Тексты
Вернуться к списку | редактировать | удалить | Создать новый | История изменений | Статистика | ? Помощь
Mehed L’udmila . Pyöräkkö opastuu liikkumah
Mehed L’udmila
Pyöräkkö opastuu liikkumah
карельский: ливвиковское наречие
Новописьменный ливвиковский
Eli
buaboil da died’oil meččymökkizes Pyöräkkö .Häi oli kirmei da vessel .Hyppiäy häi pihale da vieröy meččytroppastu myöte .Häi vastuau troppazel mečän elättilöi , pagizou heijänke da kižuau .Erähiči Pyöräkkö vieri loitombakse juuri juamassah , kudamua myöte ajeltih suuret mašinat .Pyöräkkö piätti piästä juamas poikki .Tuli häi lähembä juaman reunua , ga ei ehtinyh piästä asfal’tale , kui rubei kuulumah mašinan tormozoin kradžineh .
Mašinalajai rubei kirgumah :
– Terstavuitgo elokseh ?Et novva liikundusiändölöi !Sehäi on varattavu !
– Mittumat vie liikundusiännöt ? Minä muite tahtoin piästä tien toizele puolele , meččäh , vastai Pyöräkkö .
– Mene vai ielleh tiereunua pitkin da ku nähtet zebran , se on tiespoikkimenendykohtu , kudamua myöte piäzet tien toizele puolele , sanoi ajai da lähti ielleh ajamah .
– Mittuine vie zebru ? kyzyi Pyöräkkö , ga ajai händy jo ei kuulluh .
Rinnal olijas puus istui varoi , kudai kaiken kuuli .Häi lendi Pyöräkön luokse da rubei händy opastamah :
– Karr-karr , terveh , Pyöräkkö !Tiijätgo , kogo muailman rahvas , šouferit dai jallai kävelijät , novvetah liikundusiändölöi .Zebru libo tiespoikkimenendykohtu on moine junokas hurstine ties poikki .Sidä myöte voibi varuamattah astuo .Tien reunal seizou pačasgi , paččahal on tiemerki , kudai ozuttau meile , ku täs on tiespoikkimenendykohtu .Libo tiemerkin sijas voibi olla kolmesilmäine svetofuoru libo liikehvalot .
– Mibo zvierilöi on se kolmesilmäine svetofuoru ? kyzyi Pyöräkkö .
– Oletgo sinä tolkutoi , Pyöräkkö ! Ei se ole zvieri , se on sinun dovariššu !Hänel on kolme silmiä .Palanou ruskei silmy – seizo !Syttynöy keldaine – ole valmis !Rubieu palamah vihandu silmy – kačo , ku kai mašinat azetuttas da mene !
– Kačo vai ! Passibo , sinul , Karkuša !kiitti Pyöräkkö varoidu .
Pyöräkkö lähti ielleh vieremäh tien reunua pitkin da terväh nägi korgien paččahan , sil oli kolme silmiä .Ties poikki oli junokas hurstine – juno valgei , juno mustu …Pyöräkkö vuotti , konzu syttyy vihandu silmy , da konzu kai mašinat azetuttih , häi vieri ties poikki .Tiespoikkimenendykohtua myöte astui Jänöigi , rinnal häi vedeli omua pyöriä .
– Jänöi , miksebo sinä vedelet pyöriä rinnal , voithäi ajua sil , kyzyi Pyöräkkö .
– On moine liikundusiändö , ku tiespoikkimenendykohtua myöte ei sua ajua , pidäy vältämättäh astuo , vastai Jänöi .
– Vot on kummua , vastai Pyöräkkö . – A miksebo sinul on šl’oma piäs da polvisuojat , kuuluugo niilöin piendy liikundusiändölöih ? kyzyi Pyöräkkö .
– Kuuluu . Niilöi pietäh pyöräl , skuteral da motosiklal ajajat .Vie myö kiinitämmö pyöräh da omih sobih valgienkuvastimet .Niilöin hyvyös mašinalajajat nähtäh meidy loittuopäi , sellitti Jänöi .
– Kačo , kui äijän minä tiijustin tänäpäi ! Nygöi rubein liikkumah liikundusiändölöin mugah !
Jänöi viuhkutti käil Pyöräköl , nouzi pyöräle da lähti ajamah meččytroppastu myöte .
Pyöräkkö opastuu liikkumah
карельский: ливвиковское наречие
Новописьменный ливвиковский
–
–