Тексты

Вернуться к списку | редактировать | удалить | История изменений | ? Помощь

Etnolager’ norištole

Корпус: младописьменный подкорпус

Младописьменный вепсский, публицистические тексты

Источник: Maria Filatova, Kodima. № 6, (2017), с. 4

Etnolager’ norištole
(вепсский)

Kaikuččen voden, kezakus Petroskoin universitet avaidab ičeze verajid školiden openikoile, kudambad opendaba suomen, karjalan da vepsän kelid. Midä lapsed voiba nägištada universitetas da miččid tedoid saškandeba?

Etnolager’muga nimitadas kezaližed kursad vanhembiden klassoiden openikoiden täht. Lagerin tegii om Petroskoin universitetan Baltian meren suomalaižiden keliden kafedr. Opendamhas lagerihe tuliba lapsed Karjalan erazvuiččiš agjoišpäi: Medvežjegorskan rajonaspäi, Kondopogaspäi, Vieljärvespäi, Kalevalaspäi, Änižröunaspäi da Petroskoišpäi. Täl vodel lager’ kerazi 25 last. Heiden keskes oma suvi- da pohjoižkarjalaižed, suomalaižed da vepsläižed.
Vepsläižes gruppas täl vodel openzihe nel’l’ neičukašt. tuliba Änižröunan vepsläižiš külišpäi: Kalagespäi, Šoutjärvespäi da Toižegespäi.
Openikoiden täht oli vaumitud melentartuine programm. Kaikutte päiv oli täuz’ erazvuiččid azjtegoid. Jogahižen päivän ezmäižes palas lapsed openzihe universitetas. Heiden täht tehtihe lekcijoid, miččid lugiba universitetan opendajad da Karjalan Tedokeskusen tedomehed. Lapsile starinoitihe Karjalan rahvahiden polhe, istorijas, kul’turas da literaturas. Mugažo lapsed kävuiba kel’urokoile. Niil lagerin openikad openziba kel’t da saiba tedoid ičeze rahvahan kul’turas. Täl vodel uroikoiden üthižtemaks oli valitud karjalan igähižiden rahvahiden tradicionaližed praznikad. Urokoil lapsed lugiba tekstoid praznikoiden polhe, paniba muštho uzid sanoid, tegiba harjoitusid da vändiba.
Openduzpalan ližaks lapsiden täht oli vaumitud erazvuiččed azjtegod, vändod da vastused. Lapsed kävuiba Petroskoin tegeližuden istorijan muzejaha, Petroskoin üläopišton tedomuzejaha, Karjalan rahvahaližehe muzejaha. Openikad oliba erzvuiččil mastar’-klassoil, vändiba Küükkä-karjalaižehe vändho, vastsihe universitetan üläopenikoidenke.
Etnolagerin jäl’gmäižel päiväl openikad ozutiba sadud tedoiden satust. vaumičiba todesižen praznikan, kus ezitiba toine toižile da opendajile pandud scenale starinoid endevanhas elos, ozutiba prezentacijoid da pirttud kuvid.
Kezaline etnolager’ om hüvä voimuz lapsiden täht nähta ičeze sil’mil Petroskoi-lidnad, sen elod, tedištada openduses universitetas. Se om hüvä azj openikoile, ved’ pigai lopiba školan i heile pidab valita tulijad professijad da opendusen sijad. Etnolagerin tegijad toivoba, miše etnolager’ abutab heile tehta oiktan elovaličusen.