Тексты
Вернуться к списку | редактировать | удалить | Создать новый | История изменений | Статистика | ? Помощь
Maria Košeleva. Opendamoi vätes!
Maria Košeleva
Opendamoi vätes!
вепсский
Младописьменный вепсский
Karjalas
jo videnden kerdan mäni etnolager’ , miččen nimi om ”Noriden vastuz Karjalan mal ”.Koumekümne openikad Karjalaspäi da Piterin agjaspäi tuli möst Petroskoihe , miše tundištadas Karjalan rahvahidenke , heiden istorijanke da kelidenke .Tradicijan mödhe lager’ jatkui ühten nedalin .
Erased lapsed oliba lebupäivil , toižil sügüz’pästuz jo lopihe .Kaiken-se kaikuččel oli voimuz hüvin mänetada lebupäivid vai jatkta niid .Lapsil oli lujas melentartuine programm .Heil oli voimuz kosketadas toine toiženke , kävuda muzejoihe , ajada ekskursijoile da opeta ičeze kodikelid .
Etnolagerin tem vajehtase joga voden .Täl kerdal tem oli omištadud ”Kalevalale ” da Igähižiden rahvahiden keliden vodele .Kaikuččel päiväl lapsiden täht oli tehtud melentartuine azjtego .Lapsed vändiba ”Sampon ecmas ”–vändimel , kävuiba Kantele –pert’he , Kiži –muzejaha da Karjalan Rahvahaližehe muzejaha .
Ehtoil heiden täht oli ilotuzprogramm .Lapsed kävuiba vändmaha boulingaha , vastsihe ”Toive ”–sebran ühtnikoidenke , loppäiväl hö kerazihe ühthe lidnan antikafehe vändmaha erazvuiččihe vändoihe da muite kosketadihe toine toiženke .Mugažo etnolagerin ühtnikad oliba Karjalaižiden , vepsläižiden da suomalaižiden mediakeskuses , kus ”Periodikan ” radnikad starinoičiba ičeze radon polhe i tegiba heiden täht vändon ”Kalevala ”–eposan mödhe .
Etnolagerin programman päpalan oli kodikeliden škol .Lagerin aigan lapsed saiba uzid tedoid karjalan , vepsän da suomen keliš da kul’turas .Keliden škol vedetas Petroskoin universitetan Baltianmeren –suomalaižiden keliden kafedral .Necen keliden školan pätegend om siš , miše ei vaiše antta lapsile uzid tedoid kodikeles , no i tundištoitta lapsid kafedran radonke .Starinoita lapsile , miše hö voiba opeta rahvahaližid kelid universitetas-ki , ozutada heile , kus voib kävutada nenid kelid .
Kut i kaiken lapsed jagatihe videhe gruppaha : koume karjalašt gruppad (pohjoižkarjalan , livin da lüdin paginad ), suomen da vepsän kelen gruppad .Täl kerdal vepsläižid oli enamba , ku männuzil vozil (7 mest ).Neičukaižed tuliba Kalagespäi , Šoutjärvespäi , Šokšuspäi da Lodeinoje Pole –lidnaspäi .
Školan openduzčasuid vediba kafedran opendajad , kudambad kaiken radaba lapsidenke etnolagerišpäi da harjeniba jo rata heidenke .Urokoiden teman oli ”Kalevala ”–epos .
Nel’l’ päiväd lapsed openziba kelid , pagižiba ”Kalevela ”–eposan polhe , vändiba vändoihe kodikelel da vaumičiba ozutelusen , miččen ezitiba lop’praznikal .
Vepsläine grupp ozuti sarnan , miččen Elias Lönnrot kerazi ičeze tedomatkas vepsläižele male .Nece oli ”Kaži da hired ”–sarn , mitte opendab hüvin meletada edel sidä , ku tehta midä-se .
Lop’praznik oli ilokahan da čoman , se tuli mel’he kaikile : lagerin tegijoile da iče openikoile .Lapsed hüviš meliš ajoiba kodihe da sanuiba , miše tahtoiba pörttas lagerihe völ kerdan , a ken-se tahtoiškanzi päzuda universitetha opendamha Karjalan rahvahaližid kelid .Kut sanui Karjalan Rahvahaližen da regionaližen politikan ministerstvan radnik Jelena Migunova , norišt – nece om meiden tulii aig .Pidab ozutada heile , mitte znamoičend om rahvahiden keliden opendusel , kut nece voib abutada tulijal aigal , miše nece om lujas perspektivine azj , da tetes kelid voib löuta ičeleze erazvuittušt radod .Voib rohktas sanuda , miše lagerin pätegend oli tehtud .
Lagerin tegijoin oma Karjalan Rahvahaližen da regionaližen politikan ministerstv , Opendusen ministerstv , Petroskoin valdkundan universitet da ”Rovesnik ”–ližaopenduzkeskuz .
Opendamoi vätes!
вепсский
Младописьменный вепсский