Тексты
Вернуться к списку | редактировать | удалить | Создать новый | История изменений | Статистика | ? Помощь
Mokki
Mokki
карельский: ливвиковское наречие
Новописьменный ливвиковский
Suarnua-vuarnua
Eläy
pogostal köyhy leskiakkaine .Hänel on poigu , nimi on Mokki .Hänel on ylen köyhy eländy i lähtöy papile kazakakse tariččemahes .
– Buat’ušku , ota minuu kazakakse , ei ole leibiä syvvä .
Buat’ušku sanou :
– Voibi ottua , poigu , vuvvekse otan , sada rubl’ua palkua , otan !
Rubieu Mokki kazakakse vuvvekse .Ruadau vuvven .
– Buat’ušku , anna nygöi čottu !
– Vot , Mokki-poigu , sanou , – voinnet varrastua minul koiran , sit annan kaksisadua , a ku et voinne varrastua – vuvven palkua et sua .
Tulou kodih itkijen muaman luo :
– Muamo , nygöi on yksi lehmy eluo , dai sen minä išken , ilmai ruavoin minä papis , palkua en sua – häi minul palkua maksa ei .
Muamo itköy :
– Yksi lehmy on dai sen nygöi išket !
Ottau veičen , menöy tahnuoh , išköy lehmän .Ottau nahkan lehmäl umbinazen , kui oraval .Vuottau yönaijan .Ottau nahkan , astuu papin pihale .Kui häi eli papilluo vuvven , koiru , tiettäväine , tunzi händy , haukunuh ei .Häi otti , avai dai jätti sinne lihua .Koiru n’ulahtih sinne sydämeh .Häi otti koiran , sidoi i tuli kodih .
Nouzou pappi huondeksel , astuu Mokilluo :
– Varrastitgo , Mokki , koiran ?
– Varrastin , velli , buat’ušku !
– Anna koiru iäre da tule illal čotale !
Tulou Mokki illal , ga :
– Vot , Mokki , toine zaduačču sinulles .Minä istummos ikkunpieleh , muatušku istuihes toizeh , den’gat roitah stolal .Voinnet varrastua den’gat , annan kolmesadua , a ku et voinne varrastua , sit vuvven palkua et sua .
Tulou yö .Mokki smiettiy , kui papil ottua den’gat .Menöy kalmoil i kaivau pokoiniekan verekseh pannuh muaspäi i sellittäy omih sobih .Tuou pokoiniekan da panou ikkunpieleh .Muatušku ku kačahtah dai sanou :
– Buat’ušku , kačo , Mokki tuas on !
Buat’ušku kui kačahtau :
– Muatušku , mene tuo orožu !
Muatušku tuou orožan .Pappi ottau da ambuu pokoiniekkah .
– Nygöi , sanou , – piäzimmö sit , den’gua ei pie maksua .
Nygöi läkkä lykkiemmö jogeh .
I lähtietäh lykkiämäh jogeh .Kuni pokoiniekkua suatetah , Mokki škatulkazen ottau i kodih menöy .Tullah pappi i papad’d’u jogeh lykkiämäh , ga škatulkua den’goin kere stolal ei ole .
Hyö itkietäh :
– Vot pahoin myö ruavoimmo .Kuni ukseh ymbäri menimmö , Mokki ikkunaspäi den’gat otti .Nygöi den’gat i kai lykkäimmö jogeh !
Ei pappi tirpa , yöl astuu Mokin muamalluo .
– Koisgo on poigu ?
– Kois on !
Pappi ihastuu .Tulou Mokki .
– Otitgo den’gat ?
– Otin , buat’ušku !
– Anna den’gat järilleh , tule huomei čotale .
Mokki ku oli česnoi ruadai , häi andoi kai den’gat papile .Astuu ihastuksis papilluo : “Andau nygöi pappi čotan !”
