Тексты
Вернуться к списку | редактировать | удалить | Создать новый | История изменений | Статистика | ? Помощь
Valentina Rogozina. Veroiden Tedolang
Valentina Rogozina
Veroiden Tedolang
вепсский
Младописьменный вепсский
Jatktam
paginad Veroiden tedolang-rubrikas .Aigemba mö kirjutim vepsän rahvahan elon polhe , lapsiden sündündan da kazvatusen polhe , läžundoiden da lečindan polhe , kodi - da argradoiden da pühiden polhe .
Nügüd’ mö teidenke pagižem kül’betin polhe .Ei ole peitusen , miše kül’betil om ezmäine sija meiden elos .Tozi om , eläm mö fateroiš , kaik om kebnetud ristitun elos , kodiš voib pestas , ei tarbiž vet kandišta .Vaiše kaiken-se om mel’he kävuda kül’betihe , ištta palatil , henkta räkäl il’mal , hosta hibj vehotkal da lödas vastal .
Vot naku necen polhe mäneb meiden pagin .Enččes meiden paginas olem kitnuded koiv-vastad erazvuiččes elos .A nügüd’ kacum , mitte om vastan rad kül’betiš .
Ende ristitud pezihe kül’betiš joga sobatan .Nece oli erazvuitte rad .Kül’bet’ oli joga surel perehel , ei sand eläda kül’betita .Oliba üksjäižed akperehed , kudambil kül’betid ei olend .Nene perehed pakičihesoi pestas .Niken ei poištand , pästlihe kül’betihe .Vaiše pidi abutada vet toda , haugoid antta , da aigoidme kül’bet’ lämbitada .
Tobjimalaz kül’betin lämbiti vanh ak , kudamb vaiše radoi kodiš , tegi kodiradod .Konz tuleb pert’he nevestk , anop’ opendab händast lämbitamha kül’betid .Ei kacund sihe , miše joga neidišt kodiš opetas puhtastamha i lämbitamha kül’betid .
Lugetihe muga , miše joga kül’betiš eläb kül’bet’ižand emäganke da lapsidenke .Naku opetihe-ki udheze lämbitamha kül’bet’ .Kaikuiččel kül’betin lämbitajal oliba ičeze mahtod da ičeze pakičused .
Miše lämbitada kül’bet’ , pidab pakitas kül’bet’ižandal .Kaikil oma erazvuiččed peitused , no kaiken-se sanuteltihe muga : ”Kül’bet’ižandaine , kül’bet’emägaine , teiden lapsuded (teiden tataižed , mamaižed , dedaižed , babaižed ), pästkat mindai kül’betid lämbitamha , abutagat vaumita , pidägat küudug lämäs , kivuded hulas , skaml’ad da palat’ puhthas .Kükskat pagan hibjaspäi , holed hengespäi , lečkat da spravitagat , tervhut kovitagat ”.Risttihe koumehe čogaha i zavottihe puhtastada kül’betid .Edel kaiked ottihe vastoidut vastan (tošt ei sa otta ), kasttihe vedel i pühktihe lagen , seinäd , palatin , skaml’ad , lavan .Kandištihe vet katl’aha , avaitihe trub , pandihe haugoid küudugan alle i viritadihe toh’t .Miše kül’bet’ oliži räk pidab koume kerdad tacta haugoid lämoihe .
Konz vezi kehuškandeb da pariškandeb , siloi pidab vaumita kül’bet’ .Vaštakoho vedehe ligotadihe vast i pühktihe sil udheze lagen , palatin , skaml’ad , seinäd , lavan , kül’bet’edesen .Saubatihe trub , kül’bet’ oli vaumiž .
Naine , kudamb lämbitab kül’betin , andab necile radole pol’päiväd .Jäl’ges hän oigendab lapsid kucmaha kaik kül’betihe .Kaik tedaba , miše joga sobatan linneb kül’bet’ .Edel mäneb hoz’ain poigidenke da mužikad toižiš kanzoišpäi , kel ei olend kül’betid , a sid’ mäneba akad da lapsed .Kül’betihe kerazihe äi rahvast , pestas tarbiž oli heredas , miše kaik ehtižiba olda lämäs kül’betiš .Sid’ ei konz olend pagišta : mamad pezetiba lapsid , vanhembad lapsed iče pezisoiš da otiba sizarid da vellid kodihe .Jäl’ges nored akad pezetiba vanhoid baboid , a sid’ pezihe iče .Erašti küudugale taceltihe hulad vet , kudambaha oliba seižutadud kadag’-vai kuz’ -, vai hongvast .Nece parembzoiti kül’betin il’man , kebnenzoiti henkta .
Kül’betid oliba mustad , penenke iknaiženke , pezihe ehtoil , ka viritadihe lamplämoid .
Miše paremboita hibjan nahkad da kovizoita tervhut , pidab pestas ei vannas , a kävuda kül’betihe .Ostkat aptekas erazvuiččid void , ozutesikš , mätahein , kadag’ -, kuz’ -, hongvoid i sagat tervhut kül’betiš .Vaiše muštkat : edel kaiked pidab voita voil künambrusen kändmuz , miše tedištada , ei-ik ole allergijad .Om-ik kaik hüvin ?Varuta mängat kül’betihe !Muštkat , meiden babad da dedad oliba melekahad ristitud , sikš eliba-ki pit’kän igän .
Kebnäd teile löunud da kovad tervhut , kal’hed lugijad !
Veroiden Tedolang
вепсский
Младописьменный вепсский