Тексты
Вернуться к списку
| редактировать | удалить | Создать новый
| Статистика
| ? Помощь
Pajo abutab eläda
Источник:
Pagištoiti Irina Mironova, Kodima. № 7, 2018, с. 4
Pajo abutab eläda
вепсский
Младописьменный вепсский
Amuižiš aigoišpäi Kalages kaitas vepsläižid tradicijoid, kel’t, kul’turad. Nügüd’ sigä om ičeze ”Pihleine”- fol’klorkollektiv, kudamb ihastoitab eläjid ičeze pajoil, ühtneb erazvuiččihe külän azjtegoihe, praznikoihe. Kacmata sihe, miše se om sündnu ei muga amu, sidä jo kuctas ezinemaha praznikoile äjihe toižihe külihe.”Kalarand”-praznikan aigan üks’ ”Pihleine”- pajokollektivan ühtnikoišpäi Ol’ga Anatoljevna Lukijanova starinoiči minei, kut om sündnu nece čoma kollektiv.
– Kuspäi tuli idei tehta kollektiv i kut kaik zavodihe?
– Kaikuččen voden školas praznuitas Rauhan ristitun päivad. Mö naižidenke kaiken keradamoiš necile praznikale i pajatam pajoid. Necil-ki kerdal mö tulim praznikale. Kalagen administracijan pämehele Natalia Jevgenjevna Silakovale lujas tuli mel’he, kut mö pajatam. Hän tariči minei tehta kollektiv. Minä zvonin naižile i kucuin heid pajatamha. Muga zavodim keratas repeticijoile.
– Äjak mest om teiden kollektivas i ken mülüb sihe?
– Ezmäi meid oli viž mest. Nügüd’ om kahesa mest ühtes bajanistanke. Sergei Aleksandrovič Ul’bakov tuleb mijale Šoutjärvespäi. Hän hüviš meliš vändab meile bajanal i mö olem ihastusiš, miše hän om meidenke kollektivas. Meil om lujas üks’meline kollektiv. Läz kaik kollektivas oma vepsläižed. Kollektivas oma eri-igäižed naižed. Kaik mö hüvin ladimoiš toine toiženke. Kaikutte tahtnik voib tulda kollektivaha i pajatada meidenke.
– Kuspäi tuli kollektivan nimi – ”Pihleine”?
– Mö iče kaik kollektivas pätim, miše pihleine om meiden vepsläine simvol. Nece om külän kaičii. Se kaičeb meid. Muga tuliki nimi.
– Kuspäi otat pajoid?
– Neciš azjas meile abutaba külän baboid, vepsän kelen opendajad. Kaik abutaba meile, niken nikonz ei hül’gäidand pakičust. Valentina Sem’onovna kirjuti meile častuškoid. Venälaižid pajoid otam internetaspäi. Miččid-se pajoid sanub Sergei Ul’bakov. A ”Kalag’”- pajon vepsän kelel meile kirjuti Gul’a Polivanova Vidl-küläspäi. Nügüd’ meile kirjutadihe uzid častuškoid Kaskezas. Zavodim opeta niid.
– Kut tö vaumičetoiš ezinemaha?
– Mö vasttamoiš kaks’ kerdad nedališ. Minä zvonin kaikile, sanun konz i kus linneb repeticii. Pajatam, opendam uzid pajoid. Mö omblim ičelemoi kost’umoid. Ned tuliba kaik erazvuččed, no lujas čomad.
– Kus tö jo ezinit?
– Ezmäi kaiked mö pajatam ičeze azjtegoil vai praznikoil, miččid tehtas Kalages. Ajoim Vägestusen päiväle Kaskezaha. Meid mugažo kuctihe ”Elonpu”-praznikale Vidl-külähä, olim Kindasovo-küläs-ki. Meid kulištadihe, homaitihe, nügüd’ kuctas paksumba. Teravas ajam ”Elonpu”-praznikale Šoutjärvehe, jäl’ges Päiväižen praznikale Šokšuhu.
– Miččed planad oma tulebaha aigaha?
– Nügüd’ meil oma keskaigaižed kost’umad. No administracii toivoti ombelta meiden täht ühtejiččid kost’umoid da kengid. Tahtoim opetas vändmaha balalaikoil, luzikoil. Meletam möhemba kargaita-ki. Otam kaiken rahvahaspäi.
– Om-ik teile mel’he pajatada?
– Surel tahtol kävuim repeticijoile. Kaikile ühtnikoile nece om mel’he. Mö vasttamoiš, pajatam, pagižem elos, nagram. Pajo abutab eläda. Rata-ki pajatades om kebnemba. Tuled jäl’ges repeticjad kodihe, ka hengel kut-se om kebnemb, om hüvä mel’. Väzund da opal kuna-se kadoba. Mö tahtoim opeta uzid pajoid, kehitoitta vepsän kul’turad. Minä olen vepsläine i minei lujas tahtoiše, miše ezitatoiden tradicijad eläižiba.
