Тексты
Вернуться к списку | редактировать | удалить | Создать новый | История изменений | Статистика | ? Помощь
Švecova Darja . Muštab kaikid lapsid
Švecova Darja
Muštab kaikid lapsid
вепсский
Младописьменный вепсский
Vepsän
mal om äi penid da čomid posadoid , kus ristitud nügüd’-ki eläba kožmuses londusenke .Toižeg om üks’ vanhembiš vepsläižiš posadoišpäi Änižröunas .Korktad pedajad umbärdaba posadad , andaba ristituile verest il’mad da hüväd tervhut .Venera Päžijeva eläb ani neciš posadas .
”NIIČČED – KLUBHA , A MINA – DÄRVELE ”
Venera Aleksandrovna Päžijeva , enzne Šlotonina , om sündunu kanzaha , kus norudes vepsläižiden veroiden mödhe da pagištihe kodikelel .
Hänen mam , Anna Kuzminična , norudes Kil’cova , radoi sovhozas .Tat , Aleksandr Jakovlevič Šlotonin , radoi Rudoupravlenijas .Kanzas oli nel’l’ last : kaks’ sizart da kaks’ velled .Venera oli kaikid noremban lapsen kanzas i kaikid armhemban tatan tütren .Venera Alekrandrovna lämäs muštleb : ”Tatoi navedi kalatada , i mindai openzi kalatamha .Ajelimoi hänenke därvele .Ved’ hänel oli kaks’ poigad – üks’ kol’ Vengrias Voinan aigan , a toine uppon’ , sikš nikeda tatal ii olnu otta kerdale , vot mina hänenke ajelimoi kezal Änižele , 5.-10.klassahasai .Hän mužikiile sanii – a milii nikeda ii pida otta , Venera mahtab kalatada paremba kaikid .Ende oli posadas klub .Niiččed – klubha , a milii tatoi sanii : ”Pidab Änižele ajada ”, nu i ajelimoi .Tatoi oli molodec .Hän mahtii tehta äjan – regid tegeskel’ höbole , venehid tegeskel’ .Mamoi pidi lehmän kaiken aigan .Maid oli , kala oli , liha oli .Konz mamoi kol’ , a mina läksin mehele , ka muganažno pidim lehmän .”
”MIID FINNAD KOSTTUD II ”
Venera Aleksandrovna om sündunu vodel 1938.
Nece oli varukaz da jüged repressijoiden aig .Konz zavodihe Sur’ voin , penikaine Venera jäi mamanke posadaha , a tatoi läksi kaičemha kodimad vihanikoišpäi .Venera Päžijeva johtutab : ”A tatoi läks’ voinha , ka mina olin verajil , mašin ozutadihe , mužikad išttihe .Tatoi prostihe minunke i läks’ ...
No hän tuli voinaspei , tuli bol’nii .Lujas äi mužikiid ii pörtkoi voinaspäi .”
Voin ei jätand homaičemata ni üht kanzad .Vodelpäi 1941 meiden Karjalan ma oli suomalaižiden okkupacijas .Ristituid evakoidihe toižihe lidnoihe , ozutesikš , Saratovaha vai Molotov-lidnha .Äjile kanzoile tarbiž oli jätta ičeze kodid da elomištod , toižed jäiba posadaha .Venera eli Toižeges sil aigal , sikš äjan muštab suomalaižiden polhe : ”Mö olem vepsad , ka miid finnad kosttud ii .Ku vaise mužikoid ...Finnad sigä eletihe da rat’he .Miid , lapsid , ii kosttud .Muštan , finn ištutab mindai taburetkaha i ninga hän ühtel kädel lendel’ , harjoitel’ ninga .
Sild Toižeges oli muretud .Kaik voiskad asttihe posadad möto da ümbri siš .Meiden pertiš oli muretud st’oklad .Konz saldatad asttihe posadas , mamoi mindai ot’ i mö läksim .Muštan , išttihe kaik akad da saldatad , garmon’ vändi , üks’ saldat kargaiži .Akad seištihe übmri i küzeltihe :”Tedad-ik sina necida mužikad ?”.Küzeltihe ičeze mužikiid .Akoid oli lujas äi , rat’he finnoil .Oli brigad tehtud i kaik püudod oli lattud .Däl’ges voinad näl’gäd mö nägim .No lehm oli , kartofinad täudeskel’ vodeks , hiinantegon panim .Niitim kaiken stoikil .Kezas läbi pidi rata , kaik vägi mäneskel’ .Kävelim pöudoid möto , otim hapanuded kartofinad , a mamoi paštoi kokatid .Nu a potom hilläšti zavodim eläda .”
