiči , a jäl’ges pörttas mectehudele .A muga-ki , tuled jo mecaröunale , a vastha putub ”kover ” ristit , pidab pihkudme mända edemba , miše ümbärta sidä .Midä ed tege hüvän sališton täht !
Lapsed uskoiba erazvuiččihe primetoihe i lähttes mecha neičukaižed tacliba tehudele puzuižid .Kut puzuine lankteb , mugoine satuz linneb-ki .Ozutesikš , puzuine lankteb ülähäks sul , marjoid tod kogonaižen puzuižen; lankteb puzuine bokale – marjoid pol’puzušt tod , a ku lankteb puzuine ükähäks pohjal – nimidä ed to .
Neiččed nagroiba lapsiš ümbri , no kaiken-se peitoiči tacliba puzuižid , muga noredki akad tehliba .Vändos kaiken tedištadihe ken ezmäine midäse tegeb .Puzutacindas om erazvuiččin – tägä kactas ken linneb jäl’gmäižen .Ottihe pit’k kalu i käzil taboiteldihe .Kelle ei täudund kalud , se linneb jäl’gmäižen .
Naku om jo tehtud arb , tactud puzuižed , valitud tehuded , vastatud hüvä ristit , ümbärtud ”pahasil’m ” ristit .No pidab völ ühten azjan tehta – sidoda paikad pähä muga , miše paikagjad oliba tagana .Nece tehtihe sen täht , miše mecas ei segoita .A tozi sanuda , miše gavedid da kägen täjad ei saižihe hibusihe .
Mecha asttes ei pida pagišta än’he da jokseta .Sen täht oliba rauhembad neiččed , kudambad nevoiba lapsile kuna astta .Tuldes tahoze neiččed käskiba lapsile edel söda marjoid , a jäl’ges ühtnägoi kerata .Konz vanhemb kucui kodihe , siloi keraduz lopihe , i kaik ühtes lähtliba kodihe .
Marjoid pidi kerata ahkerašti , ei sand röstta marjlehtid da heinoid , miše toižel kerdal voiži tulda möst keradamaha .
Konz lapsed lähtliba tehudele , paikad udes sidoiba pähä , paikagjad edehe , miše pigemba kodihe tulda .Konz marjoid oli keratud vähä , voili puzušt katta paikal .A konz marjoid oli keratud čuhuiženke , siloi pidi paikal sidoda , miše ei kirbotada marjoid .Konz vähä marjoid oli , siloi voili puzuižehe panda verest heinäd .Ende kanznikal oil äi lambhid , naku sömäks toskeliba .Erašti toskeliba kodihe haba -, lep -, raidda pihlbarboid lambhile .
Kaiken-se lapsil oli erazvuiččid radoid , sikš radonvaraidajid ristituid ei olend .Ei olend ažlakoid-ki lapsid .Mecaspäi asttes , keda vastsiba lapsed , sidä i lahoičiba marjoil .Vanhad ristitud otliba marjaižin , a ken marjašt-ki ei otand , muite , kuti suhu pani .Kaiken-se kitiba lapsid , toivotiba toižel kerdal enamba satust .A lapsile mel’he om , külänikad kitiba , da kodiš völ ehtal kanzanke marjoid maidonke söba .
Oli mugoitte primet : kactihe , mitte lehm ezmäižen tuleb paimnespäi .Ozutesikš , must lehm astub – homen mänem mustikaižehe , rusked lehm astub – mänem manzikaižehe .Necen täht neičukaižed joksiba lehmile vastha i küksiba sidä lehmäd , miččihe marjoihe tahtoiliba mända .
A neiččile se tarbiž-ki oli .Mi pigemba lehm tuleb , se pigemba lüpstas , a jäl’ges – gul’aimaha .
Lapsiden kezaradod
вепсский
Младописьменный вепсский