Тексты
Вернуться к списку | редактировать | удалить | Создать новый | История изменений | Статистика | ? Помощь
Valentina Libertsova. Muruine Rastavan kumman ozua. 1
Valentina Libertsova
Muruine Rastavan kumman ozua. 1
карельский: ливвиковское наречие
Новописьменный ливвиковский
MYÖHÄZES
MATKAS
Annine min vai sai vägie voitti undu , kudai sebäili viluloil käzil , katoi pehmiel hämäril , vedi omih erivärizih kujozih .Tyttöine opрi kaččuo näbevynnytty jälles suurdu lundu meččiä – puhui kylmänyöle st’oklale pyöryzen , levendi sidä hoikkien sormien n’okkazil , ga sidä iluo hätkekse ei täydynyh : pakkaine uvvessah mutakoičči loukkozen , salbai jiäl .Tavata oččuikkunas juaman kuvii ei suannuh : istundukohtu oli loitton .
Avtobusas niken ei paissuh , vikse ajettih omih kodipezih väzynyöt opastujat da linnas ruadajat vahnembat .Uvven Vuvven pruazniekkua vaste kaikil oli himo loppie jygiet ruavot omah aigah , jättämättäh nimidä vellakse .Sithäi ajettih myöhäzel reisul , ehtitäh ihan stolah istavuo aij oilleh .A nygöi pidi huogavuo unettoman yön iel .Erähät toinah luajittih lähtij än vuvven yhtehvedoloi .Rubei mustelemahgi Annine .
Tämä vuozi nimis paha ei olluh .Puutui loppie oman hierun keskiškola hyvien arvosanoinke opastustovestukses .EGE-tutkindot sežo roittih korgieloin balloinke .Sit vai pidi vediä net liput Petroskoin valdivonyliopiston vastahottokomissieh .Dostali kezä sai olla kois , auttua perehele heinarres , kävvä meččäh muarjah da gribah , kytkie da valella ogrodua , silmäilin nuorembii kaksozii ‒ vellie da sizärdy .
Opastundu ei ozutannuhes ylen jygiekse , tyttöine oli rakas istumah kniigoin piäl jo lapsusaij as , ga oli , tiettäväine , vähäzel atkal vierahas linnukohtas .Toiči enimil ehtil , konzu piä välleni ruadolois , ildazen varustajes mustoituttih armahat joven randazet , valpahanruskiezet koivun varvat ikkunan pieles , valpahansinizet ikkunat sydämespäi , pikkarazien lapsien kaikkie lat’ettu myöte levitetyt elostukset , buaban burbetandu , tuatan lehten šohineh , muaman helevy iäni sulavazil livvin sanoil kuččuju stolah .Toiči kai kyynälet nostih vuottamata , ga midäbo ruat – pidäy opastuo , hommata omua tuliedu elaigua .
Tyttözet yliopiston yhteseländykoin pertis oldih eriluaduzet .Yhty ni nähtä ei suannuh , odva opastundan aij an pyzyi rinnal , vai kuulou kellozen ‒ kerras telefonanke pordahile .Ehtypäiväl tabuau uvvet ruutat , reduvunnuot lykkiäy kodisumkah – dai veriäh : "Poka-poka , neidizet !"Toizet kaksi tyttösty oldih yhtes kyläspäi tulluot , ei sua sanuo nimidä pahua , ‒ vagavat , hil’l’azet , ei rakkahat paginal , toine toizenke toiči midälienne šupetettih …
Annine punaldeli piädy , oppi arvata , kus ajetah , eihäi sua mennä Kotkatjärves siiriči .Omua hierulastu istujes avtoazemal ei nähnyh , varai , gu yksinäh on täs mašinas , ga voij ah ajua kohti , punaldumattah kyläh , azetetah meččäh , opis nengomal pakkazel kolme kilometrii kulgie , a vie hukkua ainos sil palazel kuultah , gu alalleh enne sie kolmandel kilometril piettih turkiferman kuadopaikku .
Myöstin rodih vähäzel abei : toizet yhtesopastujat jo ammui omis lämmis kodilois istundusij oi painetah .Kuilienne kaikin puašittihes luvendolois : loitton eläjät , kudamil poujezdal on piäzendy kodih , kolme päiviä tagaperin laitoksen dekanuattah čökähteltihes , petroskoilazet – tänäpäi opastajien ies pokoroittihes piästiä heidy kynnet da tukat kundoh panna .Hänele da linnanymbäristös eläjile sanottih : "Työ jiägiä , eihäi loitos kodih ole ajua .Dai mennä hierus yksisama ei ole nikunne , kodih vältäy konzu puuttuo ".Sit pidi juostozil puoles čuasus , kudai vai jäi ajandassah , kävvä yhteseländykodih kolmandele kerroksele , huškata liij at opastunduvehkehet , kopata kodih varustetut vešit da vitkitämätä hakata avtoazemale .
Pikkarazes oččuikkunan čuppuzes onnuako viuhkaldih ristulaudaine .Dai iespäi istuju naine ristildi silmät .Vikse neče manastirin dorogu jäi bokkah .Tyttöine nouzi , hil’l’akkazin rubei lekkumah lähtendyveriäh päi .
EHTY KODIMUAL
Vastuamah tuli muamo , tembai sumkat , sebäi , astujes andoi käskyt da nevvot : "Tuattas vaste tuli kylyspäi , jälgimäine , jo kai kylvimmö da pezimmökseh .Sovat sinule varustin magavopertih , tahtonet midä , ga muuta .Löylyy dai vetty sinul jäi kylläl .Veriät avvoi , tulles salbua net lukkuh , älä avaindu kaimua lumeh ".
