Тексты
Вернуться к списку
| редактировать | удалить | Создать новый
| История изменений
| Статистика
| ? Помощь
Švecova Darja .
Suomalaižugrilaižiden rahvahiden bohatuz
Источник:
Kodima. № 6, 2017, с. 8
Švecova Darja
Suomalaižugrilaižiden rahvahiden bohatuz
вепсский
Младописьменный вепсский
Jogahižel rahvahal om erazvuitte i čudokaz kul’tur, verod i sädod.
Kaiken om melentartušt tedištada sen polhe i rindatada niid.
Nügüdläižes elos om tärged, miše erazvuiččed rahvahad voižiba kosketadas i vajehtadas mahtištol.
Minä meletan, miše mugoine voimuz ezmäi kaikid tarbiž olda norištol, sikš miše norišt om rahvahan toiv.
Tulijal aigal norišt voiži tehta midä-ni hüväd ičeze rahvahale.
Sen täht Marii El-valdkundas oli tehtud jo IV Rahvazkeskeine forum ”Suomalaiž-ugrilaižiden rahvahiden bohatuz”.
26-27.
päivil semendkud čomas Joškar-Olalidnaha kerazihe erazvuiččiden suomalaiž - ugrilaižiden rahvahiden ezitajad: vepsläižed, komi, mari, mordva i toižed.
Oli lujas melentartušt nähta heiden sädoid, kulda kelid i tedištada heiden veroid.
Minä i minun ühtengrupnik Šestak Anastasia olim Karjalan valdkundan ezitajin.
Foruman ezmäižel päiväl oli sur’, melentartuine programm.
Praznikaližen avaidusen jäl’ghe mö voim tedištada suomalaiž-ugrilaižiden rahvahiden vändoiden polhe i vätä niihe.
Se oli hüvä aig tundištadas kaikidenke.
Mugažo foruman ühtnikoil oli voimuz kacta čomaha, vihandaha Joškar-Ola-lidnaha.
Se om lujas läm’ i adivoičetai lidn melentartuiženke istorijanke.
Foruman toižel päiväl oli konferencii.
Oli tehtud ühesa sekcijad, ozutesikš, ”Etnografii”, ”Arheologii” i toižed.
Jogahižes sekcijas oliba ičeze vägestajad, kudambile anttihe kitändkirjaižed.
Lopus oli sur’ koncert, miččel oli ezitadud erazvuiččid suomalaižugrilaižiden rahvahiden karguid i pajoid.
Minä meletan, miše nece forum om lujas hüvä azjtego, miččel ristitud, erazvuiččiden rahvahiden ezitajad voiba tundištadas toine toiženke i tedištada midä-se ut i melentartušt.
Kosketused i tundištoitused, miččed sadas nor’ aigal, jäba kogonaižehe eloho.