Тексты
Вернуться к списку | редактировать | удалить | Создать новый | История изменений | Статистика | ? Помощь
Švecova Darja . Pohjoine loštand da sen peitused
Švecova Darja
Pohjoine loštand da sen peitused
вепсский
Младописьменный вепсский
Londuses
om äi čomid da melentartuižid azjoid .Üks’ niišpäi Aurora Borealis vai pohjoine loštand .Karjalas-ki voib nägištada sidä .Äjad ristitud tegeba fotoid tal’vel da sügüzel , kut taivhal ozutihe erazvuiččed čomad mujud .Ozutesikš , Venämal loštand paksumba om vihand , a Kanadas – rusked da pakuine .Nügüd’ starinoicem mikš .
Man magnitine pöud
Kaik mö navedim päiväšt da sen lämäd .No päiväižen vauged – nece om penikaižiden časticoiden äjüz’ , radiacii .Se om varukaz rustitun täht .Ku tö lendaižit avarudehe ilma avaruz’laivata , päiväižen radiacii rikoiži teid .Tö küzut , kut-žo mö eläm Mal ?Melile abutab Man magnitine pöud .Se kaičeb meid radiaciaspäi .
Päiväine kaiken aigan tacib ümbri ičesaze gelijan protonoid da elektronoid , miččiden piduz’ om 400-800 kilometrad sekundas .Niid nimitadihe "päiväižen tulleikš ".Magnitine pöud vastustab nenid časticoid , no erased niišpäi putuba Man il’mištoho , časticoiden da magnitižen pöudon keskes tegese reakcii , sikš mö nägem taivhal čomad loštandad .
Kus nägištada loštandad ?
Pohjoine loštand ozutase ei vaiše Mal , no toižiš-ki planetoil .Ozutesikš , Jupiteral se om ul’trafioletižes spektras , i ristit ei voi nägištada sidä .Veneras pohjoine loštand erašti ümbardab kaiken planetan .Kaiked suremb pohjoine lostand om Saturnal .Sigä sen korktuz’ om 1200 kilometrad .
Venämal loštandad voib nägištada agjoiš , miččed oma ülemba pohjoižpirdad , ozutesikš , Murmanskas , Neneckijas okrugas , Krasnojarskan röunan pohjoižes .Ozutase loštand Karjalas , Komin valdkundas , Arhangel’skan agjas da Jakutijas .Nägištada pohjošt loštandad om oza .
Melentartuižed tedod
Om kut pohjoine loštand , muga om suviloštand-ki ‒ Aurora Australis .Ezmäine tedomez’ , kudamb kuvazi loštandan fenomenan vodel 1619, oli tetab tähtaztedomez’ Italiaspäi Galileo Galilei .Pohjošt loštandad sataba kulundad , miččid voib kulištada täudes hillüdes .Ned koskuba lopotusihe i elektrovägen kulundoihe .Pohjoine loštand ozutase päiväl-ki , vaiše nägištada sidä voib vaiše ehtal da öl .
Pohjošt loštandad voib nägištada kogonaižen voden , no tal’vel se ozutase paksumba .Kackat taivhaze , voib olda , tämbei pohjoine loštand čudutoitab teid .
Pohjoine loštand da sen peitused
вепсский
Младописьменный вепсский