Тексты
Вернуться к списку | редактировать | удалить | Создать новый | История изменений | Статистика | ? Помощь
Peša Ruočin paginoi. Osipan buaboi eläviskuvis
Peša Ruočin paginoi. Osipan buaboi eläviskuvis
карельский: ливвиковское наречие
Новописьменный ливвиковский
O
sipan buaboin jalgu kebevyi .Häi opitteli sidä parandella skipituaral , kannateksel , siemenvoil da terval , vai ei se niil rohtuloil parannuh ‒ paheni vai .Lopuškal hänen pidi lähtie Sordavalah jalguadah ozuttamah touhturil .Ku illal oli joudavua aigua , Osippu-poigu vei hänet elävihkuvih , ku häi ei ennen olluh moizii nähnyh .Sit ku hyö oli ostettu piäzyliput , "luutnantti " neuvvoi heijät istumapaikoil .(Buaboi arveli paikannäyttäjiä luutnantikse , sil oli samanlazet koriet nauhat da lentočkat , kui heijän kyläs olijal rajavardioston luutnantil .)
Šali oli rahvastu täyzi .
Buaboi vähäzen huijusteli , ku häi vanhu inehmine oli tulluh elävihkuvih .Häpistyksissäh ku oli , da vie kirkas valo häigäi silmii , häi ei smenkninyh , štobi stuulan istuin oli nostettu yläh .Häi istuo löhähtigi tyhjän piäl .Hänen keppi vai kolizi , ku häi pačkahtih lattiel ."A vot ollah šmetkut , ku vanhua inehmisty muga koirustetah , što pohjattomal stuulal käskietäh istumah !"
häi burizi kibien jallan ker pystyh komburoijes .Hänen vahingo olis rahvastu nagratannuh , vai kuitengas ei niken rohkennuh iäneh nagrua lohista .Lopuškal buaboil selvii pohjattoman stuulan rakendus da häi rohkeni sil uuvvestah istoija .
Sit šali pimeni .Tädä buaboi vähäzen pöllästyi .Kaiken varal häi koitteli ferezin kormanii , kudamas oli hänen den’gukukkaron’e , eihäi voi tiediä , hos’ pimien hötäkäs kentah sen omah kormanih n’ulahuttas .Kepin häi pani käin suadavil kaiken varal .
Kodvazen peräs šalin eduseinäl hurstizen piäl algoi ilmestyö liikkuvii kuvii .Buaboi oli mielissäh , ku sai kaččuo , kui hebozil ajettih da lehmii lypsettih .Vai sit hänel tuli hädä kädeh , ku audo koval vauhtil rubei tulemah piäl .
‒ Älgiä , hyvät ihmizet , ajakkua piäl , tiähäi on rahvastu !
häi kirgai suurel iänel .
No , eihäi se audo tulluh piäl , hos’ buaboi oli jo pystys pagoh lähtemäs .
Tämän jälgeh tuli toine kuva .Sit kuvas oli ylen äijy imeliä rakkahuttu .Se kuva ei buaboidu ni nyhty miellytännyh .Häi kačoi sidä puolel silmäl , kui briha pyrgi neidisty armastelemah ; se briha näit liččavui puolivägizin ukkuamah .Silloi buaboidu jo rubei suututtamah .
‒ Sylle suuh , sylle suuh sil šmetkul !
häi kirgui da kobizutti keppiidäh lattieh .
No , häi rauhoitui vähitellen ku nägi , što tämä pari lopuškal venččaittih ihan buat’uškan eis .
Loppupuolel näytettih kui yksi raččumies ajua karahutti suuren linnan edeh .Linnan portti oli salvas , sikse tämä raččumies rubei sidä rumsuttamah .Vai ei niken tulluh sidä avuamah .Häi ielleh rumsutti portii da kirgui , štobi hänelleh avattas , vai ei se nimil opil avavunnuh .Silloi buaboi hädäpäissäh nosti huuvvon : "En minä voi tulla avuamah , ku minun jalgu on kibei .Mengiä työ nuoremdat mužikat avuamah , eihäi voi tiediä , hos’ hänel olis kiireh n’uužniekkah !"(Šalis kai ruvettih nagramah , vai ei niken mennyh porttii avuamah ).
Nygöi buaboi jo ičegi älyi , što häi oli liigua hiildynyh .Siksebo häi šupetti Osipan korvah , što eigo jo lähtiettäs fatierupaikkah , ku händy muga äijäl rubei väzyttämäh .Vai sih hillavah elävätkuvatgi loputtih .
Ku buaboi sit kepin ker šlökki ukseh päi , kai rahvas hänel annettih arvo mennä enzimäzekse .Uksen eis händy vuottamas oli audo (kenlienöö sen tilannuh ), da se "luutnantti " čökkäi buaboin kobrah piäzylipun hinnan .
Peša Ruočin paginoi. Osipan buaboi eläviskuvis
карельский: ливвиковское наречие
Новописьменный ливвиковский