ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Jegor Ruppijev. KUULUŽU PYYN MEČČUIČENDU

Jegor Ruppijev

KUULUŽU PYYN MEČČUIČENDU

карельский: ливвиковское наречие
Новописьменный ливвиковский
Pyy on koskemattomis mečis luonnolline tedriroduhine lindu. Pyy nikonzu ei jätä meččiä, ainos eläy sit. Sygyzyl ižäpyyt, konzu net ollah kylläzembät, voijah painua enämbän puoldu kiluo. Pyyn väri enimyölleh on harmai. Ižäpyy eruou emäpyys: sil piäs on heltu da kaglan kohtas on mustu tačmu. Pyydy on kaikis mečis, yhtelläh enämbi niidy on segakuuzikkolois, kus kuuzen ližäkse kazvau leppiä, pajuu da koivuu. Pyy enne kaikkie syöy kazvisyömisty: muarjua, pajun da koivun lehtenkandua da urvua, eriluaduzien kazviloin siemendy da vezua. Pyyn poigazet syvväh böbökkiä da niilöin toukkua. Havvonduaigah emäpyy luadiu pezän muale da haudou 6-15 jäiččiä. Havvondu kestäy läs kolmie nedälii. Pyyt eletäh puarakkai, sendäh ižäpyy sežo syöttäy da kazvattau poigazii. Poigazet jälles roindua, kuivettuu, jo voijah juosta muamale peräh. Kezän loppussah net kazvetah aiguzen linnun suuruokse. Höyhenien vaihtettuu poigoveh leviey da linduzet ruvetah elämäh ičepiänneh. Myöhä sygyzyl da talvel pyyt eletäh puarakkai libo yksitellen. Konzu mua on jo syvän lumen peitos, pyy, kui toizet tedrilinnut, yöl maguau lumes, a kovil pakkazil päivängi viettäy sit. Lähtöy iäre vaiku syömäh libo varavos. Pyyl on äijy vihaniekkua nellijalgazien da lendäjien pedoelättilöin keskes. Semmite varattavat sille ollah kuničču, reboi da haukku, niilöile pyyt ollah erähänny piäsyömizis. Linnunpoigastu kuolou vie pahan siän periä keviän lopus da kezän allus. Karjalas pyyn meččuičendu on kuulužu. Pyyn luguh se ei vaikuta pahasti, vuvven 2017 talvilugemizien mugah Karjalas oli enämbi 140 tuhattu tädä linduu.