Тексты
Вернуться к списку | редактировать | удалить | Создать новый | История изменений | Статистика | ? Помощь
Elina Potapova. Taido veres da mieles
Elina Potapova
Taido veres da mieles
карельский: ливвиковское наречие
Новописьменный ливвиковский
Tänävuon
kuulužu karjalaine taidoilii Tamara Jufa on täyttänyh 80 vuottu .Karjalan tazavallan taidomuzeis 2.kezäkuudu avattih Tamara Jufan merkipäiväle omistettu ozuttelu , kuduadu voibi kaččuo syvyskuun 17.päivässäh .
Ozuttelus suau nähtä taidoilijan parahii tevoksii , Kalevala-eeposan koskijoigi , kuduat kuulutah Karjalan taidomuzein ‛‛kuldazeh fondah ”.Muzeis sežo voibi nähtä monih kirjoih niškoi piirustettuloi čomazii .Inehmine piirusti kuvii Hans Christian Andersenan , Charles Perraultan da Grimman velleksien suarnukniigoih .Ozuttelus Tamara Jufa on ezitetty kui kuulužu kirjugruafiekku da teatran taidoilii .
Ozuttelun avajazih tuli iče taidoilii , Tamara Jufa sai hyvittelylöi da lahjoi dovarišois da hänen luomisruavon suvaiččijois .Inehmine musteli omua nuoruttu , ruadotaibalehen alguu .Tamara Jufan sanoin mugah , tartumah ‛‛Kalevalan ” aihieh , kudai luadi taidoilijan kuulužakse , händy potakoičči Sulo Juntunen .Enzimäi tämä ruado ozuttihes ylen jygiekse , hot eepossah häi tuttavui jo lapsennu olles raadivoprogrammua kuunneltes .Ga yksikai ruado algavui da lykystyi .On kummua , kui taidoilii tunzi karjalažuttu , pohjazes eläjän mentalitiettua da tarkah kuvaili naizien taboi .
Ozutteluu vaste minä vastavuin Periodika-julguamos Tamara Jufan tyttären kel .Margaritan kel myö piimmö paginua sih nähte , midä tarkoittau olla taidoilijannu da kui pereh vaikuttau oman elaijan dorogan valličukseh .
Tamara Jufa on rodivunnuh Lipetskan alovehel , a hänen tytär Margarita on rodivunnuh jo Karjalah , Ladvan kyläh , kus Tamara Jufa opasti lapsii piirdämäh .On selgei dielo , ku rodivunnet taidoilijoin pereheh , tahtonet libo et , rubiet piirustamah .Muga i rodih .Vie pikkarazennu Margarita otti kädeh kynän da oppi midälienne piirustua .Inehmine mustau , ku hänen enzimäine kuva oli ‛‛Kukat da linduzet ”, kuduan häi luadi kolmevuodehizennu .Margaritan sanoin mugah , muamo , Tamara Jufa nikonzu vägehes ei käskenyh piirustua , ga yksikai ainos tiezi da uskoi , ku tyttäres rodieu taidoilii .Tämä usko tartui Margaritahgi .
– Opastuo piirustamah voibi jogahine ristikanzu , ga taidoilijannu olles pidäy enämbi , migu ainavo n’ero . Kuvat ainos ollah sinun piäs .Toiči kävelet pihua myöte da ihan petties huomuat lehten , kudai viruu kumman luaduh libo sih čomasti kuvastuu päivänvalgei , hedi panet sen mustoh : pidäy sit kunnetahto piirustua se , sanou omii mielii Margarita Jufa .
Pidäy sanuo , ku Margaritan tytärgi Antonina jatkau perehen perindyö da hänes rodih taidoilii .Inehmisty ei kiinnosteta Kalevala-eeposan aihiet , kui hänen buabua da muamua , häi astuu omua taidodorogua myöte .Nygöi häi yhtyy Suomen da Karjalan nuorien taidoilijoin Northern Paradise -projektah .Terväh suau nähtä nuorien uuzii tevoksii .
Taido veres da mieles
карельский: ливвиковское наречие
Новописьменный ливвиковский