Тексты
Вернуться к списку | редактировать | удалить | Создать новый | История изменений | Статистика | ? Помощь
Larisa Čirkova. Aigad tusttuda ei ole
Larisa Čirkova
Aigad tusttuda ei ole
вепсский
Младописьменный вепсский
Jo
kaks’ kud meiden kanz om karantinal , kut i äjad toižed ristitud Venämal .Kuni lapsil oliba školan urokad , ka kaikuččen päivän mö tegim lujas äi koditöid , pirdim , openzim runoid da kacuim videourokoid .Ozaks , mö tedištim lujas äi openduzprogrammoid , miččiš radam eskai openduzvoden lopun jäl’ghe .Nene kaks’ kud meiden kanzan täht ei olnugoi kebnäd , sikš ku kaiken aigan olda kodiš om tozi jüged kut lapsile , muga vanhembile .Ozaks , kodiš kaiken om midä tehta .
Kaiken-se karantinal om hüvä se , miše kaiken aigan mö olem ühtes ičemoi lapsidenke , kaikuččen minutan holdum heiš , äjan pagižem toine toiženke da kaikid kodiradoid tegem ühtes .Ved’ ei pida aigoiš nousta , ei pida nikuna rigehtida , ei pida holduda siš , kut sinun lapsele pidab sadas sportškolha .
Minun Angelina-tütar jo viž vot opendase sportškolas taidehgimnastikerištos .Om sel’ged , miše sportmehele ei sa tacta harjoitusid , ika kaik satused , miččid hän sai aigemba , kadoba .Ozaks , karantin ei seižutand sportškolan radod i Angelinan sportopendai kaikuččen päivän keradab neičukaižid ZOOMprogrammas da vedäb sporturokoid ani kodišpäi .
Om sel’ged , miše kodiš ei ole äi tühjad sijad i pen’ honuz – nece ei ole sportzal , no eskai mugoižiš oloiš voib hüvin sportata da pidäda ičeze hibjad hüväs formas .Pidab vaiše sirtta kodikaludištod toižele sijale i sportopendai tuleb sinunnoks ani kodihe .Sikš ku Angelinan sportopendai om lujas tark ristit , kova tabal , ka tehta midä-se välläs ei voi .Hän homaičeb kaiken .Toivon , miše meiden susedad , kudambad eläba alahan , tirpaškandeba meiden sporturokoid karantinan lophussai .
No konz vaiše meil om joudai aig , ka kuna mö mänem ?Oikti .Keitimpol’he !Jügedoiden sporturokoiden jäl’ghe väged ližadab vaiše hüvä söm .No mi voib olda paremba vepsläižid pirgoid ?Vepsläižed sul’činad , kalitad , kürzad da magedad pirgad ...Konz völ , ku ei karantinan aigan pidäda kodiš mastar’-klassoid da opeta ičemoi lapsid paštmaha magukahid vepsläižid pirgoid .
Kahtes kus mö jo openzimoiš tehmaha kürzid , kalitoid , koloboid da magedoid pirgoid .Pirgoid vävule minun lapsed navediba söda enamba kaiked .Skancoid ajaba meiden kanzas kaik – i mužik , i vanhemb tütar , kudambale om kümne vot , i pen’ poigaine , kudambale täudui kaks’ vot .
Naku magedoiden pirgoiden receptan minei andoi konz-se minun armaz vepsläine emäg Polina Polikarpovna L’ovkina Šoutjärvespäi .Om lujas žal’ , no muloi 9.päiväl semendkud hän läksi elospäi .Minä kaičen muštos nenid lämid vastusid .Konz minä tuleskelin Šoutjärvehe keradamha materialad radiopaginoiden täht , minä kaiken aigan tulin Polina Polikarpovnan pert’he spravitamha händast .Kaikuččen kerdan hän vastsi mindai lämäs da söti magedoil vepsläižil pirgoil .Nügüd’ hänen receptan mödhe opendamoiš paštmaha minä da minun lapsed .Konz ajam skancoid , tegem tahthan , pagižem vepsäks .
Angelina-tütar kerdan sanui minei : ”Mamoi , mikš aigemba , konz minä pakičin sindai tehta bumagaspäi kartaižen libo pirtta midä-se , sinä kaiken aigan vastsid : ”Tegem , tütrudem , konz minai linneb aig ”.A nügüd’ kaiken teged minunke ühtes ”.Minä muhahtin , no meletin , a ved’ hän sanub oikti !Edel karantinad minä kaiken aigan muga i vastsin tütrele .Jäl’gmäižes kahtes kus mö pirdim muga äi kuvid da tegim ičemoi käzil muga äi tehmusid , miše aigemba vodes muga äi nikonz em tehnugoi .Ühthine rad tob ilod kut minei , muga lapsele-ki .
Karantinaks eskai vepsläine Paginklub sirdihe Rahvahaližespäi kul’turkeskusespäi meiden fateraha .Kaikuččen pühäpäivän online - vastusele keradasoi vepsläižed erazvuiččiš külišpäi , agjoišpäi , eskai maišpäi .Tahtoin sanuda sur’ spasib online-konferencijoiden tegijoile mugoižiš čomiš programmoiš , miččed lujas meile abutaba ei tusttuda karantinan aigan , a sada hüvid melid da pagišta toine toiženke armhal kodikelel .Venäman agjad , Suomi , Francia , Vengria , Kipr – kaik oma ühtes , kaik abutaba toine toižele päzuda karantinas päliči da libutaba henged surile azjoile .
Päiväd jokseba toine toižen jäl’ghe .Aigad , miše ištta kodiš azjata , tusttuda libo meletada pahoiš azjoiš , ei täudu nikelle meiden kanzas .Toine nedal’ mäni , a toižele om jo muga äi planoid , pidab vaiše ehttä todenzoitta niid elos .
Aigad tusttuda ei ole
вепсский
Младописьменный вепсский