Тексты
Вернуться к списку | редактировать | удалить | Создать новый | История изменений | Статистика | ? Помощь
Midä meile tob uz’ voz’?
Midä meile tob uz’ voz’?
вепсский
Младописьменный вепсский
Tulnu
2018.voz’ päivnouzman kalendarin mödhe om koiran voz’ .Nügüdläižes aigas paksus sanutas , miše koir om meiden hüvä abunik da sebranik , sikš toivodas , miše uz’ voz’ tob meile äi hüvid vestid , lahjoičeb ozakahid päivid da hüvid melid .Muga-ik meletaba vepsläižed ?Mitte sija oli koiral rahvahan enččes elos ?
Endevanhas aigaspäi vepsläižed pidiba koirid .Ned oliba hüväd varjoičijad da abunikad mectuses .Mugažo usktihe , miše koir vedäb , kaimdab kolijoid mehid toižehe miruhu .Miše tedištada , om-ik koir hüvä mecnik vai ei ole , vepsläižed kacuiba koiran suhu da kodviba hambhid .Mugažo kactihe , heredasik ole koir voib löuta oiktan ten .Pagištihe , miše koirale ei sa tulda pert’he , ika hän ei voiškande mecata .
Suvivepsläižed sanuba : ”Koiran näged uniš – drugaks : amuižeks ili udeks ”.Neciš verospäi voib meletada , miše nügüd’ rahvahan meles koir om hüvä ristitun sebranik .No muga oli ei kaiken aigan .Ende usktihe , miše koir ei ole ”puhtaz ” živat .Se voib toda ristitule kibud , läžundoid .Sil-žo aigal usktihe , miše koir voib tervehtoitta-ki läžujid .
Vepsän keles om äi kibuiden nimitesid , miččiš om koir-sana .Ozutesikš , koiran vaivhuz’ (vällüz’ ), koiranlap (täintannaz ), koiranniža (sarakoda ).Sanutihe , miše nene kibud tartuba ristituhu koiran taguiči .Erašti puhegiš koiral pakitas otta kibud tagaze : ”Ota ičeiž vaivhuz tagaze !”
Usktihe , miše ei sa abidoitta koirad , ika se voib aznoita da toda kibun .Ozutesikš , sanutihe ”Näritad koiran , ka koirannižan tegeb .Naižele kohtunke ei sa potktaita koirad , lapsennoks tuleb koiranvaivhuz ”.
Sil-žo aigal usktihe , miše koir voib abutada ristitule tervehtoittas kibuspäi .Ozutesikš , koranlapan lečtihe muga : pašttihe leibän , kosketadihe sil kibedad sijad hibjas , a jäl’ges anttihe sömha nece leib koirale .
Usktihe , miše koir voib sidotas ”toižehe ” miruhu .Sünduman aigan pohjoižvepsläižed neiččed arboiba : kuspäi kului koiran nutand , siš polespäi tuleb ženih .Neiččed otliba lunt , paniba sidä letkehe , pudišteliba sidä da saneliba : ”Pohtan , pohtan lumen , pohtan vouktan lumen , kus koir nutab , sigä minun bohosuženoi eläb ”.
Sanutihe , miše hüvä znam om , ku koir jokseb vastha ristitule , kudamb astub külähä .Koiran nutand , vastkarin , znamoiči midä-se pahad .Oli vero : ”Koir ulaidab – ei hüväks ”.
Koiran abul endustadihe säd : ”Koir kaivase mas – vihmaks , kaivase lumes – uhoks ”.
Voib tehta ühthevedon , miše koir vepsläižiden meles oli kaks’poližen živatan : sil oli hüvid pirdoid , se lugetihe abunikaks da sebranikaks , toižes polespäi koir voi toda pahoid azjoid , läžundoid ristitule .Nügüd’ - ki mö navedim koirid , ned lahjoičeba hüvid melid , lämbitaba henged .No sil-žo aigal tedam , miše eskai pen’ koir voib kibedas hambastada .Toivom , miše tulii koiran voz’ ei ”pure ”, a tob meile vaiše ozakahid päivid da hüvid azjoid !
Midä meile tob uz’ voz’?
вепсский
Младописьменный вепсский