Тексты
Вернуться к списку | редактировать | удалить | Создать новый | История изменений | Статистика | ? Помощь
Irina Mironova. Ühtes voib tehta äjan!
Irina Mironova
Ühtes voib tehta äjan!
вепсский
Младописьменный вепсский
Voden
lop nece om hüvä aig tehta ühthevedoid .Pidab sanuda , miše Kalagen täht nece voz’ oli satusekaz .Täs mäni äi melentartuižid azjtegoid .Kezal ezmäižen kerdan küläs mäni vepsläine praznik ”Kalarand ”, mitte kerazi äi rahvast .Nügüd’ sigä om ičeze ”Pihleine ”-fol’klorkollektiv , mitte ihastoitab eläjid ičeze pajoil , ühtneb erazvuiččihe külän azjtegoihe .Školas mäni sur’ rad vepsän kelen da kul’turan kaičendan mödhe ”Etnostudii .Sugupol’viden äned ”-projektan abul .Kül’mkun lopus kul’turpertiš loptihe augotižetapan kohenduz i tehtihe ”Etnostudii .Sugupol’viden äned ”-projektan ühthevedoid .Kaikiš neniš arvtegoiš pidab kitta Kalagen külän administracijan pämest Natalja Silakovad .Hän om kaikiden idejoiden päzavodii .Oiktas voin sanuda , miše Kalagen eläjid edes varastab völ äi melentartuižid azjoid .
Kalages paksus tehtas erazvuiččid kul’turazjtegoid .Üks’ niišpäi om ”Vepsläine sarn ”-festival’ , miččele tuleb äi adivoid Piterin da Vologdan agjoišpäi .Mugažo paksus vedetas praznikoid vanhoiden eläjiden täht .Lapsed ühtneba nenihe praznikoihe i hüviš meliš ozutaba ičeze pajo - da kargmahtoid .Kaik nene azjtegod mäneba školas .Tö küzut – mikš , ved’ Kalages om ičeze kul’turpert’ ?Ka , om , no se jo pit’kha ei rada .I nece om sur’ problem külän kehitoitusen täht .Lapsile i norile ei ole sijad , kus hö voižiba mänetada joudajad aigad .Sikš äjad nored kanzad ajaba elämaha lidnaha .Om hüvä , miše nügüd’ nece tärged kul’turpertihe sidotud küzund pättas , i nadeimoiš , miše se zavodib rata teravas .
Kalagen kul’turpert’ letihe vodel 1930, vodel 1970 se udištadihe .Pit’kha kul’turpertiš ei olend nimittušt kohendust .Lämbituzsistem om vanhtunu , a tulleituzsistemad i vezivedod nikonz ei olend-ki .Sikštämbei kul’turpertin kohenduz oli lujas tärged azj .
Kalagen administracijal sündui hüvä idei – tehta sigä harjoiteluzzal , miše külän eläjad voižiba tulda sportadamha .Vodel 2018 kul’turpertin kohendusele anttihe 1200000 rubl’ad federaližes i respublikaližes b’udžetoišpäi programmoiden abul , miččed om oigetud igähižiden vähäluguižiden Pohjoižen , Sibirin i Edahaižen Päivnouzman rahvahiden kehitoitusehe , a mugažo sijaližiden iniciativoiden tugehe .Sauvotuses tehtihe avtonomine lämbituz , kanalizacii , pindkohenduz harjoiteluzzalas , vajehtadihe elektrolangoid , iknoid .Kut sanui Natalja Silakova , suren panendan kul’turpertin kohendusehe tegiba iče külän eläjad , sijaližed deputatad i karjeroiden pämehed .Teravas planuitas ostta harjoituzkaluid .I Kalagen eläjad voiba tulda zalaha sportadamha .Nece om sur’ hašk külän kehitoitusen täht , no edes om völ äi radod .
Necil-žo päiväl Kalagen školas oli völ üks’ tärged azjtego – tehtihe ”Etnostudii .Sugupol’viden äned ”-projektan ühthevedoid .Projektan tegi Vepsän kul’tursebr .
Kalagen školan openikad starinoičiba ičeze tundmusiš , kut hö ühtniba neche projektaha , midä tegiba , miččed mastar’-klassad oliba , kuna hö ajoiba , midä tedištiba ut .Pidab sanuda , miše projektan todenzoitusen aigan Kalagen školas mäni lujas melentartuine rad , miččehe lapsed ühtniba surel tahtol : mastar’-klassoid vepsläižen paštatesen mödhe , vastusid külän vanhoiden eläjidenke , paginoid voinan polhe , tundištoitajan kursid Šoutjärven muzejas , matkoid Kivač-vezilanktusele , vepsläižihe külihe , fotokursid i äi tošt .
Projektan satuseks tuli DVD-disk , kus om pagištoitusid külän vanhoiden eläjidenke Sures voinas .Äjakse kud openikad käveliba külän eläjidennoks i pagištoitiba heid .Hö starinoičiba lapsile voinvoziš pohjoižpaginal , ken midä muštab .Diskaha mülüb 10 videokirjutest vepsän kelel , i se tuleb hüväks abunikaks školiš , kus opetas kodikel’t .Mugažo Šoutjärven etnografižes muzejas kül’mkun 13.päiväl avaitihe foto-ozuteluz ”Čudokaz Kalag’ ”, kus voib nägištada parahimid projektan ühtnikoiden fotokuvid .Kaikutte tahtnik voib tulda kacmaha niid .
Necil tärktal päiväl ozatelmaha eläjid tuliba ezmäine Karjalan Valdkundan Rahvahaližen da regionaližen politikan ministerstvan varapämez’ Andrei Manin , Prionežjen municipaližen rajonan pämez’ Vadim Suharev .Sanutihe äi lämid sanoid Kalagen administracijan pämehele Natalja Silakovale , ”Etnostudii .Sugupol’viden äned ”- rojektan ohjandajile , kaikile , ken ühtni sihe , eläjile heiden abus i sures panendas külän kehitoitusehe .
Nügüd’ Kalages todenzoittas uz’ idei – tehtas ičeze etnokul’turine keskuz vai vepsän kelen pert’ .”Om taht kehitoittas edemba-ki , kazvatada lapsid , ozutada heile , miččed hüväd ristitud eläba täs i mitte bohat kul’tur om vepsläižil ”, – sanui Natalja Silakova . Ka , lapsiš om tuleb aig , pidab opeta heid navedimha ičeze jurid , rahvahan tradicijoid , kel’t .Oikti sanui Kalagen školan pämez’ Svetlana Gotič spasiboites lapsid : ”Ken paiči meid teidenke kaičeb meiden rahvast i sen kul’turad !”.
Ühtes voib tehta äjan!
вепсский
Младописьменный вепсский