Тексты

Вернуться к списку | редактировать | удалить | История изменений | ? Помощь

Kenbo eläy mečäs?

Корпус: младописьменный подкорпус

Младописьменный ливвиковский, тексты для детей

Источник: Jegor Ruppijev, Kipinä. № 2, (2019), с. 8

Kenbo eläy mečäs?
(карельский: ливвиковское наречие)

Meččypočči

Meččypočči tuli Karjalah Piiterin alovehelpäi mennyön vuozisuan puolivälis.
Erähän vuozikymmenen mendyy, kovih talviloih kaččomattah, meččypočin lugu kazvoi sissäh, kai annettih luba niilöin meččuičendah.
Meččypočči on karjuelätti. Poikkevuksennu ollah vahnat elätit, kudamat eletäh eriže. Meččypočit ollah ylen kirkiet, kaikensyöjät da hyvin uijetah. Net liikutah enimyölleh hämärin aigua.
Meččypočin nahku on muzavanruskiedu da maksankarvastu värii da on turbiembi, migu počil. Elätin rungu on bokispäi vähäzel lačču. Se avvuttau elätile tungiekseh tuhjožikos da rigeikös läbi. Aiguzen ižäčyn kazvo säjen kohtas voi olla enämbi metrii, rungan piduhus on 180 santimetrassah. Ižäččy painau 200 kilossah da sil ollah kehitynnyöt torahambahat. Niilöin vuoh elätti kaivau muadu syömizen eččijes da puolistau iččie vihaniekois.
Meččypočči syöy eriluadustu syömisty. Se suvaiččou juuriloi, juurikazvoksii, muarjoi da griboi. Konzu on vähä syömisty, ezimerkikse, viluloin tulduu, meččypočči rubieu syömäh “razvazembuasyömistyhaškua, muas da puuloin kojan ualpäi löyttylöi böbökkien toukkii. Meččypočči suvaiččou syvvä čyöttyögi.
Kiimuaigu elätil on parahimilleh kylmykuul. Keviäl emäl rodieu kuuzi-kaksitostu meččypoččistu. Junokas nahku ylen hyvin avvuttau niilöile peittyö lehtilöin da oksien keskes. Se väri säilyy meččypoččizil sygyzyssäh.
Meččypočin suurennu vihaniekannu on hukku, harvembah kondii da ilves. Meččypočil voi olla kaikenluadustu tartunduvoimattomustu.
Vuvven 2018 lugemizen mugah Karjalas on läs 1800 meččypoččii.