Тексты
Вернуться к списку | редактировать | удалить | Создать новый | История изменений | Статистика | ? Помощь
Irina Sotnikova. Melentartuz' praznikaha ei sambu!
Irina Sotnikova
Melentartuz' praznikaha ei sambu!
вепсский
Младописьменный вепсский
Jo
enamb 30 vot Piterin agjan Vidl-küläs tehtas sur’ vepsän rahvahan ”Elonpu ”-praznik .Tälvodel Vidl-külä vastsi meid prazdnikal lujas hüvin .Eskai sä ihastoiti meid .Konz mö tulim praznikale , külän päirdale da Ojat’-jogen randale kerazihe jo äi rahvast .Vidl-külähä tuliba adivod Piterin da Vologdan agjoišpäi , Karjalaspäi , Suomespäi i eskai Franciaspäi .Praznik ühtenzoiti erazvuiččid pol’vid .Praznikal oli äi lapsid , aigvoččid , vanhoid ristituid .
Praznikan päprogramm mäni čomitadud scenal .Sigä ozutadihe suomalaiž-ugrilaižiden rahvahiden sarnoid .Erazvuiččed fol’klorkollektivad ozutiba ičeze pajo-da kargmahtoid .No kaik-se ristituid maniti vepsän rahvahan heng , mitte oli scenan irdpolel .
Ojat’-jogen randal keittihe lent , seižuiba möndrivid , kus vepsläižed mastarid ozutiba ičeze käzitehmusid tohespäi , puspäi , kanghaspäi , savespäi .Kaikutte praznikale tulii ristit voi ostta lahjoid muštoks : čomitesid bronzaspäi , padoid savespai , erazvuiččid puzuižid , puspai tehtud kuvid , čomid kudotud hurstid …A mitte magukaz oli vepsläine paštatez : magedoid pirgoid , plotuid , skancoid , kalitoid …
Praznikan adivoiden täht oli tehtud äi melentartuižid iloitusid .Ristitud voiba ühtneda erazvuiččihe mastar’-klassoihe .Kaikutte tahtnik voi probuida tehta koivuižid vastoid , padaižen savespai , paštta kalitoid , kudoda vöid .
Necil kerdal ”Elonpun ” tem oli omištadud sarnoile .Praznikan aigan oli tehtud konkursoid-ozutelusid : ”Sarnoiden eläjad ”, ”Rahvahan sädod ”, ”Kuva kangazpalaižišpäi ”.Nenil ozutelusil nägub , kut om äi lahjakahid mastarid vepsän mal !Üks’ rad om paremb tošt !Nägui , miše kaikil oli hüvä mel’ , praznik toi ristituile ihastust , rahvaz iloitelihe .A erased tuliba praznikale , miše kosketadas , nähtas tutabidenke , heimolaižidenke .
Ümbri kului vepsän pagin , rahvaz käveli čomiš sädoiš .Kut oli mel’he nähta , miše vepsän rahvahan tradicijad da verod eläba .Tahtoiše uskta , miše mugoine rahvahan heng nikuna ei kado .
Mugoižil praznikoil om tärged tegend – johtutada endišt elod , harjenzoitta ristituid vepsän rahvahan tradicijoihe , kul’turaha , pagižmaha vepsän kelel .
Kaikuččel vodel praznik keradab äi rahvast .Se ozutab , miše melentartuz’ rahvahan praznikaha ei sambu , i nece om hüvä .
Melentartuz' praznikaha ei sambu!
вепсский
Младописьменный вепсский