Тексты
Вернуться к списку | редактировать | удалить | Создать новый | История изменений | Статистика | ? Помощь
Lazarev Ivan . Kulleh ajoin?
Lazarev Ivan
Kulleh ajoin?
карельский: ливвиковское наречие
Новописьменный ливвиковский
Joga
vuottu Alavozen školan opastujat opastunduvuvven lopus kävväh tavan mugah kogo kluasal turistumatkah Luadogale .
Kui lienne 1960 vuozil muga lähti yksi kluassu pohodah , a sinä vuon vezi oli madal , sit hyö ligua myöte kaikin puututtih suarele .Vallittih sija , luajittih suuret vastat , kabrastettih paikku , kerättih halguo , lomeikkuo , sytytettih robl’o .A stolaine suarel oli pikkaraine , vai kaksi-kolme hengie syndyi sen tuakse .Opastai , kluasan johtai , keräi opastujat da sanoi :
– Lapset , kierdäkkiä suari ymbäri , yksi joukko yhtes čuraspäi , toine toizes da keräilkiä aldoloil lykätyt lavvat , tuogua tänne , sit yhtes azummo skamn’at da suurendammo stolan , gu syndyzimmö kaikin .
Lapset ihastuksis juattihes joukkoloih da lähtiettih eččimäh laudoi .
Silkeskie kyläs kerävyttih miehet kalastamah .Silloi mašinoi da motosikloi vie ei olluh jogahizel .A motorvenehet Alavozes oldih kaikil – kävvä mečästämäh , kalastamah , päivittymäh jovensuuh , dai gostii ajeluttua .
I sit kaksi kalastajua matkatah omal pyydövenehel motoranke .A motorat silloi oldih kolmes väis kahtestostussah : Veterok , Strela , Sif – 5 vägie , Veterok – 8 vägie , Moskva – 10 vägie .Yhtel kalastajal oli veneh , azuttu kleittylöis laudazis , ylen kebjei , sentäh , gu motor oli huonombi , a vauhti suurembi .Net kaksi kalastajua ruattih zavodal enzimäzeh vuoroh , a kalastajat , kuduat ruattih toizeh vuoroh , kerättih heile dengat , gu mennes ostettas kai , midä pidäy kalastandah niškoi :
– Työ yösijän varustatto , kalua suatto da liemen keitättö , a myö sih tulemmo .
Ajettih enzimäzet kalastajat laukalluo , a sie viinat – rubl’u kolme kopeikkua da rubl’u kaksikymmen kopeikkua , valgei viinu – kaksi rubl’ua kuuzikymmen kopeikkua .Dai zakuskua kaikkie : rajantagazis mualoispäi pippurit , ogurčat , tomuatat bankois , havvottu liha , paštietat kananlihas ...Kalastajat otettih kaikkih dengoih syömisty da hyväs mieles ajettih ielleh .
Tuas ozuttihes Luadoganjärvi , pidäy azettuo , hyvitellä vienižändiä , gu kala tulis , ei luadinus suurdu tuuldu , pidäy lykätä vedeh raududengazet .Perindön mugah vienižändäle valoimmo .Valua ga valua – yhtes butilkas , sit toizes – vienižändäle tipahuttua dai iččie ei unohtua .Tipahutimmo – jo olis aigu ielleh ajua kalastamah .
Tulimmo suarelluo .Opastujat – rannan čuraspäi , a kalastajat – järven čuraspäi .Löyttih pädevy kohtu , kerättih halguo robl ́oh niškoi , kuivua olgie , gu ei viruo pal’l’ahal mual .Yksi kalastai sanou toizele :
– Kuule , minä ajelen toizeh suaressah , sie hyvin ahvendu puuttuu , a sinä täs kartohkazet kuorita .Tulen järilleh , keitämmö liemen kahtes kattilas .
Dai lähti .Toine kalastai kartohkat kuoritti , muudu ruaduo nimidä , vie ližäi valoi vienižändäle , gu toizen vuoron kalastajile lykystäs , ga uni painoi hänen dai uinotti veneheh .A se oli juuri se kebjei veneh kebjien motoranke .
Vot astutah opastujat , kerätäh laudoi dai nähtäh venehen , kuduas maguau mies , vai keroidu karaittau .Vuotettih toizii lapsii , kuduat tuldih toizes čuraspäi .A venehes juaššiekku viinua , avatut butilkat , bolguarien ouveššibankat , havvotut lihat , paštietat , leiby , batonat ...
Opastujat eriluaduzet ollah .Yksi sanoi :
– Minä tua näin šalašun , ei loitton sit kohtas , kus on meijän luageri .
Piätettih , gu ymbäri nikedä ei ole , otettih erähät zakuskat da kalastajua yhtes venehenke nostaldettih da kannettih meččäh .Vähästy enne sidä oli suuri tuuli , se kuadoi suarel puut .Sit hyö veneh mužikanke sij oitettih virujan kuuzen alle .Toine kalastai pyydi ahvendu , tuli järilleh , tukat piäs pystöi nostih : kusbo veneh , kus dovarišat , kus syömizet ?
Lähti häi motorvenehel suares ymbäri – ei nävy venehty , ajau rannan myödäh – ei ole venehty .
Liennougo dovariššu kogonah uravui , kodih vikse , ajoi .Ga midäbo nygöi sanon toizile dovarišoile , kuduat ruadovuoron jälles kalastamah tullah .
Kogonah paheldui , ga ni ryypätä ei ole nimidä .Myös lähti suares ymbäri , rannan myödäh .
Silkeskie mies liennego toibui , vai ulgoh rodih tarbehus , avai silmät , ga ymbäri vai kuuzen varvat .Mies mötkyttäy piädy , nimidä ei ellendä .Terväh selgevyi , meni rannale , kuččuu abuh .
Kerävyi vägitukku kalastajua , tuli toine kalastaigi :
– Midäbo sinä , kodihgo ajelit ?Midäbo sie unohtit ?
Ga en jo !Uskotgo : minä kai mustan – kui lähtimmö , kui ryyppäimmö , kui tänne tulimmo , a vot kulleh meččäh ajoin – en musta !
Kulleh ajoin?
карельский: ливвиковское наречие
Новописьменный ливвиковский
–
–
–
–
–