Тексты
Вернуться к списку | редактировать | удалить | Создать новый | История изменений | Статистика | ? Помощь
Nadežda Petrova. Amuine vastuz om südäimes
Nadežda Petrova
Amuine vastuz om südäimes
вепсский
Младописьменный вепсский
Jogahižen
mehen elos oma mugomad kurod , miččid mez’ muštab kaiken igän .Ned jätaba hänen muštho suren da süvän jäl’gen .Mugoine azj om ozaidanus i minun elos .Nece om unohtamatoi vastuz Alevtina Ivanovna Andrejevanke .
Oli nece amu , konz minä vaiše zavodin rata školas .Alevtina Ivanovna vedi siloi radiopaginoid vepsän kelel da oli "Kodima "-lehtesen radnikan .Minä jo tezin händast , sikš ku hän tuleskeli meiden školha tehmaha reportažid vepsän kelen opendamižes , kirjutamha vepsän kelen urokoid vai miše antta minei nevondoid rados .Völ mö paksus vastsimoiš hänenke Vepsän rahvahan kul’tursebran azjtegoiden aigan .No nece vastuz oli erilaine !
Kerdan Alevtina Ivanovna päti tulda minunnoks adivoihe .Edel hän sanui , miše hänel om sur’ taht pagištoitta mindai da tehta reportaž minun sugujuriš , tedištada , kut minä zavodin pagišta vepsän kelel , mikš minei tuli himo olda vepsän kelen opendajan .Siloi minä lujas čududelimoi sikš , ku mugoine tetab naine tahtoib midä-se minun polhe kirjutada .Ken minä olen ?Mitte-se nor’ neičukaine , kudamb vaiše zavodi rata školas .No hän ei meletand muga .
Minä muštan , miše nece oli päipaštokaz päiv .Alevtina Ivanovna tuli jügedan magnitofonanke da tomaižidenke .
– Tervhen , Nadežda Anatoljevna ! – kulištin minä hänen heledan änen , kut vaiše avaižihe verai . Jäl’ges , kuni mö astuim minun honusehe , hän ehti küzuda minai azjoiš radol , kut om minun tervhuz’ , hüvä-ik eläda ühthižkodiš .Vot mitte holekaz oli ristit !
Ezmäi kaiked Alevtina Ivanovna pagištoiti mindai .A konz meiden pagin , miččen hän äneti , oli lopnus , mö zavodim joda čajud .Jodes čajud Alevtina Ivanovna starinoiči minei ičeze elos , lapsiš , vunukoiš .Ved’ hänen vunuk Oleg oli minun openikan : hän kaiken ühtni vepsän kelen konkursoihe da olimpiadoihe , konferencijal starinoiči ičeze baban polhe .Nägui , kut hän armastab babad !Oli meil pagin i Alevtina Andrejevan radon polhe .Konz minä küzuin Alevtinad Ivanovnad , jüged-ik om hänen rad , ved’ pidab kaiken kävelta , löuta erazvuiččid materialoid , hän muhahti i sanui , miše hän lujas navedib sidä .Hän navedib olda vepsläižiden keskes , navedib pagišta kodikelel .Hän tahtoib , miše vepsän kelel oliži tulii aig .Pagištes vepsläižiš , nägui , miše Alevtina Ivanovna lujas navedib kodiröunad , navedib ajeltas vepsläižihe külihe vai posadoihe (paksus muga saneli ), vastatas ristituidenke i lidnas .No enamba kaiked hänen hengele oli mel’he kodikülä .Minä en teda om-ik nece tozi , ved’ nece om vaiše minun tundmuz hänen paginoišpäi .
Erased vastused oma erilaižed , sikš ku paginan aigan meil om kaiken todesine sel’ged ihastuz .Nece pagin Alevtina Andrejevanke jäb minun muštho igäks .Sikš ku nece oli vastuz sebranikanke , kudamb oli üht mel’t minunke , kudamb abuteli minei nevondoil , el’genzi meiden radon vepsän kelen kaičendas .Lujas žal’ , miše Alevtina Ivanovnal oli lühüd igä , no hänen südäin i heng jäi meidenke hänen runoiš da pajoiš !Ned oma openduzkirjoiš , lehtesiš , kirjoiš , runokogomusiš , aiglehtesiš .Tal’vkus om hänen sündundpäiv .Školas mö lugim vepsän kelen urokal lapsidenke Alevtina Ivanovnan runoid , a jäl’ges openikad pirdiba kuvid .Naku miččed ned läskiba !
Amuine vastuz om südäimes
вепсский
Младописьменный вепсский