Тексты
Вернуться к списку | редактировать | удалить | Создать новый | История изменений | Статистика | ? Помощь
Natalja Antonova. Unis itkenet – ilmizin ihastut
Natalja Antonova
Unis itkenet – ilmizin ihastut
карельский: ливвиковское наречие
Новописьменный ливвиковский
Karjalazien
unilois on ynnälline filosoufii da muailmannägemys .Nähtylöi uniloi myöte maltetah ennustua siädy , elaigua da ozua .Hyvät dai pahat suabi tiediä ennepäi , ken vai maltanou da tiedänöy .
Kerran joute olles , verokeskie istujes ugodiimmos paginal uniloih niškoih oman muamanke .Parahite oli synnynmuanaigu menemäs , äijän midä saneli minule .Kummastuin , ni etto usko – tiedo tiijos kiini .A mittumat čomat sanondat sih kerrondah mennäh .Sain vakkiessah kuulta ennevahnallistu karjalan kieldy , poeettistu da kuvannollistu .Kuibo tuadu tallel et pane da omamualazile et tariče ?
Smiettikkiä vai , ga unet ollah nedälin päivien myödäh , enzimässarres allates pyhähpäivässäh .Jogahizel nähtyl yöl on oma merkičys .Dai kerras primietitäh , mittuine nedälin päivy on .Sanotah nenga :
Enzimässargen nähty uni menöy
enzimäzeh , ken pertih tulou ,
Tossargen – toizeh ,
Kolmanpiän – kohti iččeh .
Nellänpiän – novva se ,
Piätenčän – päderäs ,
Suovattan – suun ies libo sudre menöy .
Pyhänpiän – pane piäh .
Toinah aiga čomasti on sanottu .Ku nähnet unen enzimässargen yöl , se sinuh ei , kačo , mene , a menöy enzimäzeh ristikanzan , ken tulou sinun kodih .Mugaigi tossarren uni – menöy kehtahto vierahah , toizeh .A vot kolmanpiän uni malta ottua iččeh päi , se kohti sinuu on .Nellänpiän undu usko , ole milleh .Piätenčän uni terväh stuanivuu .A vot suovatan voibi terväh stuanivuokseh , mindäh sendäh terväh roih paginal libo päinvastoin – menöy ihan sudre .Ken tiedäy sen ?Pyhänpiän undu tädä runostu myö pidäy panna mustoh toičakse .Konzuto se todeh menöy .
On menetiijämi sanaviehkua , kudamii myö uniloi suau ennustua .Kui hyvän , mugai pahan ies .Sanommo , kylys olendu – kyynälikse , dai alasti olendu menöy pahakse .Kartohku , kala – kargiekse , näit gor’an .Riihes olendu – riidelemäh rubiet , sobien pezendy – soimandakse .Lattieloin da sobien pezendy vouse ei olla hyvän iel .A vot nähnet vetty – veseldyksekse .Lehtivastat – vastustukse , kento rubieu tiel sinulles olemah .Kyly – kynnyksekse , sežo vastustustu .
Ylen äijy undu ennustetah surmua .Sanommo , kurniekku – kuolijakse , venehel sovvandu da vedeh menendy , vies uijandu – sežo surmakse .Uvven koin luajindu – oman ičen kuolendan ies .Heiny da hebo – hengästys , dengu – jähvästys , peldo – paičerdus .Kai net kolme jiävitäh ristikanzan vačan tuskii .Dai hallon hallondu on haijastuksekse .Se on hädä .Mečäs olendu da marjan keriändy – mad’matus .Se merkiččöy , ku sinuu ruvetah mad’mattamah , čakkuamah , kielii kandelemah .Maido sežo on mad’matuksekse .
Kuunnelkua , unis humalasolendu on hyvän iel , kaikkienke olet hyväzilleh .Unis hyvänny da čomannu olendu on läživyndän iel , a vot pahannu da tuhmannu olendu on parаndumizehpäi .Pitkät tukat – pitkät tuskat , lyhyöt tukat – lyhyöt tuskat .Kerras bohatut , ku näit täidy piäs !Karjalazet sanotah : "Unis ku itkenet , ilmizin ihastut ".Ku inis näit veičen , vuota miesgost’ua .Kengät jallas libo muut jallačit – matkan ies , pal’to piäl – ei ole hyvä .Mado unis – vihamuššiekku , kento sinulles pahua toivottau .Lihan näidy on pahan iel .Bumuagudengat ei olla hyvän ies , a vot kolikot hyväh päi mennäh .Ku ollet stolis , sinuu syötetäh da juotetah , on elokse , a ku iče gostitat – köyhtyndäkse .Pajatandu da vesselän piendy – paičerdustu iespäi .
Neidizil suau ennustua miehel puutundua .Sanommo , valgien sovan piäl panendu tuou valgua – se on rutto muutos .Ku neijistäjes nähnet kondiedu , sulhaine rodieu sluavakas , ku maduo – sulhaine tulou mavonnu , vihažennu .A ku lammas unis ozuttahes , vastineh roih lyhytigäine .
Ennustetah siädygi .Ku nähnet unis tulipalon libo tulen , se on pakkazeh .Pokoiniekan näindy on vihmakse , kala – tuučakse .Sanotah , tytön unis näindy tyhjäkse menöy , undu ei maksa uskuo .Pahan unen nähtyy sanotah : "Kunne yöt , sinne unet !".Anna pahembat täs seneltus ei stuanivuta , tyhjäh mennäh .
Unis itkenet – ilmizin ihastut
карельский: ливвиковское наречие
Новописьменный ливвиковский