Kylys kylvendy Uvven Vuvven vastavuksen iel – se perindö roih jälgivuozinnu , jälles kuulužua kinuo , ga onnuako täl kerdua oli talvidorogan jälles ylen mieleh .
Stolas istujes tyttöh myös liččavui uni .Kiiroittajen silmii , gu ei salbavuttas , nouzi juondumal’l’anke käis , čilkai st’oklubokkii toizienke , lekahutti huulii muigiekko-kargiedu puzuriviinastu , čökkäi šorpikkozel olivje-saluattua , tabai palazen suolattua ogurčua , mielihyväl täytti vačan muaman luajittuloil lambahan kabjois studeniloil .Ei ruvennuh vuottamah , kuni leikatah da juatah tortu , ryyppäi hiilavua , heinienke havvottuu čuajuu da hakkai pieneh magavopertih oij endamah sij oi lapsile da ičele .
UVVEN VUVVEN ŠIPAINIEKAT
Havačui Annine huondeksen hämäris .Kuului piiraivärtinäzen kolkotus da halgoloin päčis räčkeh syöndypertispäi .Vikse muamo pastoi šipainiekkua .Se on ylen vahnu karjalazien perindö – pastua pyhinpäivin da pruazniekoin huondeksil piiruadu .Nuoret jo ei puaksuh kehtata , a buabo yksisama potakoiččou : "Vai laškat piiruata syvväh ".Annizen perehes mittuottahto piiruat ainos oldih stolal .Ga tänäpäi kuilienne muamo nouzi , vai ei liennou muannuh ni vähästy ?
‒ Annine , jogo havačuit , gor’a ? Minun šeimindät da kolkutandat vikse nostatettih ?Prosti rauku .Puutuigo huogavuo ?Etgo voibunuh ?Sinä illal muga terväh uinoit , enne lapsii .Hyö uvvessah juostih stolah , sit tuattas käski viertä muata kaikil .Sithäi kai olemmo jo pimies huondekses jalloilleh .Midälienne mies joudui kaivolluo , vikse pakkaine händy jiätytti kylläl .Avoi-voi , kartohkat kiehuttih , pidäs ottua päčispäi , valua viet da kuorittua .Etgo avvuttas , tytär-rukku ?Kuoret jo valmehet , kolme palastu jäi ajeltavua .
Se oli vie yksi vahnu karjalazien perindö – kuorittua , survuo da panna syväimekse šipainiekkoih vaste keitetty kartohku .Tulluot rahvas diivitähes : "Midä pidänöy muokatakseh ?Voibihäi keittiä kuoreta ?Libo kuorie veičel – mi nygöi myvväh kaikenjyttysty erillisty leikkuanduvehkehty ."Karjalazet muhahtetahes : "Voibi , voibi , ga ei moizet roij a ".
Kynzil da kämmenil tyttö kuoritti kai palavat kartohkat , survoi eri astieh , a sit lähti aittah ottamah maiduo da voidu notkendua syväimet .Tuli tuatto vezienke , pezi käit , otti käzih härkimen , sit kiitti tytärdy :
‒ Moločču , hos huonot käit nägeväkse , älä kačo sih , ga vägevät .Ni yhty kurkoihuttu et jättänyh .
UVVEN VUVVEN ILOT DA HOMMAT
Enzimäine Uvven Vuvven päivy sih meni nägemätä : käydih gost’at , istuttih stolas , kiitettih pastoksii , kučuttih käymäh vastah .Annine juoksendeli , autoi vahnembil , elosti kaksozienke , talui heidy pihale , čuraitti mäis , vedeli regyöl , kävyi lumimökkih , autoi ripoittua linduloin syötinlaudazele jyviä .Iluo oli täyzi vačču , a kniigoih kačahtuakseh ei löydynyh ni minuuttastu .Sendäh tossupiän kerävyi tyttö linnah : enzitutkindolois läbi pidi piästä putilleh .
Rastavale tulla kodih eigo aigua olluh , eigo den’goi himoitannuh menettiä .Kui nevvoi buabo , Annine huondeksel čökäldih kaikis lähembäzeh linnan kirikköh .Rahvastu oli täyzi , odva sai ostua tuohukset , panna net da šupettua Jumalazel malitut da omat pikoi pikkarazet pakičukset : tervehytty perehel , lykkyy tutkindoloih da hos muruine Rastavan kumman ozua .
Tuli Vahnu Uuzi Vuozi .Loppih enzimäine yliopiston sessii , hyvin loppih .Alevui siä .Sydämel oli huoletoi rauhu .Algutalviloman päivil Annine tunzi iččie gu Jumalan kämmenil : ihastuksis autoi muamale da buabale loppumattomis kodiruadolois , toičigi tuatas stuači hyppäi vezirengilöinke kaivoh libo yskäzentoizen halguo koppai loittozes pinos .Vahnembat muheloittih , ei ruatutettu , potakoittih huogavumah kuni on omas kois .
Kaksozet suures ihalmos pandih mukkii lumes , hiihteltih suksil , luisteltih pikkarazel jiäpaikkazel , kuduan suuril pakkazil valoi tuatto .Ga heij än talviloma loppih , pidi uvvessah aij oi nosta da juosta školah , varustua kodiharjaitukset , pihas nel’l’oilendah aigua rodih vähembi .
Yksinäh suureta ruavota kois olles päivät pitkettih .Liigua muata da istuo televiizoran tyves tyttö ei suvainnuh .
Muruine Rastavan kumman ozua. 1
карельский: ливвиковское наречие
Новописьменный ливвиковский
‒