Тексты
Вернуться к списку | редактировать | удалить | Создать новый | История изменений | Статистика | ? Помощь
Miss Uoterloun mustot
Miss Uoterloun mustot
карельский: ливвиковское наречие
Новописьменный ливвиковский
Miss Uoterlou viruu
kravattizes .Missis Uoterlou ukkuau tytärdy da toivottau hänele hyviä yödy :
- Vardoikkah sinuu Jumal , minun armas-armahaine , kuldaine minun tyttöine .
Miss Uoterlou kummallizesti muhizou vastah .
"Nygöi minä jiän yksinäh , - duumaiččou lapsukkaine , - da sit voin ajatella kaikenmoizih kummallizih dieloloih näh ".
Missis Uoterlou ei voi ottua silmii tyttäres .
– Kiitän sinuu , Jumal , sit , gu olet andanuh minule nengoman uardehen , – šupettau häi .
Ei ole tärgei se , midä minule roih , ga , ole hyvä , Jumalazeni , vardoiče pahuos händy .
Miss Uoterlou duumaiččou : "Vot otan da heitämmös suurekse kui kuudam , da niken ei voi minuu tavata , moine minä olen ylen suuri .Tovenhäi , se roih ylen hyvin "?
- Hyviä yödy , armas .
Hyviä undu , minun eloine .
Miss Uoterlou oppiu midägi mustoittua …midätahto ylen čomua …vaiku se oli muga ammui , ga häi unohti , mis kai algavui , enne sidä kui ehtii mustoittua , mil kai loppihes .
- Kuldazeni , konzu sinä nenga kačot minuh , minul himoittau itkie .
Mih näh sinä ajattelet , lapsukkaine ?
Miss Uoterlou nimin periä sidä ei sano .Ei sua tiediä , toinah , Missis Uoterlougi sežo oli sie silloi .
- Vardoikkah sinuu Jumal , armahaine , - šupettau muamo da sammuttau tulen .
Tyttöine jiäy yksinäh .
Miss Uoterloul jo on vuozi .Se on aiga korgei igä .Puaksuh sellälleh virujen tyttöine ajattelou niilöih lapsukkazih näh , kudamil vie ei ole ni yhty , da nagrau .Konzu hänel oli kuuzi kuudu , mister Uoterlou omisti hänele runon da kerran ehtäl ylbieh pani bumuagulistazen tyttären käbäzeh .Erehtykses bumuagupalaine runonke syvättih tuulutusikkunazen ragoh , gu ikkun ei rämizis yölöil .
Anna runot päittihgi dieloh , ga mister Uoterlou yhtelläh ei voinnuh peittiä sidä , gu on pettymyksen vallas .Missis Uoterlou , tiettäväine , kodvan pidi pahua mieldy , konzu ellendi , mi on tapahtunnuh , ga oli jo myöhä .A mister Uoterlou sanoi : maksau vai kerdu runot kiändiä puolei , dai sidä jo et kohenda .Kaikkien ozakse kaksi jälgimästy rivii jäi , net oli revitetty iäre , gu bumuagaine olis pättäviä sangevuttu .Täs net ollah :
Häi ei vie kävele da ei vie pagize ,
Nedäli nedälin peräh häi maguau , maguau , maguau .
Tovessah miss Uoterlou maltoi paista , vaiku ei tahtonuh .Häi piätti vuottua , konzu hänele täydyy puolitostu vuottu .A piätti sendäh , gu hänel oli äijy ylen hyviä musteluu , vaiku toiči häi ei voinnuh niilöi mustoittua .Eihäi sua ajatella da paista yhtelaigua .Vuvven nelländeksenke häi muite vai viruu sellälleh da mustoittelou …a konzu kai hyväzesti mustoittau , sit sanelou sih näh vahnembile .Ga ennepäi pidäy harjavuo pagizemah .Sihbo lapsukkaine harjavuigi joga yödy , konzu jäi yksinäh .Dai nygöi häi harjavuu .
- Teddi !
– kirguau tyttöine .
Jo nukkevunnuh lattiel kravattizen jallois pl’uuššukondii havačui da nosti piän .
- Mibo rodih ?
– burbettau se .
- Magaitgo , Teddi ?
- Magain dai en muannuh .
- Minä unohtin , olingo minä vai en olluh , - šupettau miss Uoterlou .
- Nu , minbo sinä unohtit ?
- Mi on milienne moine armahaine – sinä ellendät , mih näh minä sanon , - minähäi tiezin , ga vot silkeskie …
- a sinä ainavo mustat , toinah et ni musta – mibo se sanoi on ?
- "Sajendettu maido ", - nevvou Teddi .
- Odva vai muga , - ebäilöy miss Uoterlou .
- Varmasti .
Tarkembah et ni sano .
Tyttöine hengähtähes .Muga jygei on löydiä tarku sana !
- Toinah , minä heile vie nimidä en ni sano , - atkalah sanou miss Uoterlou .
– Toinah , heil sanuagi mostu eule .
- Toinah , ei ni ole , - Teddi on samua mieldy .
– Kummallizet hyö ollah rahvas .
– Kondii vähin-vähäzin havaččuu .
– Otammo , ezimerkikse , "sajendetun maijon ".
Buiteku se on , a tovessahhäi ei ni ole .Sendähhäi minä heijänke enämbi en ni pagize .Ei ole heijän sanois mehevytty , ei ole , sanozin , aromuattua .Omaluadustu kaunehuttu ei ole .
- Minule pidäy sana …
- Parem magua vai , - nevvou kondii , se ičegi jo myös nukkuu .
- Engo minä sit nikonzu voinne heile sellittiä ?
– ajatellen kyzyy miss Uoterlou .
- Nikonzu , - läbi unes burizou Teddi .
– Hyö sevottih kaikis sanois .
Miss Uoterlou uppuou suarnallizih mustoloih kuldazeh čurah näh , kuduah hänel jo nikonzu ei sua puuttuo järilleh .Konzugi tyttöine heile sih čurah näh kai sanelou , vaiku jällespäi …jällespäi …jällespäi …
Tyttöine Hengästyhyy uinuou .
Miss Uoterloun mustot
карельский: ливвиковское наречие
Новописьменный ливвиковский
-
Милн Алан Александр
Воспоминания мисс Уотерлоу
русский
–