Тексты
Вернуться к списку | редактировать | удалить | Создать новый | История изменений | Статистика | ? Помощь
Galina Ol’kina. Vit’a, prokati Pet’a-diädiä!
Galina Ol’kina
Vit’a, prokati Pet’a-diädiä!
карельский: ливвиковское наречие
Новописьменный ливвиковский
Videles , konzu
jälles voinua loppiettih kartočkoin sistiemu da elos rubei paranemah , kaikenjyttymät soittobrujat dai ajobrujat oldih ostetut kyläläzel Vit’amiehel .Häi ruadoi uittajannu kezäl , a talvel splavnois ruadoi šouferinnu .
Perehes häi oli vahnin kolmes lapses .Muamah ei ruadanuh nikus , ku oli vie kaksi lastu : tyttöine vie kävyi školah , a nuorem lapsi oli nistii .Tuattah ruadoi žest’anščiekannu da pajas sepäl abuniekannu splavnois .
Tyttölöi Vit’a valličči parembii da čomembii lahjoin vuoh , muite tytöt bokkua kuattih hänespäi .Vot sitgi tahtoi ozuttua iččie "parahannu " brihannu .Mučoikse otti čoman da nuoren tyttözen , dai elettih keskenäh sobuh .
Muul rahvahal vie ei olluh raadivovakkastu kamodan piäl , oldih vie suures čupus mustat , kui podnosat raadivo-torielkat , a Vit’al oli jo raadivoprijomniekku .Sit vähä kel jiädih jälles voinua vie patefonat , a Vit’al oli radiola .Soittua hos ei maltanuh , ga osti akkordionan da opastui sil soittamah .Se ei olluh soitandu , a oli rämäitys pahal iänel .
Ajobrujii vähä kel oli , erähil roittihes velosipietat , a Vit’a jo osti motosiklan .Sih motosiklah istuttau mučoin iččeh tuakse bagažniekale , da ku pastaldau häi ajau , ga vai liga čurah-toizeh dorogas lendäy .Se meijän uuličču oli ylen ligažu .Vihmukezäl kai dorogu oli ligažu .Sit ken oli astumas dorogan reunua myö , gu kuuli Vit’an motosiklan iänen , pidi vältyö loitombakse bokkah , eiga Vit’a ligaviel piäs jalgoissah valattau .A mučoi peräs istuu , ruohku , ni kypsy , sidä varuau , kudamas havvas piäliči lendähyy jiäy istumah motosiklah .Vit’al oli ajajes pravilo : midä raviembah ajat , sidä vähembi haudua .Mučoil pluat’t’u lepettäy , ku puarussu , sidä i kačo , konzu lendoh lähtöy .No Vit’an piäl niken ei suuttunuh , ku nikelle ei otkuažinnuh , ken vai kyzyhes ajamah .Kaikkii ajelutti .No čtobi mučoidu ei hävittiä bagažniekalpäi , osti motosiklan l’ul’kan kel .Vastebo sit hänel rodih ajelijua .Kel oli kiireh laukkah juosta , kuni laukku on avvoi butilkua ostamah , kelgo poujezdah ehtie linnah ajamah , avtoubusat silloi vie ei käydy .Kel kunne muijal kiireh , kaikkii Vit’a ajelutti , gu oli joute .Päččiniekku Pet’adiädö eli ei loitton , vastaspäi , sežo himoittelih ajamah , ga bagažniekal peräs varai , a konzu Vit’a osti motosiklan l’ul’kanke , sit jylgeni dai kyzyihes : "Vit’a , sinä kaikkii prokatit , prokati i Pet’a-diädiä ."Vit’a sanou : "Prokatin , ga l’ul’kas minul on istuju , jesli bagažniekal istunnettos .Hos Vit’a-diädö varai istuokseh bagažniekale , ga konzubo rodieu toine kerdu , konzu tulou himo ajua .Dai Vit’a-diädö istavui bagažniekale .
Lähtiettih ajamah ei hierun agjassah , bol’ničan puoleh , a toizeh agjah , poikki joves da Ust’jah päi .Ajetah , vai tuuli korvis viheldäy .Silloi vältyö ei olluh kes .Velosipietoil ajettih bokas dorogua , kävelijät iče vältyttih , ku kuultih motosiklan motoran .Mašinua vähä oli ajelijua .Rahvahal nikel ei olluh mašinua , kolhozas sežo ei olluh mašinua .Kombinuatas vai oldih mašinat , ga net šouferit ajettih vagavasti .Vit’al oli valdu ajua tävvel väil .Vot Vit’a vai sidä ei ottanuh mieleh , gu lähembi Ust’jua menöy poikki dorogas raududorogu .Enne sie šlakbaumua ei olluh , a sit hot avariedu ei olluh , ga yksikai , kuni hädä ei tulluh , azetettih šlakbaumat .A Vit’a sen unohti , da tävvel voimal ajajes ku pračkahuttau häi kohti šlakbaumah …Iče i duumaikkua , midä sai roijakseh …Vit’a motosiklanke kuadui , Pet’a-diädö lendi piäliči raududorogas , dai piäliči šlakbaumois kahten dorogan välil .Ust’jan-pos’olku , oigiel Pitkährandah päi dorogu , Pet’a-diädö seizou , käzii huarottelou , ei tiijä , kunnepäi mennä …nenä mennyh viäräh , rožat veres …
Motosiklu se azetui , Vit’a puolelleh motosiklan ual , kol’asku eronnuh motosiklaspäi da ajau passažiiranke dorogan bokkah , havvas piäliči da kolhozan pellole poikki kartouhkuvagolois .Passažiiru istuu kielenmielettäh da duumaiččou , kunnessah nygöi tämä kol’asku motorattah händy vedänöy ?Jalgimäi azetui .
Lähti Vas’a-passažiiru kol’askaspäi , kaččou , midä on roinnuhes .Opitteli nostua motosiklua , ga jygei on .Kirgui Pet’a-diädiä abuh , nostettih motosiklu da Vit’ua opiteltih , hengis on , andoi iänen .Odva-odva kahtei ribaitettih lesničnoissah , sie telefonua myö soitettih bol’niččah .Sit kon’uhu hevon vällästi da vei Vit’an bol’niččah .Vit’a motosiklah enämbiä ei istavunnuh , ga himo ajandas ei lähtenyh .Luut lujettih , lihat parattih da vie jälgimäi osti lehkovoin mašinan .
Nygöi nikedä ei ole heidy hengis , ga sananpolvi kyläh jäi : "Vit’a , prokati dädy Pet’u ."
Vit’a, prokati Pet’a-diädiä!
карельский: ливвиковское наречие
Новописьменный ливвиковский