Тексты
Вернуться к списку | редактировать | удалить | Создать новый | История изменений | Статистика | ? Помощь
Natalja Gromova. Kus puu kazvau, sit i kando happanou
Natalja Gromova
Kus puu kazvau, sit i kando happanou
карельский: ливвиковское наречие
Новописьменный ливвиковский
On
Anuksen čupul Kotkatjärven rannal Tepoiniemi-kylä .Konzulienne eli sie läs 100 hengie , oli 16 taloidu .Nygöi Tepoiniemen nimine piha on Kotkatjärven kyläs , sie jäi kolme vahnua kodii da kaksi kandueläjiä .Konzulienne sie oli Vorošilovan nimine kolhozu , sinne rodivui Nevvostoliiton kunnivomies voinu-urhoi Ivan Artamonov .Oli sie kulakoikse kirjutettuu da loitokse työttyy , oligi repressiiruittuu .Tulluzii vakkinazii rahvahii vastattih varaten , ga yksikai gostitettih .Buabo saneli minule , ku voinan aigua tuli kyläh saldattu , händy istutettih stolah čupukkua syömäh .Stolan keskel oli juodu voinke , saldattu voidu luzikal ottau .Ga eihäi muga pidäs syvvä , pidäy čupukkua voih painua , a kuibo sellittiä ?Ei tietty koin ižändät ven’an kieldy , a saldattu ei maltanuh karjalakse .Vot i sellitettih , kui maltettih – luzikal oččah iškiettih : “Luzikku on loppiettu .Pidäy plöčky !”
Tepoiniemi on minun eziižien roindukylä , sie ammuzis aijois elettih ezi-ižät .Täl kohtal on erinomaine vägi da omat starinat .Tepoiniemen vastaspäi on kumman Niemi .Se on čoma kohtu , ga sil on paha sluavu .Ei pie sinne mennä , sie henget eletäh .Juuri sie , starinoin mugah , nouzou viespäi kotkatjärveläine vedehine , sendäh kyläs oli kielletty hämäris kezoinkylvendy .Konzulienne minägi opin sen kohtan voimua .Sie kazvau äijy gribua .Myö sizärenke astuimmo Niemen mečäspäi järvirandua myöte .Jo nägyi lahtes poikki buaban kodi , astuo jäi pikoi palaine .Ga kuilienne myö sizären kel ugodiimmokseh samah kohtah !Tuaste nägyy buaban kodi , menemmö sinnepäi da uvvessah milienne kiännyttäy meidy .Muga oli moni kerdua , kuni myö emmo kiändänyh sobii muurin .
Kerran minä vein omua tytärdy da sizären lapsii Iivananpäivän yöl Niemeh štanajallan kukkua eččimäh .Enzimäi myö kylvimmö kezoidu , sit hypimmö robl’os piäliči , sit lähtimmö matkah .Troppaine , kuduadu myöte tavan mugah oli kebjei astuo , täl kerdua oli rounoku umbi kazvoitunnuh .Nikui ei laskiettas meidy henget !Nagra libo älä , ga sinä yön minä rubein kuččumah abuh Hiisie .Rinnal ugodittihes kalastajat venehes .Pidi nähtä , kui terväh net kopattih airot da ruvettih soudamah !Agju se on koskematoi , tarinua sih nähte on äijy , sendäh kalastajile vikse ozuttihesgi minun iäni kauhiekse .
Kohtu se on ylen čoma .Lapsennu olles minä ylen äijäl suvaičin illoil nosta suureh tuomeh , kudai oli koin rinnal , da loitokse vien piäl kaččojes pajatin .Ozuttihes , ku minuu kuunneltih meččy , taivas da kai vedehine heitti čomien tukkien suvindan .Tozi on , ku luondo linnunpoigazen puuh vedäy : meijän rovus oli äijy “linnunsugunimie ” – Jastrebovat , Vorobjovat , Sorokinat , Kräkkijevat .
Kyläs rahvas elettih sobuh , ga toiči tabua ozutettih .Kummu oli toiči kaččuo , kui buabat riijeltih keskenäh keskikyliä ozuttajen toine toizele kokoidu da helmoi nostajen .Alevuttuu kudaitahto heis pani samvuaran kiehumah da kučui toizen gostih .Enzimäi vaikkani , a sit vikkelembäh hyö paistih , juodih čuajuu da nagrajen musteltih omua riidua .Eliä heil oli jygei , ga naizet oldih lujatabazet .Minun buabo , Tatjana Jastrebova , 33-vuodehizennu jäi leskekse viijen lapsenke .Buabo yksinäh kazvatti lapsii , kävyi ongele da sai kalua viršilöin luguh , jälles voinua ruadoi paimoinnu .Paimenis olles hyö mendihgi yhteh Pekka Vorobjovanke , kudai suvaičči händy lapsusaijas .Peša-died’oi čomasti soitti pillil Tan’oih niškoi , a rinnal olijoin kylien eläjät kuunneltih nämmii karjalazii serenuadoi .Buabo da died’oi suvaittih toine tostu surmah suate .
Kylän simvolannu on kuuzi , kudai seizoi mäil kylän allus .Äijy sugupolvie nouzi täh kuuzeh .Enne täl mäil oli äijy piäsköin peziä .Nygöi linnut lennettih iäres , lapset kazvettih , a kuuzen mennyt kezän kuadoi tuuli .Kus puu kazvau , sit i kando happanou !Minul mieli käsköy sinne joga vuottu pagizemah vellenke , tervehtimäh järvie , suamah voimua da huogaittamah hengie .Armahat buaboit – minun buabo , Nikitinan Ol’oi , Anisimovan Šan’oi , Matvejevan Nast’oi da Aksinču , kumardus muassah teile sit , ku opastitto minuu suvaimah elostu da omua muadu .Heis minä opastuin , ku pidäy olla hyväs mieles da ei pie n’upsistuo .
Kus puu kazvau, sit i kando happanou
карельский: ливвиковское наречие
Новописьменный ливвиковский