Тексты
Вернуться к списку | редактировать | удалить | Создать новый | История изменений | Статистика | ? Помощь
Katiska
Katiska
карельский: собственно карельское наречие
Новописьменный севернокарельский
Liida-täti täytti
80 vuotta ta vesseläšti juhli omua vuotispäivyäh .Hänen šopusa luonto , yštävällisyš ta kostitušnero ollah harvinaisie luonnon merkkijä melko vakavaluontosien ta vähäpakinaisien karjalaisien kešen .
Liidan potruška Al’atäti niise on karjalaini , kuutta vuotta vanhempi .Kaverin merkkipäivällä hiän laulo kakši romanssie .Potruškat ei valiteta pahanvointie eikä tautija , eikä moitita nuorisuo .Hyö ollah hyvällä mielin ta heijän šilmätki loissetah .Toičči hyö muissellah , mitä mukavua tapahtu heijän kera nuorina ollešša .Ka šeikkailuja riittäy vielä tänäpiänäki .
Ei niin ammuin Liida hommasi ičelläh katiskan ta nyt hiän iče pyytäy kalua šen avulla .Rantah on viisitoista metrie .Nousi kapulašilloilla , vejälti katiskan nuorašta , puissalti kalat ta vinnasi pyyvvykšen jälelläh veteh .
Viime kešänä tapahtu šemmoni juttu šen katiskan kera .Liida-täti läksi tarkistamah omua pyyvvyštä ta Al’a-täti hänen peräh , auttamah .Al’an molommissa käsissä oltih kepit , šentäh kun ilman niitä hiän pahoin pisyy jaloillah .
Liida voimallah veti nuorašta .Katiska oli šuuri ta veny šyvällä joven pohjašša .Višših pyyvvykšeh puuttu kalua , še ei ollun tyhjä .Ka nuora äkkie katkesi , tottaš še happani .Liida-täti niin ni pačkahti veteh šelin päin .Juuri ei läkäštyn !Joven virta läksi jo viemäh häntä , a Liida ei miteinkänä voinun kiäntyö vačallah .Ei enyä tunne pohjuakana jalkojen alla .
– Vuota , Liidasen , mie heti šilma autan , karju Al’a-täti .
Hiän rupesi ojentamah Liidalla keppie , ka ičeki tipahti veteh ta tarttu upottajah pohjah .
Al’a yritti ojentua kepin potruškalla , ka mitä šie !Ei ni omie jalkoja jakša liikuttua .Onnekši Liida iče kiänty maral’l’ah , piäsi rantah ta potruškanki veti veještä .Ei ole kaloššija jaloissa eikä katiskua .Hyvä , kun ei hukuttu .Aššutah märät ta likaset naiset portahien luo ta nakretah .A katiskan šiitä paikallini mušikka veti rantah .
Katiska
карельский: собственно карельское наречие
Новописьменный севернокарельский