Тексты
Вернуться к списку | редактировать | удалить | Создать новый | История изменений | Статистика | ? Помощь
Televiizorattah
Televiizorattah
карельский: ливвиковское наречие
Новописьменный ливвиковский
(Lyhendetty
)
Fiiziekan tiijon kandiduattu , plieššipiä Ivanov ajoi mašinal meččäh gribah oman akan da apin kel da yöksyi sinne . Akku da akan tuattah annettih iändy da valomerkii meččyrannal seizojas mašinas , ga ihan sudre .Hädätilah joudunuzien eččijät hierun eläjien kel käveltih meččiä myö , ečittih hävinnytty , ammuttih pistolietois , työttih taivahah rakiettoi , ga sudre , Ivanov umbilinnalaine mies hävii tiedämättömih ...Mies monii suutkii käveli koskemattomua meččiä myö – söi ruohkua gribua , muigiedu muarjua , oriehua .Käveli čurah-toizeh , ga nikus ni troppua , ni dorogua .Allus mustoitteli puus kazvajua sammaldu , Pohjazen tiähtie , Päivästy , čuassuloi , a sit ielleh vai astui da astui .Yölöil häi nouzetteli puuloih da sie nukahtelih havaččujen da varavos särizi mečän šihizendiä da meččylinduloin iänii kuultuu .
Jälgimäi hänel lykysti : löydyi mečästäjien perti , mökkine , sie oli päčči , löydyi syömisty , suolua da spičkua .Nygöi mies hengähtih hyväl mielel , ku nygöi ei kuole nälgäh da viluh .Mies terväzeh huogavui , söihes da rauhoitui .No kunne mennä da kui piästä korvespäi häi ei tiedänyh da piätti vuottua .Meččyahol häi keräi kuivua oksua da lad’d’ai net SOS-muodozih rohjoloih , a oksien piäle pani nezeviä heiniä savukse da rubei vuottamah .Enzimäi häi mielevyi omah oloh da kuvaili iččiedäh nygyaigazekse Robinzonakse .Kuundeli linduzien pajoloi , päivityi ahol , ongitti kalua ojas .Aijan mendyy sydämes kazvoi tusku da häi ellendi , ku hänel ebätoivozesti ei tävvy monii vehkehii , kuduat oldih linnas eläjes : koufeidu , ws-bumuagua , internettua , mašinoin hälyy pihal , kai yölöin iänien vingundua , sähkyö , gaziettoi .Ruadopaikan murginan väliaigoi .Susieduozaston Innua .Ei tävvy mučoidu .No kaikis enin hänele ei tävvy televiizorua , sie ezittyjii artistoi da heijän ezityksii ...Päivän valgies aigu meni vie kuda-kui , no kos vai päiväine laskih puuladvoin alemba da hänen pertin katoi mustu miäriä-mätöi suuri pimevys – sit jo ei täydynyh vahatuohuksen valopilkuu .Yölöil mies puolipimies rubei eččimäh ohjavonäppäilyy (pul’tua ), mustelemah kunne sen oli syvännyh , ga sidä ei löydynyh , ei olluh ni pul’tua , nigo televiizorua havačundan jälles .Sehäi oli tusku , muokkavo .Yön tulles häi ei löydänyh kunne iččie panna , midä ruadua ?Ajatukset , kudamat ei oldu täytetty Regina Dubovitskoil da Šifrinal nostettih hänen sydämeh moizii kyzymyksii , kuduat nikui ei rauhoitettu syväindy , ei annettu hänele pokojua .A ajatukset net ei olla kui televiizoru – niilöi ei sua loppie , katkata pul’tan knopkua painajen ...
Jälgimäi Ivanov ellendi mittuine oigei oli hänen linnan elos , häi ellendi , ku sudre čakatah meijän televiidiniedy , sehäi pellastau meidy uravundas , pellastau kaikes piättämättömäs da tsivilizatsiele varattavas kyzymykses : mis on eloksen syväindö ?
Miehele ainos vai rodih pahembi da pahembi – unettomus , valehnägy , korondu ...
Händy löyttih puolentostu kuun peräs .Mies kazvavui pitkil tukil , laihtui , sovat revittih , ga rungači mies oli ihan terveh , midä ei suannuh sanuo mielialan puoles .Häi ei tunnustanuh lähäzii , itki , blaži , pagizi ičekseh , riiftoilih kunnelienne .Vračat da pellastajat nikui ei voidu ellendiä , mindäh ristikanzu on liikkunuh mielis , ku hänel oldih kai mahtot jiähä hengih ?Midä ruadua – miesty pandih mielivoimattomien hoidolaitokseh .Händy pestih , lyhendettih tukat , sellitettih bol’niččusobih da ruvettih lieččimäh .Enzi ehtän mies tuli yhtenäzeh suureh pertih , istuihes televiizoran edeh da rauhoitui .Häi kačoi kai pereduačat peräkkäi da muheloitti , häi oli rajattomasti ozavu .
“Televiizorattah ” on otettu Sever-zurnualaspäi n :t 11-12 (2016).
Televiizorattah
карельский: ливвиковское наречие
Новописьменный ливвиковский