Тексты
Вернуться к списку | редактировать | удалить | Создать новый | История изменений | Статистика | ? Помощь
Švecova Darja . ”Ku pätin tehta, tegen lophusai”
Švecova Darja
”Ku pätin tehta, tegen lophusai”
вепсский
Младописьменный вепсский
Vepsän
mal eläba vägevad da melekahad naižed , kudambad ičeze melel da surel tabal voiba tehta kaiken ičeze kanzan da kodiman täht .Natalja Silakova om üks’ heišpäi .Hänen elo om omištadud korktale azjale – vedäda ristituid da tehta kaiken heiden hüvüden täht .Nügüd’ hän om Kalag’-külän pämez’ da läz kaht vot hän oli Vepsän kul’tursebran pämehen .Nece rad pakičeb vastusenpidändad da väged .No suren taban taga om peittud čoma da laskav naine , kudambal om ičeze uništusid da tahtoid .Minei tuli oza vastatas Natalja Silakovanke Kalages , ani hänen jubilejan edel , mitte om 23.sügüz’kud .Išttes čomal Änižjärven randal hän starinoiči :
– Minä olen sündnu Piterin agjaha , Himjogi-külähä .Se seižub ei lujas edahan Kaskezaspäi , Piterin agjan da Karjalan valdkundan röunal .Konz minä olen sündnu , vanhembad da mö vellenke ajoim elämaha Kaskez-posadaha .Sikš meletan , miše minun jured oma Kaskez-posadaspäi , ved’ minä laps’aigaspäi elin neciš vepsläižes küläs .Sigä seižub meiden kanzan pert’ , necen sijan polhe minun südäimes eläba kaiked lämembad johtutesed .
– Pagištihe-ik Teiden kanzas vepsän kelel ?
– Ka , minä muštan , miše meiden kanzas kaiken aigan kului vepsän pagin . Tatan polespäi kaik oma vepsläižed .Minun mamoi om venälaine , no konz kanzas pagištihe vepsän kelel , ka hän el’genzi lujas hüvin .
– Muštat-ik Tö ičetoi školan vozid ?
– Kaskezas ei olend školad , sikš kaik lapsed Kaskezaspäi da Tožegespäi käveliba Kalag’-külän školha . Nece oli puine , kulu škol , kus openzihe kahesa klassad .Lapsed toižiš külišpäi eliba internatas .Vaiše lebupäivile lapsed voiba ajada kodihe , vastatas vanhembidenke .Minä en navedind eläda internatas , en voind eläda edahan kanzaspäi .Sikš paksus minä ajoin avtobusal Toižegehesai , a sid’ jaugai kävelin Kaskezaha .Homendesel ajoin školha mašinal kiviradnikoidenke , kudambad radoiba ORDas Kalag’ - küläs .Vepsän kel’t školas ei olend .Eskai ei sand pagišta sil .Vaiše babad kodiš pagižiba vepsän kelel .Nügüd’ minä tahtoižin , miše lapsed pagižižiba vepsän kelel , miše ristitud muštaižiba ičeze jurid .Om sel’ged , miše meiden vepsän mal eläba erazvuiččed rahvahad .Paksus hö tuleskeleba radmaha kivikarjeroihe vai kuna-se völ , i nece om hüvä , miše mö voim eläda hüväs kožmuses .No meile ei pida unohtada ičeze jurid da kodikel’t .Ristitud , ked ei tekoi ičeze jurid , ei voigoi eläda hüvin necil mal , ei voigoi löuta ičtaze neciš mirus , ei voigoi kazvatada lapsid ičeze rahvahan veroid möto .Nügüd’ kaikes mirus ristitud napriba tugeta ičeze rahvahid , tahtoiba teta ičeze kanzan istorijad .Minä meletan , miše nece om lujas hüvin .Meiden Kalag’-posadas mugažo tugedaba vepsän rahvast .Mö opendam vepsän kel’t školas , tegem melentartuižid projektoid , tegem čomid koncertoid da praznikad , kus ristitud voiba johtutada ičeze jurid , panda päle vepsläižid sädoid da pagišta kodikelel .Jo toižen kerdan meiden posadas oli tehtud ”Kalarand ”-praznik .Se pidätas čomal sijal , Änižjärven randal .Nece praznik om kaks’keline .Mö pagižem sil kut vepsän kelel , muga venän-ki kelel .Mö naprim tehta muga , miše lapsed da heiden vanhembad , adivod da külän eläjad el’gendaižiba toine tošt .Kacmata sihe , meiden praznikal lujas paksus kulub vepsän pagin .Lapsed da pajosebrad pajataba vepsän kelel , praznikan vedäjad terverhtoitaba adivoid vepsän kelel .
