Тексты
Вернуться к списку | редактировать | удалить | Создать новый | История изменений | Статистика | ? Помощь
Sergei Jevstafejev. Käby. 3
Sergei Jevstafejev
Käby. 3
карельский: ливвиковское наречие
Новописьменный ливвиковский
An’a-t’outa istaldih Maksiman rinnale
da sebäi händy , iče ozutti died’oile piendy luuhistu kulakkastu .Pet’a-diädö istui buuristuksis , jälgimäi nouzi da jalgoi vedellen astui väliseinän tuakse da burbetti :
‒ Ga enhäi minä tiedänyh ...
Kodvazen peräs häi tuli , kolme oružua käis , pani net divanale da sanoi :
‒ Vallikkua , kudai ollou parembi , kai kolme ollah kunnos ...
Čuajun juondu hätkestyi , kiehumas oli jo toine samvuaru , nikonzu kogo elokses Maksim ei vie juonnuh nenga äijän čuajuu .Pet’a-diädö heittelemättäh saneli omii suarnoi ,da vie maltoi karjalazeh luaduh čomendella paginua .
‒ Maksim , sinun tuattohäi on Vit’an kylän lähäl olijas kyläspäi . Meijän hierut ollah mägilöin piäl , niilöin mugah nimetgi on pandu .Teijän kylä on čoman järven rannal , sen niemen mugah nimengi on suannuh .Minul puutui mennyt vuon sih kävvä , taloit on ruvettu kuadumah , päčit dai lattiet jo on riičitty , itkettäy kaččojes .Koskemattah on vai Terentjevan Nazar Jegorovičan kodi , hänen mučoi poijienke kävväh kezäkse tänne , kartohkupelduo pietäh , heiniä niitetäh , kalastetah .
Sanelen teile , midä mustan sih kyläh näh .
On minul kummi , nimi on sežo Viktor , hänen kodi täs rinnal on .Kerran minä en olluh kyläs kogo nedälin , sit tulduu kačon , ga kummin koin dai saruan levot on uvvel lavval katettu .Kyzyin , kusbopäi sait materjualua , sit häi minul saneli nenga .Uspen’n’ua pruaznuimah kai rahvas kerävyttih teijän , Maksim , kyläh .Dai kummi lähti , midäbo on lähtijes putin mužikal , kudai voinat dai tyrmät on läbi käynnyh .Gul’ankan jälles astuu häi humalazes da duumaiččou , kui olis kodih aijomba piästä .Kaččou , ga laukalluo seizou lespromhozan gaziekku , a sen lespromhozan direktor , milienne familii hänel olluh eiven’alaine , ukkailou nuorekastu tyttösty , se tyttöine kantoras ruadoi .Kummi enzimäi hyväzesti kyzyi , ku direktor ottas händy kyydih pos’olkassah , ga direktor haukui kummin humal’niekakse da käski pyzyö loitomba .Viktor tembai aijaspäi kangen da kerdua kaksi vieldi selgiä sil johtajal .Se vingui kui počči : ‒ Tyrmäh piäzet , voit panna kannikot kuivamah .‒ Tyrmiä minä en varua , olen sie jo olluh , siegi rahvas eletäh . Ga toinah sinä sanot , miksebo , parties olles , olet tulluh tänne kirikön pruazniekale .Kuibo sinä , naimizis olles , voit kaikkien nähtyy ukkailla vierastu naistu .Kuibo sinä , laitoksen johtajannu olles , kuduan pidäs maltua pidiä omua iččie , voit ajella humalas kaz’onnoil mašinal .Minä piästän sinuu nämmis riähkis , ku tänäpäi vedänet minuu kodih , a huomei tuonnet minun pihah kaksi mašinua laudua ...Kačos , koin dai saruan levot on katettu , piästin minä herran riähkis .Pet’a-diäd’ö join čuajun da jatkoi :
‒ Minä kummile sanoin , mindähbo kolmattu kerdua et andanuh kangel selgäh , minungi saruan levo olis voinnuh kattua .
Brihat nagrettih tävven vačan .Starikku otti oružan divanalpäi da oijendi Maksimale .
