Тексты
Вернуться к списку | редактировать | удалить | Создать новый | История изменений | Статистика | ? Помощь
Ушинский Константин. KUI PAIDU PELLOL KAZVOI
Ушинский Константин
KUI PAIDU PELLOL KAZVOI
карельский: ливвиковское наречие
Новописьменный ливвиковский
Otti
mies kevätaigua robehuzen da lähti pelvastu kylvämäh .Sil kerral pellon rannale piädyi hänen tytär Tan’a .Kaččou Tan’a , kui tuatto ottau kobral jyväzii da viškuttau pelduo myö da kyzyy :
– Tata , midäbo sinä ruat ?
– Pelvastu kylvän , tytärrukku .
Kazvetah sit teile Vas’a-vellenke paidazet .
Ei tiijä Tan’a , uskuo vai ei .Nikonzu tyttöine ei nähnyh paidoi pellol kazvamas .A tuatto tyttözeh kaččou da vai muheloittau .
Kahten nedälin peräs šulkuzel heinäzel vihandui šoiguine .Tan’ale tuli mieleh :
"Olishäi minungi paidaine nengozel vihandukukkazel ."
Kahteh kerdah Tan’an vahnembat sizärekset muaman kel käydih kytkemäh pelduo da joga kerdua sanottih neičukale :
– A gu čomaine paidaine sinulles roihes !
Meni aigu , heinäine kazvoi , rubei kukkimah sinizel kukkazel .Tan’a pellon randua myö kävelöy , kaččou ."Vas’al silmäzet ollah moizet , a paidua mostu nikel kyläs piäl en nähnyh ."
Konzu kukkazet kukittih da pakuttih , niilöin tilah roittih vihandat piähyzet .Ruvettih net ruskonemah da kuivamah .Sil aigua muamo vahnembien tyttärien kel pelvahat nyhtittih juurineh , sivottih kyhlähih da jätettih pellole kunehtumah .Jälles sidä kuivis kyhlähis perrettih siemenpiähyzet , a pelvahat upotettih jogeh da pandih piäle kivet , ku net ei nostas vien piäle .Pahas mieles kaččou Tan’a , kui hänen paidua upotetah , a sizäret vai omua paistah :
– Hyvä sinule paidaine roihes , Tan’a !
Kahten nedälin mendyy suadih pelvahat jovespäi , kuivattih da ruvettih muokkuamah .Sit nostettih lavale da sie loukutettih loukul .Jälles vie kerdu perrettih da suvittih pirral ruumenet .Perretty pelvas kartattih raudazil kartiloil sissäh , kuni se ei roinnuh pehmei da šulkuine .
A Tan’a ainos huoles on sizärien ruadoloih kaččojes : "Tämä pelvas pehmeni , kui Vas’an tukkazet .Vikse voibi sit paidu ommella !"
Sizärekset ruatah da vai kiitetäh : – Paras paidaine , Tan’a , sinule roihes .Päivy rubei lyhenemäh , ildu pitkenemäh , tuli talvi .Suadih akat kuožalit , sivottih sih kartattu pelvas da ruvettih kezriämäh .Kezrätyt langat muamo pani aitan seinäle kangahah niškoi .Suuren pyhän aijal Äijiäpäiviä vaste keräi muamo pertih ikkunpieleh kangaspuut da rubei kudomah paltinua .
Keviäl valmis paltin levitettih heinäle muadu myö päivypastozeh da kasteltih viel , sit paltin harmuas valgeni .Tulien talven aigua muamo viili da ombeli paltinas paijat .Sizärekset šuoritettih Tan’ua da Vas’ua uuzih , lumivalgieloih paidazih .
Karjalakse kiändi Sergei IPATOV
KUI PAIDU PELLOL KAZVOI
карельский: ливвиковское наречие
Новописьменный ливвиковский
–
"
–
–