Тексты
Вернуться к списку | редактировать | удалить | Создать новый | История изменений | Статистика | ? Помощь
Izotov IIvan . Minun tuatto. Perehen histourii
Izotov IIvan
Minun tuatto. Perehen histourii
карельский: ливвиковское наречие
Новописьменный ливвиковский
Minun
tuatto , Savelii Ivanovič Izotov rodih syvyskuun 13.päivänny vuvvennu 1913 Kondupohjan piirin Kaugoimägikyläs muanruadajien perehes .Tädä kyliä jo ei ole olemas , ga on olemas meijän perehen histourii da musto sit .
Minun tuatan elos oli jygei .Hänen tuatto tapettih I Muailmanvoinan aigua vuvvennu 1915, häi on pandu muah Pol’šas .Tuatattah kazvanuh poigu iče rodih perehen piämiehekse .Školas tuatto sai opastuo vai viizi vuottu , pidi ruveta ruadamah , dai kois pidi ruadua kai miehenruavot .Suomen voinua enne tuatto ruadoi Kondupohjan kombinuatal sel’l’ulouzan keitändymašinal .Sen voinan loputtuu tuatto otettih frontale .Häi oli ruanittu , sai kontuzien , ga voinan jälles uvvessah tuli ruadoh kombinuatale , kusgi meni VLKSM-järjestöh .
Vuvvennu 1941 algavui Suuri Ižänmualline voinu .Komsomol’cannu , kudai jo oli voinal , händy otettih RSFSR NKVD :n erijoukkoh .Hyväs sluužbas tuattua palkittin Za otvagu -medalil .Voinan aigua tuatto nelli kerdua kävyi vihollizen tagavon alovehele , kus yhtyi diversielöin pidämizeh vihollizen kommunikacieloin rikkomizekse .NKVD :n erijoukon rivisaldatannu häi oli Petroskoin piästämizen bojulois .
Tuatto on palkittu Orden Krasnogo Znameni -kunnivomerkil .Vuvvennu 1943 bojus häi sai jallan vahingon da puutui vangičukseh , kus oli vuvven 1944 kylmykuun 27.päivässäh .Sen jälles uvvessah pidi mennä frontale ...
Voitonpäivän tuatto vastai Pol’šas , muas , kus iellembäzel voinal kuadui hänen tuatto .Vuvvennu 1946 demobilizacien jälles tuatto tuli kodih .Häi otti ozua ruadoloih Bumuagukombinuatan endizeh kundoh suamizekse .Vuvvennu 1948 tuatto meni naimizih meijän muaman Klavdij a Tihonovanke .Muamo ruadoi opastajannu Kaugoimäis .Ga škola terväh salvattih , heil pidi muuttua elämäh Suunah , vie kolmen vuvven peräs hyö tuldih elämäh Aitniemele .Sie pereh eli hätken , hyö piettih lehmiä , lammastu , kanua , heil oli ogrodua da niittymuadu .Elos oli rauhalline , moine , mittumua hyö tahtottihgi , mittumua puolistamas tuatto oli voinal .
Aitniemel vanhembat ruattih penziessäh .Aijan mendyy siegi salvattih škola , dai puuzavodu , kus ruadoi tuatto , oli likvidiiruittu .Ruaduo ei olluh .Rahvas siepäi ruvettih lähtemäh iäres muijale elämäh .Kylä muutui kezämökkien pos’olkakse .A ennehäi oli kai – škola , lapsien päivykodi , ambulatourii , kluubu , kirjasto ...
Myö , lapset , kazvoimmo , kaikil on omat perehet , lapset , dai bunukkua jo on – kaksi brihaččustu da kaksi tyttösty .
Tiettäväine , myö autoimmo vanhembile , joga nedälii kävyimmö kyläh dai lomat vietimmö sie .Autoimmo pidiä talovuttu dai koin remontua , niittiä heiniä , yhtes tuatanke kävyimmö kalastamah .Bunukoil oli mieleh kävvä buaban da died’oilluo .Ga aigu meni , tervehys huononi , se oli jygien eloksen da voinan jälgi .Pidi jagua omii voimii ruavon da oman talovuon välis .Ken tiedäy , mi on kebjiembi !
Tuatto kuoli vuvvennu 1996.Häi eli 83 vuottu , muamo oli hengis vie kolme vuottu hänen kuoltuu .Meijän vanhembat on pandu muah Aitniemes , sie , kunne myö kävyimmö joga joudaval hetkel heidy tiijustamah .Bunukat jo on kazvettu , nygöi hyö kyzelläh meijän vanhembien elokses .Myö sanelemmo heile Klavdija ja Savelii Izotovien pitkäs da jygies elokses .Ga se elos yksikai oli ozakas !
Minun tuatto. Perehen histourii
карельский: ливвиковское наречие
Новописьменный ливвиковский