Тексты
Вернуться к списку | редактировать | удалить | Создать новый | История изменений | Статистика | ? Помощь
Suol kazvanuh pielus
Suol kazvanuh pielus
карельский: ливвиковское наречие
Новописьменный ливвиковский
Kurrentainu
!Kurrenpelvas !Kurren …kormu .Kurrel on jallat pitkät , a pelvas lyhyt !Mittumat čomat sanat da sanonduluavut ollah karjalan kieles !
Ei langua rodinuhes kurrenpelvahas , eigo tainal langu olluh , a kädeh pädii dai dielon hyvin spruavii .Niilöi kerättih da täytettih niilöil höyhtelözil pieluksii da pošteliloi .
Nygöi vie erähät otetah kurrentainua kukan sijah mal’l’akkoloih , a kurrenpelvas muga jäi suoloil , da vie kai suoloi pengotah : kudual suol kazvau kurrenpelvas , sil eigo garbalo , eigo muur’oi kazva , vaiku meččylaijas kazvanou juomoidu .
A näittögo suodu aijoi keviäl ?
Ei vie ni l’eskenlehti kuki , eigo ni mečäs mittumua kukkastu nävy , a kurrenlammas jo kukas .Se on enzimäine keviän kukkaine .Vaiku lumi alguau sulua , kurrenpelvas jo menöy kukkah .Laihoi dai kivizii alavii kallivoloi dai suostunnuzii rämeikkölöi čomendellah vihandankeldazettavat töppyheinäzet .Kukkazien terälehtyöt gu sugahazet .Niidy on muga äijy , ga kehä on gu miäččyine .Joga sugahaine on siemenyös kiini .Kezänaigua siemenyöt kypsetäh , sugahazet pitketäh , vallotah da pehmetäh .Suo muuttau vihandankeldazen pluat’t’azen valgiekse .Kurrenpelvahan lehtet pitkähköt , kaidazet , gu nuorazet kazvetah turbieloinnu mättähinny .Kezäl , gu tulou matkata tädä suodu myö , odva vai piäzet poikki , moizet on turbiet mättähät , eigo ni astujua kanneta .Et tiijä kuh jalgu polgie .
Sygyzyl mua kylmäy , muut kukat kai hävitäh , a kurrenpelvas čomendau iččeh valgieloil kukkukehäzil kaiken suon .Net pyzytäh talvessah .Mua lumenpeitos .Meččy alasti .Tuuli riuhtuau nämmii siemenienlennättäjii sugahazii – nygöi jo pehmielöi , gu höyhtelözii , levittelöy niidy kaikkiele .Net ei varata ni talvipakkastu , ni lumikivostu , vuotetah kevätty joga kolazes , kunne tuuli tuistuau .Kus ei voi kazvua nimittuine lihavembi heinäine , kurrenpelvas kazvau .
Nygöi voibi kävellä suodu myö da keräillä nämmii töppyheinäzii “pelvaspivozii ”.Net pakutah siemenien kel , a gu kois kuivuat töppyheinäzet da pehnuat vähäzel , siemenet erotah , a höyhtelözet pehmetäh .Pielukses net pyzytäh pehmienny puolenkymmen vuottu .
Sit pidäy kerätä uuttu , älgiä vai vuottuat , kuni tuuli kai riuhtuau da tuiskuttau , kunne puuttuu .Ei ni tuhanzii pie suittua , kehtua vai keräillä pielustu , roihgi postelii .
Suol kazvanuh pielus
карельский: ливвиковское наречие
Новописьменный ливвиковский