Pappi sanou :
– Mokki , voinnet gu varrastua minuu iččiedäni , sit annan viizisadua , a ku et voine , vuvven palku sudre menöy !
Mokki päivän duumaiččou , kui pappi varrastua .Tulou yö .Menöy kirikköh kelloden’goih i rubieu zvonimah .Hypättih rahvas , juostih kirikköllyö , kyzytäh :
– Ken zvoniu ?
– Zvoniu …
Heityi Jumal taivahaspäi .Teijän pogostal on ylen božestvennoi pappi , taivahah händy pidäy .Mengiä viegiä papile viesti , anna ottau muatuškas prošken’n’an i tuou kai den’gat , Jumal ottau hänen taivahah !
Menöy kirikköstuarostu i sanou :
– Buat’ušku , heityi Jumal taivahas , tuli sinuu ottamah da käsköy tuvva kai den’gat .
Muatuška itköy :
– Kuibo nygöi minä elän , ku otat kai den’gat kerale ?
– Nellisadua senčois pualičal padazes , niidy Jumal ei tiijä !
A Mokki senčois kuundelou .Vai pappi da kirikköstuarostu lähtietäh kirikköh , Mokki enne heidy juoksou kirikköh .Pappi nouzi kellojalgoih :
– Oho hospodi , viego minä teile päin ?
Nouzou ylähäkse i Jumalale jalgoih :
– Hospodi , nygöi minä sinun !Vie uaduh libo ruajuh !
– Toitgo kai den’gat ?
– Kai toin .
– Kielastat , Jumalas peittiä et sua !
Nellisadua padazes tuo iäre !
Tulou buat’ušku muatuškalluo :
– Anna kai den’gat , eiga ni taivahah ei ota !
– Jätä hot’ , buat’ušku , viizikymmen rubl’ua zuaharniččah !
A Mokki kai kuuli senčoispäi .Lähtöy pappi Jumalalluo , a Mokki sie vuottau .Pappi sanou :
– Hospodi nygöi kai den’gat toin !
– Kielastat , buat’ušku , viizikymmen rubl’ua zuaharniččah jäi !
No niijen täh , anna jiäjäh muatuškal , a myö sinun kere lennämmö taivahah !
Avuau nahkan , käsköy papin sinne .Menöy pappi nahkah .Mokki ylen hyvin krieppii .
– Nygöi , buat’ušku , lendämäh lähtemmö .
Ottau pordahii myöte ku tujahuttau alah , pappi vai mukkie kiändäy .Pappi sanou :
– En tiijä kunne viijah : uaduh vai ruajuh , no dielo Jumalan !
A Mokki toizis pordahis jyrähyttäy , dai kolmanzis .Pappi vai “hospodi ” lugou .Tulou alahakse da ottau olgupiäle da kandau papin kon’ušših da heittäy vazazelluo .Pappi sie mökkelöitti i nuorat vällendi .I nahkas sie n’ulahtih piä iäres .Vazaine otti dai suudu hänel : “O hospodi , kačo , anhelit tervehtitäh .Tiä anhelit ollah karvazet !”
Nouzi polvilleh da rubei kaččomah – ga on lehmy : “O , hospodi , kačo i meijän mul’oihut on tiä !Jumalan dieloine .”
Nouzou sie , tulou tahnuoh : “Ga täs on minun riiškaine .”
Tulou senčoih , astuu pertih : “O , hospodi , ga minun pertine on tiä !”
Muatušku hyppiäy gorničas :
– Kus , urai , olet taivahas !Omashäi kois olemmo !Mokki sinuu talutti .
Sit vaiku pappi sanoi :
– En andanuh Mokile sadua rubl’ua palkua – annoin kai den’gat , da vie luut bokis murendin !Anna nygöi Mokki eläy Jumalan ker !
Mokki
карельский: ливвиковское наречие
Новописьменный ливвиковский
–
–
–
–
–
–
–
–
–
–
–
–
–
–
–
–
–
–
–