Тексты
Вернуться к списку | редактировать | удалить | Создать новый | История изменений | Статистика | ? Помощь
Ilmi Karhu. Hilluo keryämäššä
Ilmi Karhu
Hilluo keryämäššä
карельский: собственно карельское наречие
Новописьменный севернокарельский
Iltasin myö
istuma kiukualla ta miun tuatto Kirilä kerto meilä , omilla lapšillah , mitä hiän ruato pienenä olleššah .Nyt mielelläni muistelen niitä tuaton kertomukšija .
Eryähänä huomenekšena Iro-muamo läksi hilloh ta otti pojan kerallah .Kirilällä oli šiih aikah nellä vuotta .
Oli kirkaš huomeneš .Lämpimäšti paisto päivyä , linnut vičerrettih .
Muamo noššatti pojan .Hyö šyötih , pantih evähät pikkaraiseh tuohikesselih , otettih tuohiset ropehet , muamo šuuremman , a poika kopran kokosen .Pojan tuatto hyreyty nakruh ta virkko :
– Ottakkua puukko varalta , jošpa šitä tarviččou .
Poika vaštasi :
– Myö emmä mäne kalalla , kun hilloh šuolla .
Muamo kuiteski pani kesselih veičet ta hyö lähettih matkah .Molommilla jaloissa oli kippuran’okkaset piekšut .Pojan tuatto oli ne ommellun .
Šuo oli puolen virššan piäššä koista .Šinne vei kaitani meččätie .Harvoin vet šinne oli käyntie , vain hillon aikah .
Hyö tultih šuon laitah , heitettih kesseli tiellä .Muamo šito okšah valkien paikan , jotta rutompah löytyä tie .Hyö otettih ropehet ta lähettih šuolla .
Hilluo šai poimie šuorah šuon laijašta , ne oli melko šuurie ta mehövie , melkein kaikki keltasie , kypšie .Šejašša šattu vielä ei täyšin kypšie , rušappoja , niitä poika mielelläh pureškeli .
Hyö kerättih ahkerašti ta ruttoh aštiet oltih täyvet .Hyö tultih šuon laitah , nouštih tiellä , missä oli kesseli , ta ruvettih šyömäh .Šiitä hyö vähäsen leväheltih .Šyönnin jälkeh muamo kisko tuohta ta luati vielä kakši rovehta , ičelläh ta pojalla .Hiän luati niihi pankat koivun vičašta .Šiitä hyö tuaš lähettih hilluo poimimah .Hyö mäntih loitommakši šuolla , a šielä marjua niin kun ois valettu .Ropehet terväseh täytyttih .Hyö tuaš vietih ne kesselin luo .
Muamo jo ois ni kotih lähten , ka poika tahto kerätä lisyä , jotta ois mitä kertuo koissa .
Muamo tuaš kisko tuohta ta luati nellä rovehta .Hyö otettih matkahaš ne ta vähäsen eväštä .Enšimmäiset ropehet täytyttih poikkoseh .Hyö leväheltih mättähällä ta šyötih evähie .Poika oli kiinnoštun hillon poimentah , hiän otti viimesen ropehen ta šamašša alko kerätä .Muamo oli jo vaipun , ka kuitenki hiän nousi pistyh ta mäni pojalla jälkeh .Viimesie ropehie hyö kerättih pitemmälti , šentäh kun oli jo vaivuttu .
Poika täytti ropehen rutompah .Hiän keräsi vielä muamolla pari koprallista .Vaikka koprah šopi vain kakši hilluo , ka šeki oli apuo .
Šuolta molommat kannettih kakšin ropehellisin hilluo .Tiellä tultuoh hyö leväheltih ta šyötih loppuset evähät .
Poika tuškistu , mitein hyö viijäh hillot kotih , kun heilä on vain kakšin käsin , a hillorovehta on kahekšan .Muamo leikkasi koivušta nellä keppie ta kahekšan viččua .Hiän vuoli kepit šiliekši , molompih päih heitti pienet koukut .
Šiitä hyö kuoritettih hienot vičat ta lujah šivottih ropehet keppijen päih , niin jotta ne ei luiskahettais .Muamo nošti pienemmät niistä pojan olkapäillä .Keppijen alla hiän pani koivun lehtie , jotta ne ei painettais o l k a - päitä .Ropehet roikuttih keppijen päissä .Šiitä muamo nošti omat ropehet olkapäilläh .
Šiitä hyö kačahettih toisihis ta hyrähettih nakruh .Poika kummekši tätä , šentäh kun hiän enši kerran näki , mitein voit kantua nellä rovehta kerralla .
Ei hyö keritty pitälti aštuo , kun tuatto jo tuli heitä eččimäh .Tuatto otti kaikki hillot , muamolla kannettavakši jäi vain tyhjä kesseli .
Hilluo keryämäššä
карельский: собственно карельское наречие
Новописьменный севернокарельский
–
–