– Mittušt professijad Tö valičit školan jäl’ghe ? Kut elo-oza vedi Teid nügüdläižele radsijale ?
– Ka , minun elos oli äi professijoid da äi radod-ki . Ezmäi minun rad ei koskend vepsläižid .Minä lopin kooperativižen tehnikuman , sid’ radoin magupaštatesiden paštajan da sen jäl’ghe radoin pähižiden omblijan .Nece oli hüvä rad , eskai ühtnin konkursoihe da sain ezmäižid sijoid .I muga oli kaikes rados .Nece om minun elon sänd – ku minä pätin tehta midä-se , ka minei pidab tehta necidä lophusai .
– Oli-ik mugoine aig , konz Teile pidi vajehtada ičetoi elod ?
– Äjak-se aigad mindai ei olend Venämal . Minä ajoin radmaha verhaze maha .Sigä om toine elo , toižed ristitud oma ümbri sinus .I konz minä pördimoi kodimale , minä el’genzin , miše tägä minä en voi kävutada ičein tedoid , en voi rata nikus .Sil aigal minä pätin udes išttas partan taga , i konz minei oli 40 vot , minä udes mänin opendamhas .Minä valičin oiktuz’tedon alovehen .Muštan , miše ezmäi oli lujas jüged opetas , el’geta da panda muštho kaik tedoid .Hüvä , miše minun elos oliba ristitud , kudambad abutiba minei da kaiken tugeziba .Heiden abul da ičein surel naprindal minä sain diploman i radoin völ erazvuiččiš sijoiš .Ozutesikš , radoin opendajan institutas , lugin lekcijoid läz 15 vot .
– Konz Tö zavodit rata vepsläižidenke ? Mitte radsija nügüd’ Teil om ?
– Minä kaiken aigan navedin ühtneda vepsläižiden eloho . Olin Vepsän kul’tursebran aktivižen ühtnikan .No oli aig , konz minä zavodin rata vepsläižidenke enamba i el’genzin , miše minei pidab völ enamba abutada heile , i oigeta kaik ičein väged neche radho .Sil-žo aigal minun päha tuli meletuz – tehtas Kalag’-külän pämeheks .Minä meletin pit’kha , pidab-ik minei tehta necidä .Valičusiden edel minä tahtoin el’geta , voin-ik minä tehta midä-se ut da hüväd külän eläjiden täht .Minä tahtoin kut-se vajehtada elod küläs , kaita vepsläšt kul’turad da kel’t .Nece om lujas jüged rad , tehta vajehtusid ei ole kebn da teravas azj .Ristitud paksus küzuba , pakičeba meid , no kaikile pidab el’geta , miše ei voi pätta kaik problemad ühtes päiväs , sen täht pidab aigad .A vodel 2017 mindai valitihe Vepsän kul’tursebran pämeheks .Nece rad om tärged , ved’ mö voim kirjutada projektoid da tehta äjan vepsläižiden täht .Se abutab kaita rahvast da noustatada ristituiš rahvahališt ičetundmust .
Ned oma vägevan vepsläižen naižen sanad .Niiš om sur’ armastuz ičeze rahvahaze da kodimaha , a völ nece om toiv , miše meiden vepsän rahvaz eläškandeb paremba .
Mö ozatelem Natalja Jevgenjevnad sündundpäivänke .Toivotam hänele kovad tervhut , väged da korktad ozad .Natalja Silakova johtutab ristituile , kut pidab armastada ičeze rahvast , kel’t da kodimad .Hän abutab udessündutada Kalag’-küläd da paremboita külän eläjiden elod .Nece rad ei ole kebn , no se om lujas tärged meiden täht .Išttes čomal Änižen randal Natalja Jevgenjevna andoi vastusid minun küzundoihe .Vaiše aldod da kajagad kuliba meiden paginad ...
”Ku pätin tehta, tegen lophusai”
вепсский
Младописьменный вепсский
–