Тексты
Вернуться к списку | редактировать | удалить | Создать новый | История изменений | Статистика | ? Помощь
Önik
Önik
вепсский
Младописьменный вепсский
Karjalaine
sarn
Ühtes pertiš eliba lujas ažlakahad ižand da emäg .Kerdan hijale tuli saldat i pakičihe ödumaha .Ižand da emäg otkažihe hänele .Saldat hödhüvin käveli külädme sinna-tänna i möst tuli neche pertihe .Nägišti ižandad pert’irdal .
– Äi om teid , önikoid , – sanui ižand , – vaiše üks’ saldat tuleskeli pakičemha ödumaha , a nügüd’ toine-ki tuli . Mö em pästkoi ödumaha nikeda !
A saldat oli melekaz i heitihe kurdeheks ristituks da sanub :
– Spasib , spasib !– i mäni pertin südäimehe .
Kumarzihe emägale :
– Emäg , mindai ižand pästi ödumaha , naku minä tulin-ki .
– Em pästkoi mö önikoid , – sanub emäg .
– Spasib , spasib ! – sanub vastha saldat .
Tuli ižand pert’he , a emäg küzub hänel :
– Sinä mikš pästid necidä önikad ?
– Minä en pästand händast , – sanub ižand . – Minä otkažin hänele , ka hän , nacein , om kurdeh , ei el’gendand , midä minä sanuin . Konz ištumoiš ehtlongile , ala kucu händast stolan taga .
– Ei , ei ! Sinä-ki ala zavodi pagišta hänenke .
Emäg kerazi stolale , i hö vaikti ištuihe ehtlongičemha .A saltad ištub laučal , kacub heiden polhe .Ižand unohti , miš hö akanke pagižiba , kändihe saldatan polhe i küzub :
– Sinä kus oled sündunu , saldat ?
– Spasib , spasib , – sanub saldat i heredas ištuse stolan taga .
Ehtlongin jäl’ges ižand sanub akale :
– Homendesel minä aigoiš lähten mecha , a sinä pašta kürzid , kuni saldat völ magadab .A konz hän heraštub da sädase lähtta , ala unohta otta hänelpäi den’goid ösijas .A saldat kuleb necidä paginad i meletab ičeksaze : ”Mindai et manitagoi !”.
Homendesel ižand nouzi aigoiš , söi kürzid i läksi mecha .Emäg jäi paštmaha kürzid .A saldat peitos kacub hänehe .Konz emäg paštoi äi kürzid , hän libui , sobihe , oti ičeze šaugun , kuti sädihe lähtta .Emäg pani rehtilän päčedesehe i tabazi saldatad hardjas :
– Anda dengoid ösijas !
– Spasib , spasib , emägaine ! – sanub saldat i ištuse sömha kürzid .
Söi saldat kaik kürzad i sanub :
– Spasib , spasib !
Iče ištuihe laučale i meletab : ”Paštkaha völ kürzid ”.
Emäg paštoi , a saldat kuni möst sädihe lähtta .Oti ičeze šaugun i sanub :
– Spasib sinei , emägaine , adivoičetamižes da ösijas .
A emäg sanub vastha :
– Magazid da söid külläks , nügüd’ maksa dengoid !
– Midä ? Minei kerdale kürzid otta ?Spasib , spasib , hüvätabaine emägaine , – sanui saldat , oti kürzid i läksi .
Ehtal tuli kodihe ižand , emäg sanub-ki hänele :
– Nu mitte önik om !Söi , joi , magazi , a dengoid ei maksand , ka völ kaik kürzad kerdale oti .Em pästkoi enamba nikeda ödumaha .
Önik
вепсский
Младописьменный вепсский
–
–
–
–
–
–
–
–
–
–