Тексты
Вернуться к списку | редактировать | удалить | Создать новый | История изменений | Статистика | ? Помощь
Ol’ga Melentjeva. KniiguMelliččä tarjosi lukomista eri makuh ta eri ikäh
Ol’ga Melentjeva
KniiguMelliččä tarjosi lukomista eri makuh ta eri ikäh
карельский: собственно карельское наречие
Новописьменный севернокарельский
Vuuvven
2016 kirjauutukšista kerrottih KniiguMelliččäpivolla , mi piettih Petroskoissa 16.tuiskukuuta .
Karjalan Kanšallisušpolitiikan ministerijön ta Periodikakuštantamon yhtehini toimehpito , missä esitetäh šitä iellisenä vuotena julkaistuja kirjoja , on tullun hyväkši perintehekši .Viime vuuvvešta alkuan še on šuanun KniiguMelliččä-nimen .Tapahtuma herättäy yhä enemmän eri-ikäsien ihmisien kiinnoššušta .
Tällä kertua "KniiguMelliččä " oli järješšetty lehtitilaisušmuotosena ta pivon vierahilla oli mahollisuš paremmin tutuštuo kirjauutukših ta niijen luatijih ."Periodikan " eri lehtien toimittajat šekä tapahtuman vierahat esitettih kyšymykšie Kanšallisušpolitiikan ministerijön etuštajilla , kirjojen kirjuttajilla , toimittajilla , taiteilijilla šekä julkaisijilla .
Periodika-kuštantamo 2016 vuotena juhli 25-vuotispäivyäh .Juhlavuuvven aikana kuštantamo oli painan 25 uutta kirjua .Puolet niistä oli painettu valtijollisella tuvella ta toini puoli – erilaisien projektien puittehissa tahikka iče tiluajien varoilla .Kirjauutukšien joukošša on tietehellistä ta opaššuškirjallisutta , runoja , kiännökšie šekä lapšilla tarkotettuja kirjoja .Šuurin oša näistä kirjoista juatah ilmasiksi .
Karjalan Kanšallisušpolitiikan varaministerin Jelena Migunovan šanojen mukah , karjalan ta vepšän kielen oppikirjoilla ta opaššušainehistolla on šuurta kyšyntyä .Eryähien aikasempina vuosina julkaistujen oppikirjojen painokšešta on jiänyn vain monieš kappaleh ta eryähie ei ole enyä vovse .
– Šanakirjat ta oppikirjat ollah kyšytyimpie .
Ihmiset ollah valmehet makšamahki rahua näistä kirjoista , vaikka niitä juatah ilmasiksi , Jelena Migunova lisäsi .– Višših še on hyvä šyy ajatella uušintapainokšien julkaisomista ta , esimerkiksi , Periodikakuštantamo vois ottua šemmosen projektin tehtäväkšeh .
Vepšän kielen tutkijan Nina Zaitsevan mieleštä , karjalan ta vepšän kirjakielet ollah kehityšvaihiešša ta šanakirjoja näillä nuorilla kirjakielillä pitäis julkaissa rikenempäh .Oppikirjojen ta šanakirjojen valmistamistyö jatkuu , vuotena 2016 nähtih päivänvalon uuvvet karjalais-venäläini ta venäläis-karjalaini šanakirja livvin murtehella ta tänä vuotena on šuunnitelmissa julkaissa lisyä oppiainehistuo karjalan kielen opaštujilla .
Presentatijošša äijän kyšymykšie esitettih lapšien kirjojen luatijilla .Viime vuotena "Periodika " julkasi viisi lapšilla tarkotettuo kirjua karjalan , šuomen ta venäjän kielillä .Illan aikana oli noššettu vielä äijän muitaki mukavie teemoja : etnografisen ta folkloriainehiston keryämiseštä , piiplijatekstien kiäntämiseštä ta muuta ."Periodikua " on totuttu pitämäh kuštantamona , mi painau kirjoja enimmäkšeh Karjalan kantakanšojen kielillä ili karjalan , šuomen , vepšän ta venäjän kielillä , kuitenki viime vuotena kuštantamo oli leventän kielirajojah ta oli painan kirjoja komin , mansin šekä enklannin kielillä .
Presentatijošša esitetyt kirjat ollah kirjapainon puolešta hyvin korkieluatuset ta voijah anšijokkahašti esiintyö jokavuotiseh kirjakilpailuh ta kilpailla Vuuvven kirja -arvošta .
Illačun lopušša pivon ošallistujilla oli mahollisuš šuaha ilmasiksi uušie kirjoja .
KniiguMelliččä tarjosi lukomista eri makuh ta eri ikäh
карельский: собственно карельское наречие
Новописьменный севернокарельский