Тексты
Вернуться к списку | редактировать | удалить | Создать новый | История изменений | Статистика | ? Помощь
Maria Filatova. "Kalevalan" tegijan päiväks
Maria Filatova
"Kalevalan" tegijan päiväks
вепсский
Младописьменный вепсский
Sulakun
9.päiväl praznuitas fol’kloran keradajan Elias Lönnrotan sündundpäiväd .Elias Lönrotad tedab kaikutte openik Karjalas , a tetas necidä tedomest da fol’kloristad sikš , miše hän kerazi epižid runoid Karjalas da painzi ”Kalevala ”-eposan kirjan .
Elias Lönnrot sündui vodel 1802 omblijan kanzaha Švecijaha (nügüd’ nece om Suomen ma ).Laps’aigas hän oli lahjakahan da tarkan prihaižen , äjan lugi i hüvin openzihe .Elias Lönnrot openzihe lekarikš i tegihe medicinan doktoraks .Rates lekarin Lönnrot zavodi kerata karjalaiž-suomalašt fol’klorad , enččid epižid pajoid da muštatišid .Hän tegi 11 matkad Karjalaha .Elias käveli jaugai vai ajeli venehes , pagiži rahvahanke da kirjuteli enččid pajoid , runoid da muštatišid .Keratud runoid hän kogozi ”Kalevala ”-eposaha da painzi kirjan vodel 1835, a toine kirj om sündunu vodel 1849.Siš aigaspäi mäni jo 170 vot .Nügüd’ Lönnrotan sündundpäiväl Suomes praznuitas Suomen kelen päiväd , a Karjalas necil päiväl tehtas praznikad Kalevalan temale .
Šoutjärven školas 9.sulakud mugažo tehtihe praznik .Sidä vaumičiba opendajad ühtes openikoidenke .Praznikale tuli äi rahvast – openikad ičeze kazvatajidenke , opendajad da külän eläjad .Praznikad zavodiba vanhembad openikad , kudambad lugiba eposan runoid venän da vepsän kelel .Sid’ Šoutjärven muzikškolan openikad vändiba stribunikoil da pajatiba epižid pajoid .Vepsän rahvahan hor čomiti praznikad vepsläižil pajoil , miččiden pohjal oma sanad ”Kalevala ”-eposaspäi .
Praznikan adivoile starinoitihe Elias Lönnrotan elon polhe , ”Kalevala ”- eposas da mugažo siš , ken i konz tegi kuvid eposan kirjoiden täht .Edel praznikad lapsed pirdiba kuvid Kalevalan temaks i praznikan aigan ozutadihe niid adivoile .Šoutjärven školan opendajad meletaba siš , miše lapsile pidab lugeda epos , pidab teta sen pähengid .Ksenia Klimova , školan opendai sanui : ”Mö meletam , miše nece tem om melentartuine lapsile .Konz vaumičim necidä praznikad , lugim ”Kalevalad ” vepsän kelel .Nece om meiden istorii , meiden röunan istorii , mi enamba lapsed tedaba , se paremba om heiden täht .”Kalevala ”-eposad pidab teta lapsile . Siš om jügedahkoid azjoid , no kaikse se om mel’he lapsile ”.
"Kalevalan" tegijan päiväks
вепсский
Младописьменный вепсский