Тексты
Вернуться к списку | редактировать | удалить | Создать новый | История изменений | Статистика | ? Помощь
Galina Baburova. Hüviš meliš oldes
Galina Baburova
Hüviš meliš oldes
вепсский
Младописьменный вепсский
Kezakun
lopus küläs čodokahan nimenke – Kindasovo vai , kut karjalaižed nimitaba sidä – Kindaz , mäni jogavozne jumoran da nagrandan praznik .Se udes kerazi adivoid susedkülišpäi da Petroskoišpäi .
Jumoran da nagrandan praznik Kindasovas om lujas popul’arine .Siš tedab läz kaikutte Karjalan eläi , muga-žo , kut starinoid-ki kindhalaižiš mužikoiš .Praznikale om 31 vot .Kaikuččel vodel sil om erazvuitte tem .Kezan keskes Präžan rajonan külähä , kus eskai päirdal seižub muštpacaz kindahale , tuleba ristitud iloitelemhas da muite lebaidamhas , samha ihastust londusen čomudes .Külä om tozi čoma .Johtutesed siš om kirjutadud vodel 1496.Se ei ole sur’ .Sigä ei ole Internetad , ei ole eskai laukad-ki .No oma küläs heredas joksii jogi , puhtaz il’m da hüvätabaižed ilosižed eläjad , kudambad surel tahtol varastaba da vasttaba adivoid Karjalan erazvuiččiš agjoišpäi .
Täl kerdal praznikan teman oli Kezaline Uz’ voz’ .Necil vodel läm’ keza kadoi kuna-se , ei tule meidennoks lämbitamha päiväižel .Praznikan tegijad meletiba , miše huba sä ei voi telustada ristituile iloiteldas kezaližen aigan , sikš pätiba olda kožmuses sänke da praznuita Ut Vot .Kaiktäna praznikal voinuiži vastata Pakaižukoid valencoiš da šortiš , lumineičukaižid kezaližiš platjoiš .Hö veiba haravodoid lapsidenke da aigvoččidenke da pajatiba uden voden pajoid .
Praznikaks oli kuctud Pakaižukod da lumineičukaižed Venaman erazvuiččiš agjoišpäi .Hö ozateliba Kindasovan külän eläjid da adivoid nagrandan praznikanke , vändiba erazvuiččil instrumentoil , pajatiba , kargaižiba , ken midä mahtoi .Pakaižukoiden käzišpäi Kindasovan arvostadud eläjad saiba lahjoid .Mugažo lahjoid voi sada kaikutte praznikan adiv .Jogahine praznikale tulnu ristit ühtni lotirejaha .Siš voi sada ilokahid lahjoid , uden voden atributoid , ozutesikš , paket mandarinoid vai bokaloid šampanskojen täht .
Edel praznikad Kindosovas Karjalaha tuli äi artistoid erazvuiččiš Venäman agjoišpäi .Kaik hö ühtniba Etnoforumaha , miččen avaiduz mäni Petroskoin Rahvahaližes teatras , a jatktand – Oloncas .Nene rahvahaližed kollektivad etnoforuman jäl’ge tuliba Kindasovan przanikale-ki da ihastoitiba ristituid ičeze ezitusil .
Paiči koncertad praznikal voi väta erazvuiččihe karjalaižihe vändoihe , ühtneda voibištelusihe da ostta sijaližil da külähä tulnuzil mastaril midä-ni muštoks .
Hüviš meliš oldes
вепсский
Младописьменный вепсский