”MUŠTAN KAIKID LAPSID ”
Pidab sanuda , miše vepsän kel’ kaiken abuti Venera Aleksandrovnale elos .
Hän kogonaižen elon radoi lapsidenke päivkodiš .Hän kazvati lapsid da openzi heid vepsän kel’he .Venera Aleksandrovna kaiken el’genzi , miše laps’aig om lujas tärged da parahim aig ristitun elos .Lapsiden kazvatai om lujas tarbhaine rad .Ved’ nece om ezmäine ristit , kenen käzihe mamoi andab ičeze lapsen , uskob , miše kazvatai voib kaita da armastada händast , kuti ičeze last .Mugoižen kazvatajan oli Venera Aleksandrovna Päžijeva .No ezmäi hänele tarbiž oli lujas äjan opetas da rata .Venera Päžijeva sanui : ”Meiden posadas oli škol .Openzimoi tägä nel’l’ klassad .Openzimoi hivin .Nel’l’ klassad lopin i läksin Ropejale .Sid’ d’o zavottihe kävelta tancile , ka openduz läks’ pahemba .Kävelim školha dougiil 6-7 kilometrad .Ku keda-se ottihe mašinal , a muga kaiken aigan dougiil .Lapsid oli meil äi .Ii olnu sobid , olim kuti oborvancad .Mamoi iče ombelz’ platjad milei .Lopim mö siičime klassad i läksim Šoutarvehe opendamhas .Elim internatas .No pigai äjad lähttihe tagaze , ved’ pidi maksta da kävelta dougiil läz 20 kilometrad vai kutse ajelta .Ku dougiil läksim , spičkid ostim , ved’ varaižim händikahid .Mina lopin kümne klassad , a sid’ läksin doškol’noje-zaočnoje - otdelenijaha opedamhas .Sen lopin , da meletin , mida tehta .Tahtoin ajada opendamhas Piterihe universitetha , no varaižin , mise en mahta kird’utada ekzamenad , a vaise den’gad männoba dorogale .Sikš postupin Petroskoihe , filologijaha .Ka päzuin universitetha .Sil aigal rodin poigan , otin akademičeskijan i lopnu en , otin dokumentad .Edel-se žal’l’eičin , a potom harjenin .”
Venera Päžijeva radoi Kalagen päivkodiš vodespäi 1957.Lapsed navediba händast , ved’ Venera Aleksandrovna tegi ičeze radod surel armastusel .Pidab sanuda , miše Venera Aleksandrovna om lujas lahjakaz ristit .Jogahižel tal’vel Venera tegi lumespäi čomid lindoid , živatoid da sarnan hengid lapsiden täht , a sid’ mujuti niid .I lapsile muga se oli mel’he , miše hö kaiken oliba hüviš meliš da rigehtiba irdale .Völ äjan melentartušt da tarbhašt tegi Venera Aleksandrovna lapsile , pani kaiken ičeze hengen neche radho .Nügüd’-ki hän muštab kaikid lapsid , tedab kaikiden lapsiden elo-ozan polhe .Sures fotoal’bomas om kaitud äi lapsiden da päivkodin fotokuvid .Venera Aleksandrovna johtutab kaikid armastusel i starinoičeb ilokahid starinoid lapsiden polhe .Venera Aleksandrovna johtuti : ”Zavodin rata lapsidike , kaik pagištihe vepsän kelel .Ei völ mahtkoi pagišta venäks .Ilod i bedad oli lapsidike .Ropejal oli päivkodi , äjak-se gruppad .Rahvast enamba oli .Mina vedin vepsän kelen urokoid .Konz tuli komissii , mina tegin urokan , i komissijale äkkid nece tuli mel’he ”.
Vodel 1973 Venera Aleksandrovna läksi mehele .Mihail Stepanovič da Venera Aleksandrovna Päžijevad eliba ühtes 32 vot .Heil om kaks’ last – neičukaine da prihaine .Nügüd’ hö lahjoičiba Venera Aleksandrovnale vunukoid .Kezal hö tuleba adivoihe da abutaba baboile .Kacmata sihe , miše radod päivkodiš oli äi , Venera Aleksandrovna napri tehta kaiken ičeze kanzan täht , andoi äi väged da armastust .
Venera Aleksandrovna Päžijeva radoi päivkodiš enamba nellädkümned vot .Äjad johtutaba händast da voiba sanuda Venera Aleksandrovnan polhe vaiše hüvid da lämid sanoid .Ved’ ezmäine kazvatai lahjoičeb lapsile ičeze hengen palan , sikš hän kaiken jäb südäimehe da muštatab čomas laps’aigas .
Muštab kaikid lapsid
вепсский
Младописьменный вепсский