‒ Ota , poigu , tämä "tuuločku ", se hyvin ozuau . Midä sanozin mečästämizeh näh , ga mečoit kylän reunassah ylen harvah tullah , onnuako tyhjiä yön istutto havumajas .Parembi olis mennä "Kattilan puuh ", sinä , Vit’a , tiijät sen kohtan .Teijän kyläh mennes enne suurdu mägie hural puolel roih hebodorogu , sidä myö piäzettö kuuzikkoh .Yöl roih vihmu , a ku kuulletto ryvindän , älgiä varakkua , silloi mečoit jo ollah omas kohtas , vuottakkua , konzu pajattamah zavoditah .
Nygöi mengiä muate , kahten čuasun peräs nostatan .
Nostattua ei pidänyh , čuasun peräs brihat oldih jallas .Rubei vihmumah .Kuuzikospäi harvazeh kuului kaikenmostu iändy .Levien kuuzen al , pienen tulen tyves Viktor pidi instruktažan .
‒ Mečoin pajos on kaksi iändy , enzimäi se klokettau , sit šihizöy . Konzu šihizöy , voibi harpata kaksi-kolme askeldu , a konzu klokettau , seizo , älägo liikahtai .
Taivas valgeni , jo ei vihmunuh .Mečikön eri puolispäi rubei kuulumah eläviä iändy .
‒ Maksim , pidäy lähtie , linduu mečäs on äijy , ole vai tarkaine , älä pöllätä . Pane jo ammus oružah .
Brihat kusgo juosten , kusgo hyppijen , liikuttih mečäs läbi .Maksimal se oli kui lapsusaijan kižuamistu , toiči häi kai nagrahtelih ičekseh .Viktor käil ozutti – mene huruah puoleh , minä oigieh .
Ielleh Maksim liikui peitoči yksin , yksi-kaksi-kolme dai azetui , yksi-kaksi-kolme dai azetui ...Piäzi miärättyh kuuzessah , painoi sellän puun rungoh , dai kerras smietildi ‒ halguo olis täs puus kubometrii kaksi .Oigies puolespäi häi kuuli hil’l’an ammundan .Nosti piän dai oman ammuttavan nägi .Viijentostu metrin piäs kuuzen oksal istui ylen suuri mečoi .Maksim nosti oružan , jäi vai sormel painua , dai nengoine trofei roih käzis !Mečoin mustat siivet läpetettih vihandua helmen sävyy , linnul oldih ruskiet kulmat , voimakas n’okku da levei pardu .Čoma lindu nouzijan päiväzen valos nosteli piädy keväizeh taivahah da pajatti rakkahuksen pajuo .Suon reunas kirjavansiivizet linduzet vuotetah mečoidu , ga neidizil ei puutu nähtä sidä , ku ambunen ...
Maksim nosti oružan da ambui yläh , mečoi kodvazekse hyčityi , sit levitti siivet da oksii katkojen nouzi lendoh , kunnelienne alangon puolehpäi .Loitos kuului vie kaksi ammustu .
‒ Čomua sinul kevätty ! hengähtih Maksim dai kerras hänen jalgoih ylähänpäi pakui vihandu käby .Häi nosti sen da pani rindukormanih :
‒ Passibo lahjas !
Tuli Viktor , kaglas ripui oružu , joga käis mečoi .
‒ Kusbo sinun on ?
‒ Ga minä en maltanuh ozata linduh .
‒ Etgo puuttunuh ? Ga onnuako muite žiäli rodih , muga toiči olettelou ...
Brihat nagrettih , sit riputettih ammutut linnut kuivah kangeh da lähtiettih kylän puoleh , polgij en muga , ku linnut ei äijäl heiluttas .Kylän mäele nostuu loitossah hyö nähtih koin rinnal suuren mašinan valgien furgonanke .Mašin ikkunoissah oli lij as , rinnal seizoi rahvastu , kaikin heilutettih käzii brihoile .Maksim otti kormanispäi kävyn , se tuli pihkazel kevätmečäl da vie millienne muul , mi andoi syväimele hyvytty da ihastustu .Iespäi oli äijy kalastuspäiviä , miehien ies oli kogonaine elos .
Kiändi L’ubov’ Baltazar
Käby. 3
карельский: ливвиковское наречие
Новописьменный ливвиковский
‒
‒
‒
‒