Тексты
Вернуться к списку | редактировать | удалить | Создать новый | История изменений | Статистика | ? Помощь
Valentina Libertsova. Kyläs talvipruazniekoin aigah sežo ei muata
Valentina Libertsova
Kyläs talvipruazniekoin aigah sežo ei muata
карельский: ливвиковское наречие
Новописьменный ливвиковский
Lopul
tuhukuudu valdivo da Jumal annettih ristittyzile nelli huogavopäiviä Ižänmuan puolistajien päivän hyväkse , kudai ugodih yhteh aigah Maidopyhälaskunke .
Alavozen Kul’tuurutalois pruazniekkupivot zavodittihes jo tossargen , 22.tuhukuudu : jälles murginua piettih brihaččuloin keskes Ritsariloin turnieru .Se muga miellytti ozanottajien vahnembii , ga hyö jo ehtäl kirjutettih Internettah kiitändysanat .
Myöhembi illal liygiläzet kerävyttih varustumah Karjalan tazavallan päiväh , kudai tänävuon pietäh meijän Anukses .Vai tulin kodih , minägi hakkain sinne : oli himo nähtä omii Alavozen taigin -teatran artistoi , tiijustua midä hyö uuttu hommattih .Kyläs avavuttih karjalan kielen kursit , kursuniekoile toin ”Karjalan sanomien ” da Oma mua -lehten toimituksen opastundah annetut lahjat .Erähät kaunehet kukki-kalenduarazet da ”Kipinän ” kniigansivunmerkit käskin jagua Uvvet tuulet -volont’ourujoukon lapsile .Ylen äijäl ičegi miellyin niih painavoloih , ku vuozikalenduaran rinnal on kirjutettu kaikis tärgevimien valdivollizien da uskondollizien pruazniekoin nimet livvikse – anna vai lapset net lugietah da pannah mustoh .
Mieleh oli 24.tuhukuudu pietty armrestling-kilbu .Neče jygieh sanottau vieraskieline sana merkiččöy uuttu sportulajii , kudai yhtelläh jo opitah kirjuttua Olimpiiskoih programmah .Kilbah kerävyi läs puoldutostu kymmendy nuordu dai vahnembua da vie enämbi kahtukymmendy kannattajua .Kilbailtih nelläs igäjoukos : nuorembas 11-13 -vuodehizien keskes voitti Van’a Isakov , miehien keskes – Denis Nikiforov , a 14-18 -vuodehistu tuli äijy , pidi jagua kahteh joukkoh , kudamis voittajannu roittih Jegor Mattarainen da Ilja Markov .
Tiettäväine , kaikin vuotettih Maidopyhälaskun pruazniekkua , ku se jo äijän vuottu on meijän kyläs perindölline ihalmo .Huondekses kačahtelimmokseh taivahah , ga päiväine pahakse mieldy kunnelienne peityi sagieloin pilvien tuakse , siä buuristui , nouzi ylen vilu tuuli .Rahvastu yksikai kerävyi kudakui .Nelli kivoksih pystettyy Maidopyhälaskun kaunistu kuvua da suarnuelättilöikse sellinnyöt vastattih lapsii da vahnembii Prihodan koin rinnal .Iče Boris-tuatto ei puuttunuh pruazniekan alguh , ku vastai tävvet mašinat pyhilekävyjii .Ga hänen nuoret abuniekat ei laškisteltuhes : kanneltih suurii hiilavii samvuaroi da täyzii čupukku - da piiraijuodii Prihodan koispäi .Oppie magiedu sai kaikil .
Kul’tuurutaloin ruadajat Tatjana Ivanova da Irina Palatina varustettih kaikenjyttymiä kižua : kukkiloin torat , nuorua myöte sivottuloin silmienke astundu , lumikiäkkylöin loukkoloih lykindät , talvifutbol , pediälpäi kengii tabuandu – en kaikkii ni ehtinyh novvittua da kuvata , ku pidi tabailla omua bunukkua lumimägilöin keskes da paista tuttavienke .Jälles pihal telmändiä , tiettäväine , kaikil oli mieleh kävvä kylyh .A myöhäzel ehtäl rubei tuuččuamah – karjua , kebjiedy , čomua lumitiähtie !Ei sudre sanota : talvi helpol keviädy ei laske , vie oppiu jatkua omua valdua !
Tossupiän pruazniekan piendykohtas vallotti vidi polvessah – vikse , kaiken yön pani lundu .Ga taivas jo oli puhtahembi , puuloin kuvat lumel vähästy sinizembät , päiväzen kosketuksis kuului lämmin , erähien kodiloin räystähis muga helieh tipui , a ehtäl riädylöih riputtih jiäpuikot – kevät , työndäy omii merkiviestilöi da suau uskuo , se on lähäl .
Anukselazen pajojoukon konsertu piettih pyhänpiän 26.tuhukuudu .Naizet pajatettih yhtes dai yksinäh , kiitettih da igävöittih omua muadu , rakkahustu , nuordu aigua , elaigua .Iänet inehmizil kaunehet , mielet tuttavat , oli midä mustella da kuunnella .
Uppuou kivoksih Alavoine , kui kai pienet dai suuret hierut da kylät , ga ei azetu elaigu , ei uinota rahvas , maltetah ruadua dai huogavuo .
Kyläs talvipruazniekoin aigah sežo ei muata
карельский: ливвиковское наречие
Новописьменный ливвиковский